Rialacha nós imeachta Choiste Eacnamaíoch agus Sóisialta na hEorpa

ACHOIMRE:

Coiste Eacnamaíoch agus Sóisialta na hEorpa — rialacha nós imeachta

Airteagal 303 den Chonradh ar Fheidhmiú an Aontais Eorpaigh — An Coiste Eacnamaíoch agus Sóisialta

CAD IS AIDHM LEIS NA RIALACHA NÓS IMEACHTA AGUS LE HAIRTEAGAL 303 DEN CHONRADH AR FHEIDHMIÚ AN AONTAIS EORPAIGH?

• Leagtar amach iontu an dóigh a n–oibríonn Coiste Eacnamaíoch agus Sóisialta na hEorpa (CESE) agus an dóigh a n–eagraíonn sé é féin.
• Le hAirteagal 303 den Chonradh ar Fheidhmiú an Aontais Eorpaigh (CFAE) tugtar an chumhacht do Choiste Eacnamaíoch agus Sóisialta na hEorpa é féin a rialú.

PRÍOMHPHOINTÍ

Comhaltaí

• I gcomhréir le hAirteagal 300 CFAE, tá an CESE comhdhéanta díobh seo a leanas:
  • eagraíochtaí fostóirí: comhaltaí ó na hearnálacha príobháideacha agus poiblí um thionscal, gnólachtaí beaga, comhlachais tráchtála, trádáil mhórdhíola agus mhiondíola, baincéireacht agus árachas, iompar agus talamhaíocht (Grúpa I);
  • daoine fostaithe: comhaltaí ó eagraíochtaí náisiúnta ceardchumainn, ar leibhéal na gcónaidhmeanna agus ar leibhéal na bhfeidearálachtaí earnála (Grúpa II);
  • páirtithe eile ar ionadaithe den sochaí shóisialta iad: eagraíochtaí feirmeoirí agus tomhaltóirí, gnólachtaí beaga, an earnáil ceardaíochta, gairmithe liobrálacha agus ENRanna sa réimse um chosaint shóisialta agus um chosaint an chomhshaoil (Grúpa III).
• Molann rialtais thíortha AE na comhaltaí agus ceapann an Chomhairle iad ar feadh 5 bliana. Is é 350 an t–íoslíon comhaltaí.
• Toghann na trí ghrúpa a n–uachtaráin agus a leas-uachtaráin. Glacann siad páirt in ullmhú, eagrú agus comhordú ghnó an CESE.

Ról CESE sa nós imeachta reachtach

• Comhairliúchán an CESE
  • Soláthraíonn an CESE tuairimí arna n–iarraidh ag an gComhairle, ag an gCoimisiún Eorpach nó ag Parlaimint na hEorpa.
  • Féadfaidh sé tuairimí dá thionscnamh féin, tústuairimí agus tuarascálacha faisnéise nó rúin a thabhairt chomh maith maidir le ceisteanna ar bith a bhaineann leis na sainchúraimí a thugtar do AE.
• Obair na rannóg
  • Ainmníonn an Biúró an rannóg a bheidh freagrach as tuairim nó tuarascáil a ullmhú.
  • Déanann an rapóirtéir, le cuidiú nuair is gá ó dhuine amháin nó níos mó dá chomh-rapóirtéirí agus ó shaineolaí, staidéar ar an gceist a cuireadh ar aghaidh, bailíonn sé na dearcthaí a cuireadh in iúl, agus ar an mbonn sin, tiomsaíonn sé an dréacht-tuairim, a chuirtear chuig an rannóg lena plé agus lena faomhadh.

