Subha torthaí agus táirgí eile

PRÍOMHPHOINTÍ

Raon feidhme

• Cumhdaítear na táirgí seo a leanas leis an treoir: subh, subh bhreise, glóthach, glóthach bhreise, marmaláid, marmaláid ghlóthaí agus purée castán milsithe.
• Ní chumhdaítear leis an treoir táirgí atá beartaithe chun earraí bácála fíneálta, taosráin nó brioscaí a dhéanamh.
• Ba cheart an treoir a léamh i gcomhar le rialacháin ghaolmhara eile amhail Rialachán (AE) Uimh. 1169/2011 maidir le lipéadú earraí bia.
• Sainítear na táirgí lena mbaineann bunaithe ar a gcomhdhéanamh lena chinntiú go n–úsáidfear na hainmneacha táirge i gceart agus iad á dtrádáil, agus ní ar bhealach a d’fhéadfadh a bheith míthreorach.

Lipéadú

• Forlíontar an t–ainm táirge le tásc an toraidh nó na dtorthaí a úsáidtear, in ord íslitheach bunaithe ar a meáchan. I gcás táirgí a dhéantar as trí thoradh nó níos mó, féadfar na focail “torthaí measctha” nó focail chomhchosúla nó líon na dtorthaí a úsáideadh a chur in ionad thásc na dtorthaí a úsáideadh. Ní mór na sonraí sin a bheith sa réimse amhairc céanna leis an ainm táirge agus i gcarachtair atá le feiceáil go soiléir.
• Ina theannta sin, ní mór faisnéis maidir leis an gcion torthaí in aghaidh an 100 gram den táirge críochnaithe a bheith ar lipéadú na subh, na nglóthach, na marmaláidí agus an purée castán milsithe, i ndiaidh meáchan an uisce a úsáideadh chun na húisc uiscí a ullmhú a dhealú, más iomchuí.
• Le Treoir (AE) 2024/1438 leasaítear Treoir 2001/113/CE chun cead a thabhairt do Bhallstáit AE ina n–úsáideann tomhaltóirí an téarma “marmaláid” mar chomhchiallach ar “subh”, chun úsáid as an téarma “marmaláid” don ainm táirge “subh” maidir le subha ó thorthaí seachas torthaí citris a údarú ar a gcríoch. Cuirfear an téarma “marmaláid citris” in ionad an téarma “marmaláid” a úsáidtear faoi láthair.

Iarscríbhinní a ghabhann leis an treoir

• In Iarscríbhinn I, sainítear gach ceann de na táirgí agus leagtar amach inti freisin na cainníochtaí íosta torthaí a úsáidfear chun 1 chileagram den táirge críochnaithe a dhéanamh. Le Treoir leasaitheach (AE) 2024/1438, tugtar isteach athruithe ar Iarscríbhinn I trí mhéadú a dhéanamh ar an gcion íosta torthaí i subha (ó 350g in aghaidh an kg go 450g in aghaidh an kg) agus i subha breise (ó 450g in aghaidh an kg go 500g in aghaidh an kg).
• Bunaítear in Iarscríbhinn II liosta de chomhábhair breise údaraithe amhail mil, siúcra, sú torthaí agus biotáillí áirithe. Tugtar isteach le Treoir leasaitheach (AE) 2024/1438 roinnt athruithe ar an iarscríbhinn sin a bhaineann le húsáid súnna torthaí agus blátholaí agus breiseán bia atá údaraithe i gcomhréir le Rialachán (CE) 1333/2008.
• Leagtar amach in Iarscríbhinn III sainmhínithe maidir le torthaí, laíon torthaí, purée torthaí, úisc uiscí torthaí agus siúcra, agus conas is féidir amhábhair a chóireáil (triomaithe, téite/fuaraithe/reoite, tiubhaithe nó leasaithe i sáile). Ní féidir ach na comhábhair atá liostaithe in Iarscríbhinn II agus amhábhair a chomhlíonann Iarscríbhinn III a úsáid i ndéanamh na dtáirgí atá sainithe in Iarscríbhinn I.

Tuarascáil

Faoin 14 Meitheamh 2027, ní mór don Choimisiún Eorpach tuarascáil a chur i láthair Pharlaimint na hEorpa agus Chomhairle an Aontais Eorpaigh ina soláthrófar measúnú ar indéantacht na ndeiseanna éagsúla maidir le lipéadú ar a léireofar an tír nó na tíortha tionscnaimh inar baineadh an toradh nó na torthaí a úsáidtear chun subha torthaí, glóthacha torthaí agus marmaláidí citris agus purée castán milsithe a dhéanamh. Ba cheart togra reachtach a bheith ag gabháil leis an tuarascáil, nuair is cuí.