Pléascáin shábháilte le haghaidh úsáide neamh-mhíleata a chinntiú

Tá trí phríomhaidhm ag beartas an Aontais Eorpaigh (AE) maidir le pléascáin le haghaidh úsáidí sibhialta, is iad sin: i) margadh aonair AE a chur ar bun don trádáil i bpléascáin le haghaidh úsáidí sibhialta; ii) a riachtanais sábháilteachta a chomhchuibhiú ag ardleibhéal cosanta; iii) córas riaracháin a chur ar bun chun aistriú pléascán agus armlóin a mhaoirsiú.

GNÍOMH

Treoir 2014/28/AE ó Pharlaimint na hEorpa agus ón gComhairle an 26 Feabhra 2014 maidir le comhchuibhiú dhlíthe na mBallstát a bhaineann le pléascáin le haghaidh úsáidí sibhialta a chur ar fáil ar an margadh agus a mhaoirsiú (athmhúnlú).

ACHOIMRE

Tá trí phríomhaidhm ag beartas an Aontais Eorpaigh (AE) maidir le pléascáin le haghaidh úsáidí sibhialta, is iad sin: i) margadh aonair AE a chur ar bun don trádáil i bpléascáin le haghaidh úsáidí sibhialta; ii) a riachtanais sábháilteachta a chomhchuibhiú ag ardleibhéal cosanta; iii) córas riaracháin a chur ar bun chun aistriú pléascán agus armlóin a mhaoirsiú.

CÉARD A DHÉANANN AN TREOIR SEO?

Leagtar amach sa treoir seo rialacha maidir le pléascáin le haghaidh úsáidí sibhialta a chur ar an margadh agus a mhaoirsiú in AE. Ní chuirtear an treoir i bhfeidhm maidir le:

• pléascáin a ceapadh lena n-úsáid ag na fórsaí armtha nó ag na póilíní;
• earraí piriteicnice; nó
• armlón (faoi réir eisceachtaí).

PRÍOMHPHOINTÍ

Leagtar síos sa treoir freagrachtaí na monaróirí, na n-allmhaireoirí agus na ndáileoirí maidir le trádáil i bpléascáin thráchtála:

• Ní mór marc comhréireachta CE a bheith ar na pléascáin a chuirtear ar fáil ar mhargadh AE chun a thaispeáint go bhfuil na riachtanais bhunúsacha sábháilteachta uile á gcomhlíonadh acu faoin dlí AE.
• Chun marc comhréireachta a fháil, bíonn ar an monaróir measúnú comhréireachta a dhéanamh, doiciméid mhionsonraithe theicniúla a dhréachtú le haghaidh na dtáirgí agus a chinntiú gur féidir iad a rianú.
• Ní mór d’allmhaireoirí a chinntiú go bhfuil measúnuithe cearta comhréireachta déanta ag monaróirí agus ní mór dóibh an t-údarás náisiúnta, a ceapadh chun monatóireacht a dhéanamh ar an tsábháilteacht, a chur ar an eolas má mheasann siad go mbaineann baol leis an bpléascán.
• Ní mór an doiciméadúchán riachtanach go léir a thaifeadadh agus a choimeád ar feadh 10 mbliana.
• Ní mór don doiciméadúchán agus don fhaisnéis sábháilteachta a bheith scríofa i dteanga atá éasca le tuiscint ag úsáideoirí deiridh.
• Ní mór do mhonaróirí agus d’allmhaireoirí a seoladh poist a shonrú ar an bpléascán.
• Ní mór do dháileoirí a chinntiú go bhfuil marc CE ar an bpléascán agus go bhfuil na doiciméid riachtanacha ag gabháil leis, mar aon le treoracha scríofa i dteanga atá éasca le tuiscint ag úsáideoirí deiridh sa tír cinn scríbe. Má chreideann siad go bhfuil baol ag baint leis na pléascáin, ní mór dóibh é sin a chur in iúl don údarás náisiúnta a ceapadh chun monatóireacht a dhéanamh ar shábháilteacht.

Chomh maith leis sin:

• leagtar síos sa treoir riachtanais do na comhlachtaí a dhéanann measúnuithe comhréireachta, ar gá dóibh a bheith neamhspleách agus neamhchlaonta.
• sonraítear sa treoir na céimeanna atá le glacadh ag údaráis náisiúnta um fhaireachas margaidh chun táirgí neamhchomhlíontacha a aithint, chun allmhairiú táirgí contúirteacha ó thíortha neamh-AE a chosc agus chun an beart críochnaitheach cuí a dhéanamh.

CATHAIN A MBEIDH FEIDHM AG AN TREOIR?

Beidh feidhm ag an treoir ón 20 Aibreán 2016 ar aghaidh. Cuirfear an treoir nua in ionad Treorach 93/15/CEE ag tosú ar an 20.4.2016.

Nuashonraithe 12.02.2015