Comhlachtaí oibre an CESE

An Biúró

• Cuimsítear ann:
  • an t–uachtarán agus an 2 leasuachtarán;
  • uachtaráin na 3 ghrúpa;
  • uachtaráin na 6 rannóg;
  • líon athraitheach comhaltaí, nach bheidh níos mó ná an líon tíortha in AE.
• Toghtar an t–uachtarán ó chomhaltaí na 3 ghrúpa agus toghtar na leasuachtaráin ó chomhaltaí an 2 ghrúpa nach bhfuil an t–uachtarán iontu. Toghtar iad ar feadh tréimhse 2.5 bliain, de réir phrionsabal uainíocht an ghrúpa.
• Is é seo a leanas príomh-shainchúraimí an bhiúró.
  • Leagan sé síos nósanna imeachta eagraíochta agus oibre an CESE agus tá an fhreagracht pholaitiúil aige as a bhainistíocht ghinearálta.
  • In éineacht le huachtarán an CESE, feidhmíonn sé na cumhachtaí buiséadacha agus airgeadais i gcomhréir le rialachán airgeadais AE (a rialaíonn buiséad AE).
  • Leagan sé síos na téarmaí maidir leis na rialacha nós imeachta a chur chun feidhme, agus soiléiríonn sé a léirmhíniú.
  • Gach 6 mhí déanann sé scrúdú, ar bhonn tuarascála a dhréachtaítear chun na críche sin, ar an ngníomh a rinneadh ar na tuairimí a sholáthair an CESE.

An uachtaránacht agus an t–uachtarán

• Buaileann an uachtaránacht (an t–uachtarán agus an 2 leasuachtarán) le huachtaráin na ngrúpaí chun obair an bhiúró agus an chomhthionóil a ullmhú.
• Agus an t–uachtarán tofa ar feadh 2.5 bliain, déanann sé an méid seo a leanas:
  • treoraíonn sé obair an CESE agus tugann sé páirt do na leasuachtaráin sna gníomhaíochtaí sin ar bhonn buan;
  • déanann sé ionadaíocht ar son an CESE ina chaidreamh seachtrach;
  • tuairiscíonn sé don CESE maidir le gníomh agus bearta a dhéantar thar a cheann;
  • cuireann sé clár oibre i láthair ag tosach an téarma oifige agus athbhreithníonn sé an méid a baineadh amach ag deireadh an téarma.

Na rannóga speisialaithe

• Tá 6 rannóg sa CESE.
  • Aontas Eacnamaíoch agus Airgeadais, Comhtháthú Eacnamaíoch agus Sóisialta
  • Margadh Aonair, Táirgeadh agus Tomhaltas
  • Iompar, Fuinneamh, Bonneagar agus an tSochaí Faisnéise
  • Caidreamh Seachtrach
  • Talmhaíocht, Forbairt Tuaithe agus an Comhshaol
  • Fostaíocht, Gnóthaí Sóisialta agus Saoránacht
• Ina theannta sin, tá Coimisiún Comhairliúcháin um Athruithe Tionsclaíocha aige chun cuidiú le lucht tionscail AE domhandú a réamh-mheas agus oiriúint do thionchar an domhandaithe.
• Seachas an t–uachtarán, caithfidh gach comhalta den CESE bheith ina chomhalta de 1 rannóg speisialaithe ar a laghad agus de 2 cheann ar a mhéad (le heisceachtaí). Ceaptar comhaltaí na rannóige ar feadh 2.5 bliain.
• Dréachtaíonn na rannóga tuairimí nó tuarascálacha faisnéise maidir le ceisteanna a cuireadh ar aghaidh chucu agus féadfaidh siad grúpaí staidéir nó grúpaí dréachtaithe a chur ar bun nó rapóirtéir a cheapadh a bhíonn ag obair as féin. Tá an rapóirtéir freagrach as tuairimí a ullmhú agus as monatóireacht a dhéanamh ar an ngníomh a dhéantar ar thuairimí a dhéanann institiúidí AE, a luaithe is a ghlactar an tuairim i seisiún iomlánach.

Na fochoistí

• Le haghaidh roinnt ábhar, féadfaidh an CESE fochoistí ad hoc agus faireachlanna a bhunú.
• Féadfaidh sé cuireadh a thabhairt chomh maith d’aoichainteoirí lasmuigh den CESE chuig éisteachtaí.
• Féadfaidh an t–uachtarán saineolaithe a cheapadh chun ceisteanna teicniúla a shoiléiriú a thagann chun cinn i rith ghníomhaíochtaí an CESE.

Coimisiúin chomhairliúcháin

• Féadfaidh an CESE coimisiúin chomhairliúcháin a bhunú. Tá siad sin comhdhéanta de chomhaltaí CESE agus de thoscairí ó réimsí den tsochaí shóisialta ar mian leis an CESE iad a bheith páirteach ina chuid oibre.

