Dliteanas paisinéirí aeriompróra agus bagáiste

PRÍOMHPHOINTÍ

Dliteanas aeriompróirí i leith paisinéirí agus a mbagáiste

Déantar achoimre sa rialachán ar na rialacha dliteanais a chuireann aeriompróirí AE i bhfeidhm faoi reachtaíocht AE agus faoi Choinbhinsiún Montréal, agus ar reachtaíocht náisiúnta Bhallstáit AE. Sloinntear cúiteamh mar neasluach in airgeadra áitiúil ar chearta tarraingthe speisialta (CTSanna)¹.

Árachais agus fógra do phaisinéirí

Ní mór d’aeriompróirí AE:

• a bheith árachaithe suas go dtí leibhéal leordhóthanach chun go bhfaighidh gach duine atá i dteideal cúitimh an méid iomlán atá siad i dteideal a fháil faoin rialachán;
• a áirithiú go mbeidh achoimre ar na príomhfhorálacha lena rialaítear dliteanas i leith paisinéirí agus a gcuid bagáiste ar fáil do phaisinéirí ag gach pointe díolacháin, lena n-áirítear ar an teileafón agus ar an idirlíon;
• fógra a úsáid bunaithe ar an iarscríbhinn a ghabhann leis an rialachán.

Ní mór d’aeriompróirí AE léiriú i scríbhinn ar theorainn dhliteanais an iompróra le haghaidh na heitilte a thabhairt do gach paisinéir i ndáil leis na nithe seo a leanas:

• bás nó díobháil;
• bagáiste a dhíothú, a chailleadh nó damáiste a dhéanamh dó; agus
• damáiste a tharla de bharr moille.

Is iad na teorainneacha a bhunaítear leis an rialachán seo na teorainneacha thuas ach amháin má chuireann an t-aeriompróir teorainneacha níos airde i bhfeidhm dá dheoin féin. Maidir le hiompar ag aeriompróirí nach aeriompróirí de chuid AE iad, ní bhaineann na ceanglais sin ach le heitiltí chuig AE, amach as nó laistigh de.

Cúiteamh i gcás báis nó díobhála

Níl aon teorainneacha airgeadais leis an dliteanas i leith díobháil nó báis paisinéirí. I gcás damáistí suas le 100 000 CST, ní féidir leis an aeriompróir cur in aghaidh éileamh ar chúiteamh. Os cionn an mhéid sin, féadfaidh an t-aeriompróir é féin a chosaint ar éileamh trína chruthú nach raibh sé faillíoch nó nach raibh locht air ar bhealach eile.

Réamhíocaíochtaí

Má mharaítear nó má ghortaítear paisinéir, ní mór don aeriompróir réamhíocaíocht a dhéanamh, chun riachtanais phráinneacha a chlúdach, laistigh de 15 lá tar éis an duine a shainaithint, faoi na coinníollacha seo a leanas.

• I gcás báis, ní fhéadfaidh an réamhíocaíocht sin a bheith níos lú ná 16 000 CST.
• Ní hionann réamhíocaíocht agus dliteanas a aithint agus is féidir í a fhritháireamh i gcoinne aon suimeanna a íocfar ina dhiaidh sin i leith dliteanas aeriompróirí.
• Ní bheidh sé in-aischurtha mura gcruthóidh an t-iompróir gurb é faillí nó neamhghníomh an duine a bhfuil cúiteamh á éileamh aige ba chúis leis an damáiste nó gur chuidigh sé leis nó léi, nó i gcás nach raibh an duine a fuair an réamhíocaíocht i dteideal an damáiste.

Moilleanna ar phaisinéirí

Má chuirtear moill ar phaisinéir, tá an t-aeriompróir faoi dhliteanas i leith damáiste ach amháin má rinne sé gach beart réasúnta féideartha chun an damáiste a sheachaint. Tá dliteanas teoranta do 4 150 CST.

Moilleanna ar bhagáiste

Má chuirtear moill ar bhagáiste, beidh an t-aeriompróir faoi dhliteanas i leith damáiste ach amháin má rinne sé gach beart réasúnta is féidir chun é a sheachaint. Tá dliteanas teoranta do 1 000 CST.

Bagáiste a dhíothú, a chailleadh nó damáiste a dhéanamh dó

Tá an t-aeriompróir faoi dhliteanas suas le 1 000 CST i leith bagáiste a dhíothú, a chailleadh nó damáiste a dhéanamh dó. Maidir le bagáiste a sheiceáiltear isteach, tá sé faoi dhliteanas fiú mura bhfuil locht air, ach amháin má bhí an bagáiste lochtach. Maidir le bagáiste nach seiceáiltear isteach, níl an t-iompróir faoi dhliteanas ach amháin má tá an locht air.

Teorainneacha níos airde do bhagáiste

Is féidir le paisinéirí tairbhe a bhaint as teorainn níos airde dliteanais trí dhearbhú speisialta a dhéanamh ar a dhéanaí ag an tseiceáil isteach agus trí tháille bhreise a íoc. Ní mór go léireodh an táille na costais bhreise os cionn na gcostas sin a bhaineann le bagáiste a luacháiltear laistigh den teorainn dliteanais. Ní mór an taraif a chur ar fáil ach í a iarraidh.

Gearáin faoi bhagáiste

Má dhéantar damáiste do bhagáiste a sheiceáiltear isteach, má chuirtear moill air, má chailltear é nó má dhíothaítear é, ní mór don phaisinéir gearán a dhéanamh leis an aeriompróir a luaithe is féidir, laistigh de 7 lá i gcás damáiste agus 21 lá i gcás moille tar éis é a fháil.

Ní mór aon chaingean chúirte a thabhairt laistigh de 2 bhliain ón dáta ar tháinig an t-aerárthach i dtír, nó ón dáta a raibh an t-aerárthach le teacht i dtír.