Nósanna imeachta um réamhrialú — moltaí do na cúirteanna náisiúnta
ACHOIMRE AR:
Moltaí do na cúirteanna náisiúnta maidir le húsáid an nós imeachta um réamhrialú
Airteagal 267 den Chonradh ar Fheidhmiú an Aontais Eorpaigh
Airteagal 19 den Chonradh ar an Aontas Eorpach
CAD IS AIDHM LEIS NA MOLTAÍ AGUS LE HAIRTEAGAL 267 DEN CHONRADH AR FHEIDHMIÚ AN AONTAIS EORPAIGH AGUS AIRTEAGAL 19(3) DEN CHONRADH AR AN AONTAS EORPACH?
Maidir le moltaí 2019:
- mínítear leo do chúirteanna agus do bhinsí i mBallstáit an Aontais Eorpaigh (AE) na cuspóirí le nós imeachta lena dtugtar teideal dóibh, faoi Airteagal 267 den Chonradh ar Fheidhmiú an Aontais Eorpaigh agus faoi Airteagal 19(3)(b) den Chonradh ar an Aontas Eorpach Aontais, tarchur a dhéanamh chuig Cúirt Bhreithiúnais an Aontais Eorpaigh (CBAE) i gcomhair réamhrialaithe*;
- leagtar amach leo raon feidhme an nós imeachta agus an fhoirm inar chóir do na cúirteanna náisiúnta a dtarchur a chur isteach;
- forlíontar leo Airteagal 93 go hAirteagal 118 de rialacha nós imeachta CBAE (tá sonraí breise san achoimre);
- cuirtear iad in ionad moltaí a eisíodh roimhe seo in 2018.
PRÍOMHPHOINTÍ
An tábhacht a bhaineann leis an nós imeachta um réamhrialú
Meastar go bhfuil an nós imeachta sin úsáideach nuair atá cás faoi bhráid cúirt náisiúnta, nuair a ardaítear ceist maidir le léirmhíniú nua agus a mbaineann leas ginearálta leis maidir le cur i bhfeidhm dhlí AE ar bhonn aonfhoirmeach, nó i gcás nach cosúil go bhfuil an treoir a theastaíonn le fáil sa chás–dlí atá ann chun déileáil le staid dhlíthiúil nua.
Struchtúr na moltaí
Baineann sraith moltaí le gach iarratas ar réamhrialú agus baineann sraith eile go sonrach le nósanna imeachta brostaithe* nó nósanna imeachta práinneacha*.
Cé a dhéanann an t–iarratas ar réamhrialú?
Is í an chúirt nó an binse náisiúnta amháin a gcuirtear an díospóid faoina mbráid a ghlacann freagracht as cinneadh a dhéanamh maidir leis an ngá atá le hiarratas ar réamhrialú agus maidir le hábharthacht na gceisteanna a chuirtear faoi bhráid CBAE.
Ba cheart do na cúirteanna a chuireann tarchur isteach, i measc nithe eile:
- a bheith bunaithe leis an dlí agus a bheith buan;
- dlínse éigeantach a bheith acu;
- na rialacha dlí a chur i bhfeidhm; agus
- a bheith neamhspleách.
Ábhar agus raon feidhme
- Rud atá tábhachtach, caithfidh léirmhíniú nó bailíocht dhlí AE a bheith i gceist le tarchur. Níor cheart go mbeadh baint aige le léirmhíniú dlí náisiúnta nó saincheisteanna fíricí a ardaíodh sna príomhimeachtaí.
- Ní fhéadfaidh CBAE rialú a thabhairt ach amháin má bhaineann dlí AE leis an gcás sna príomhimeachtaí.
- Ní chuireann CBAE é féin dlí AE féin i bhfeidhm i leith díospóide a thugann cúirt tarchurtha, mar is é a ról cabhrú lena réiteach; is é ról na cúirte náisiúnta teacht ar chonclúidí ó rialú CBAE.
- Tá réamhrialú ceangailteach ar an gcúirt tarchurtha agus ar gach cúirt sna Ballstáit.