Seisiúin iomlánacha

• Tagann an CESE le chéile i gcomhthionól iomlánach le linn na seisiún éagsúil (9 seisiún gach bliain). Glacann comhthionól iomlánach an CESE a thuairimí ar bhonn thuairimí na rannóg agus cuireann sé chuig an gComhairle, chuig an gCoimisiún agus chuig an bParlaimint iad.
• Dréachtaíonn an biúró an dréachtchlár oibre ar bhonn togra ón uachtaránacht i gcomhairle le huachtaráin na ngrúpaí. Cuireann an comhthionól isteach é lena fhaomhadh roimh oscailt an tseisiúin ábhartha.
• Seoltar tuairimí arna nglacadh ag an CESE agus miontuairiscí an tseisiúin chuig Parlaimint na hEorpa, chuig an gComhairle agus chuig an gCoimisiún. Foilsítear in Iris Oifigiúil an Aontais Eorpaigh iad. Beag beann ar an mbonn dlíthiúil le haghaidh comhairliúcháin (athchur éigeantach nó roghnach) tá tuairimí an CESE ina gcomhchuid riachtanach de réir an dlí i ndoiciméad deiridh na Comhairle, an Choimisiúin agus Pharlaimint na hEorpa.

Modhanna vótála

• Amháin mura soláthraítear a mhalairt, glactar téacsanna agus cinntí an CESE trí vóta tromlaigh. Déantar an vótáil trí bhallóid oscailte, trí vóta taifeadta*, nó trí ballóid rúnda.

Idirphlé idir eagraíochtaí sóisialta agus eacnamaíocha AE agus tíortha neamh-AE

• Mar gheall ar a mhisean sainiúil, féadfaidh an CESE caidreamh struchtúrach a choimeád le comhairlí eacnamaíocha agus sóisialta agus institiúidí comhchosúla agus le heagraíochtaí na sochaí sóisialta i dtíortha AE agus neamh-AE. Ceapann an CESE toscairí a bheidh freagrach as na caidrimh sin a choimeád.

Sochaí sóisialta

• In 2012, glacadh prótacal maidir le comhar idir an Coimisiún agus an CESE chun borradh a chur faoi bhainteacht na sochaí sóisialta i bhforbairt beartas AE ar an leibhéal náisiúnta agus ar leibhéal AE araon, agus idirphlé struchtúrach a fhorbairt idir na heagraíochtaí agus institiúidí AE.

CÉN UAIR ATÁ TOSACH FEIDHME NA RIALACHA?

Tá na rialacha i bhfeidhm ón 21 Meán Fómhair 2010.

CÚLRA

Le haghaidh breis faisnéise, féach:

• Ár gcuid oibre (Coiste Eacnamaíoch agus Sóisialta na hEorpa).

PRÍOMHTHÉARMAÍ

PRÍOMHDHOICIMÉID

Leagan comhdhlúite de Rialacha Nós Imeachta Choiste Eacnamaíoch agus Sóisialta na hEorpa — An 14 Iúil 2010, ghlac an Coiste Eacnamaíoch agus Sóisialta na hEorpa an leagan comhdhlúite dá Rialacha Nós Imeachta (IO L 324, 9.12.2010, lgh. 52-68)

Leagan comhdhlúite den Chonradh ar Fheidhmiú an Aontais Eorpaigh — Cuid a Sé — Forálacha institiúideacha agus airgeadais — Teideal I — Forálacha institiúideacha — Caibidil 3 — Comhlachtaí comhairleacha an Aontais — Roinn I — An Coiste Eacnamaíoch agus Sóisialta — Airteagal 303 (iar-Airteagal 260 CCE) (IO C 202, 7.6.2016, lgh. 178)

DOICIMÉID GHAOLMHARA

Prótacal maidir le comhoibriú idir an Coimisiún Eorpach agus Coiste Eacnamaíoch agus Sóisialta na hEorpa (IO C 102, 5.4.2012, lgh. 1-5)

Nuashonraithe 21.11.2017