Margadh AE i dtáirgí iascaigh agus dobharshaothraithe

ACHOIMRE AR:

Rialachán (AE) Uimh. 1379/2013 — comheagrú na margaí i dtáirgí iascaigh agus dobharshaothraithe

CAD IS AIDHM LEIS AN RIALACHÁN?

Mar chuid den athchóiriú ar chomhbheartas iascaigh (CBI) AE, déantar athbhreithniú leis an rialachán ar aidhmeanna agus rialú chomheagrú na margaí i dtáirgí iascaigh agus dobharshaothraithe (feirmeoireacht éisc agus sliogéisc).

PRÍOMHPHOINTÍ

Clúdaítear cúig phríomhréimse sa scéim:

• eagraíochtaí gairmiúla;
• caighdeáin mhargaíochta;
• faisnéis do thomhaltóirí;
• rialacha iomaíochta;
• faisnéis maidir leis an margadh (sonraí ábhartha margaidh a bhailiú agus a anailísiú lena n-úsáid mar bhonn le haghaidh cinnteoireachta).

Eagraíochtaí gairmiúla

• Leagtar amach sa rialachán líon aidhmeanna sonracha d’eagraíochtaí táirgeoirí, lena n–áirítear iascaireacht inbhuanaithe a chur chun cinn agus ábhar muirí aischurtha a laghdú.
• Dírítear an t–athchóiriú chomh maith ar chomhbhainistíocht gníomhaíochtaí trí phleananna maidir le táirgeadh agus margaíocht. Tá rialacha agus struchtúr na bpleananna sin leagtha amach i rialachán cur chun feidhme ina dhiaidh sin, agus leag an Coimisiún Eorpach moltaí amach maidir le ról údarás náisiúnta inniúil ina leith sin a éascú.
• Tá rialacha maidir le heagraíochtaí táirgeoirí agus eagraíochtaí idirchraoibhe a aithint leagtha síos sa téacs agus i rialachán cur chun feidhme ina dhiaidh sin.

Caighdeáin mhargaíochta

Bunaítear comhchaighdeáin mhargaíochta i ndáil le táirgí iascaigh beag beann ar cé acu ó AE nó lasmuigh de AE a thagann siad. Féadfar na táirgí iascaigh sin nach gcomhlíonann na caighdeáin sin a úsáid go fóill chun críocha seachas lena gcaitheamh go díreach ag an duine (mar shampla, bia peataí, cosmaidí).

Faisnéis do thomhaltóirí

Ní mór an méid seo a leanas a bheith léirithe sa lipéadú do thomhaltóirí:

• ainm tráchtála an speicis (ainm nó ainmneacha a bhfuil glacadh leo nó a cheadaítear go háitiúil nó go réigiúnach i dtír) agus an t-ainm eolaíoch atá air;
• an modh táirgthe;
• an limistéar inar gabhadh an táirge nó inar saothraíodh é, agus an cineál trealaimh iascaireachta a úsáideadh;
• cibé ar dí-reodh an táirge;
• an dáta éaga, nuair is cuí.

Rialacha iomaíochta

Tá comheagrú na margaí faoi réir rialacha iomaíochta AE, ach is ann d’eisceachtaí áirithe d’fhonn feidhmiú ceart an bheartais agus baint amach chuspóirí AE a áirithiú (e.g. coigeartú leibhéal táirgthe na mball).

Faisnéis mhargaidh

Tá an Coimisiún le faisnéis faoin margadh a sholáthar d’eagraíochtaí gairmiúla, do gheallsealbhóirí agus do lucht ceaptha beartais trí eolas eacnamaíoch a scaipeadh, trí anailís mhargaidh agus trí fhaireachán ar phraghsanna.

Paindéim COVID-19 — leasú ar an rialachán

• Leasaítear Rialachán (AE) Uimh. 1379/2013 le Rialachán (AE) 2020/560 lena dtugtar isteach bearta sonracha chun tionchar phaindéim COVID-19 a mhaolú. Tá laghdú suntasach tagtha ar an éileamh ar tháirgí iascaigh agus dobharshaothraithe i ndiaidh phaindéim COVID-19 lena mbaineann iarmhairtí socheacnamaíocha tromchúiseacha sna pobail sin ina bhfuil ról mór ag an iascaireacht agus ag an dobharshaothrú.
• Tá sé mar aidhm leis an rialachán leasaithe ath-leithdháileadh níos solúbtha maidir le hacmhainní airgeadais laistigh de chlár oibríochtúla gach tír AE a éascú agus an nós imeachta maidir le cláir oibriúcháin a leasú agus bearta nua á dtabhairt isteach a shimpliú.
• Agus an ról tábhachtach atá ag eagraíochtaí táirgeoirí á chur san áireamh maidir leis an ngéarchéim a bhainistiú, tá méadú suntasach tagtha ar an uasteorainn le haghaidh tacaíocht airgeadais i gcomhair pleananna táirgthe agus margaíochta agus tá cead ag tíortha AE réamhíocaíochtaí deontais suas le 100 % den tacaíocht airgeadais sin a dheonú. Lena chois sin, leathnaíodh an deis go bhféadfaí an sásra cabhrach le haghaidh stórála a úsáid go heagraíochtaí táirgeoirí dobharshaothraithe.

CÉN UAIR ATÁ TOSACH FEIDHME AN RIALACHÁIN?

Tá feidhm leis ón 1 Eanáir 2014.

CÚLRA

Tá an rialachán seo ar an dara ceann de thrí ghné i bpacáiste reachtaíochta an athchóirithe ar an CBI. Gabhann sé le Rialachán (AE) Uimh. 1380/2013 maidir leis an CBI (féach an achoimre) agus Rialachán (AE) Uimh. 508/2014 maidir leis an gCiste Eorpach Muirí agus Iascaigh (féach an achoimre).

Chun tuilleadh faisnéise a fháil féach:

• Eagrú na margaí (An Coimisiún Eorpach)
• Teachtaireacht ón gCoimisiún — Creat Sealadach maidir le bearta Státchabhrach chun tacú leis an ngeilleagar i ráig reatha COVID-19 (An Coimisiún Eorpach).

PRÍOMHDHOICIMÉAD

Rialachán (AE) Uimh. 1379/2013 ó Pharlaimint na hEorpa agus ón gComhairle an 11 Nollaig 2013 maidir le comheagrú na margaí i dtáirgí iascaigh agus dobharshaothraithe, lena leasaítear Rialachán (CE) Uimh. 1184/2006 ón gComhairle agus Rialachán (CE) Uimh. 1224/2009 ón gComhairle agus lena n–aisghairtear Rialachán (CE) Uimh. 104/2000 ón gComhairle (IO L 354, 28.12.2013, lgh. 1-21)

Rinneadh leasuithe comhleanúnacha ar Rialachán (AE) Uimh. 1379/2013 a chorprú sa bhuntéacs. Ní de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Moladh 2014/117/AE ón gCoimisiún an 3 Márta 2014 maidir le bunú agus cur chun feidhme na bPleananna Táirgthe agus Margaíochta de bhun Rialachán (AE) Uimh. 1379/2013 ó Pharlaimint na hEorpa agus ón gComhairle maidir le comheagrú na margaí i dtáirgí iascaigh agus dobharshaothraithe (IO L 65, 5.3.2014, lgh. 31-38)

Rialachán Cur Chun Feidhme (AE) Uimh. 1418/2013 ó Pharlaimint na hEorpa agus ón gComhairle an 17 Nollaig 2013 maidir le pleananna táirgthe agus margaíochta de bhun Rialachán (AE) Uimh. 1379/2013 ó Pharlaimint na hEorpa agus ón gComhairle maidir le comheagrú na margaí i dtáirgí iascaigh agus dobharshaothraithe (IO L 353, 28.12.2013, lgh. 40-42)

Rialachán Cur Chun Feidhme (AE) Uimh. 1419/2013 ón gCoimisiún an 17 Nollaig 2013 maidir le heagraíocht táirgeoirí agus eagraíochtaí idirchraoibhe a aithint, rialacha eagraíochtaí táirgeoirí agus eagraíochtaí idirchraoibhe a shíneadh agus foilseachán na bpraghsanna truicir dá bhforáiltear le Rialachán (AE) Uimh. 1379/2013 ó Pharlaimint na hEorpa agus ón gComhairle maidir le comheagrú na margaí i dtáirgí iascaigh agus dobharshaothraithe (IO L 353, 28.12.2013, lgh. 43-47)

Féach an leagan comhdhlúite.

Rialachán Cur Chun Feidhme (AE) Uimh. 1420/2013 ón gCoimisiún an 17 Nollaig 2013 lena n–aisghairtear Rialacháin (CE) Uimh. 347/96, (CE) Uimh. 1924/2000, (CE) Uimh. 1925/2000, (CE) Uimh. 2508/2000, (CE) Uimh. 2509/2000, (CE) Uimh. 2813/2000, (CE) Uimh. 2814/2000, (CE) Uimh. 150/2001, (CE) Uimh. 939/2001, (CE) Uimh. 1813/2001, (CE) Uimh. 2065/2001, (CE) Uimh. 2183/2001, (CE) Uimh. 2318/2001, (CE) Uimh. 2493/2001, (CE) Uimh. 2306/2002, (CE) Uimh. 802/2006, (CE) Uimh. 2003/2006, (CE) Uimh. 696/2008 agus (CE) Uimh. 248/2009 tar éis ghlacadh Rialachán (AE) Uimh. 1379/2013 ó Pharlaimint na hEorpa agus ón gComhairle maidir le comheagrú na margaí i dtáirgí iascaigh agus dobharshaothraithe (IO L 353, 28.12.2013, lgh. 48-50)

Nuashonraithe 04.06.2020