Idirghníomhú idir an tagairt do réamhrialú agus na himeachtaí náisiúnta
- Ba cheart tarchur a dhéanamh a luaithe is léir go bhfuil rialú CBAE riachtanach do chúirt náisiúnta d’fhonn breithiúnas a thabhairt agus nuair atá sé in ann mionsonraí leordhóthanacha a thabhairt ar chomhthéacs dlíthiúil agus fíorúil an cháis agus na saincheisteanna dlíthiúla a ardaítear leis.
- Ní mór na himeachtaí náisiúnta a chur ar fiontraí go dtí go dtabharfaidh CBAE a rialú.
- Ní mór don chúirt tarchurtha CBAE a chur ar an eolas faoi aon chéim nós imeachta a d’fhéadfadh dul i gcion ar an tarchur agus, go háirithe, faoi aon scor nó tarraingt siar, nó aon réiteach cairdiúil maidir leis an díospóid sna príomhimeachtaí, agus faoi aon imeacht eile a mbeadh foirceannadh na n–imeachtaí mar thoradh air. Ní mór di freisin CBAE a chur ar an eolas faoi aon chinneadh a tugadh i gcomhthéacs achomhairc i gcoinne an ordaithe le haghaidh tagartha agus faoi iarmhairtí an chinnidh sin ar an iarratas ar réamhrialú.
Foirm agus ábhar an tarchuir
- Ní mór an tarchur a dhréachtú go simplí, go soiléir agus go beacht mar go gcaithfear é a aistriú chun go bhféadfaidh Ballstáit eile a gcuid tuairimí a chur isteach.
- Sonraítear in Airteagal 94 de rialacha nós imeachta CBAE ábhar an iarratais ar cheart é a chur isteach le ceisteanna na cúirte tarchurtha, agus déantar achoimre ar na pointí riachtanacha san iarscríbhinn a ghabhann leis na moltaí. Mura gcomhlíontar ceann amháin nó níos mó de na ceanglais sin, féadfaidh CBAE a chinneadh gur gá dlínse a dhiúltú maidir le réamhrialú a thabhairt ar na ceisteanna a tarchuireadh nó an t–iarratas ar réamhrialú a dhíbhe mar a bheith neamh–inghlactha.
- Féadfaidh an chúirt tagartha príomhargóintí na bpáirtithe sna príomhimeachtaí a leagan amach go hachomair. Ba cheart a thabhairt faoi deara, áfach, nach n–aistreofar ach an t–iarratas ar réamhrialú, agus nach n–aistreofar aon iarscríbhinní a ghabhann leis an iarratas sin.
- Féadfaidh an chúirt tagartha freisin a tuairim a thabhairt go hachomair maidir leis an bhfreagra a thabharfar ar na ceisteanna a tarchuireadh i gcomhair réamhrialaithe. Féadfaidh an fhaisnéis sin a bheith úsáideach do CBAE, go háirithe i gcás ina n–iarrtar uirthi réamhrialú a thabhairt i nós imeachta brostaithe nó práinneach.
- Ní mór na ceisteanna a tharchuirfear chuig CBAE i gcomhair réamhrialaithe a bheith i gcuid ar leith den ordú le haghaidh tagartha agus iad sainaitheanta go soiléir, ag an tús nó ag an deireadh más féidir. Ní mór go mbeifear ábalta iad a thuiscint ar a dtéarmaí féin, gan gá tagairt a dhéanamh don ráiteas ar fhorais an iarratais.
- Caithfidh an t–iarratas ar réamhrialú a bheith clóscríofa agus ní mór na leathanaigh agus na hailt san ord le haghaidh tagartha a uimhriú.
Cosaint sonraí agus anaithnidiú an iarratais ar réamhrialú
- Chun an chosaint is fearr agus féidir le haghaidh sonraí pearsanta agus an cás á láimhseáil ag CBAE a áirithiú, iarrfar ar an gcúirt tarchurtha an cás a anaithnidiú trí ainmneacha na ndaoine aonair dá dtagraítear san iarratas a athrú, mar shampla úsáid a bhaint as túslitreacha nó teaglaim de litreacha, agus trí fhaisnéis lena bhféadfaí iad a aithint a fhágáil ar lár.
Tarchur an iarratais ar réamhrialú chuig CBAE
- Ní mór gach tarchur a bheith dátaithe, sínithe agus iad a sheoladh go leictreonach nó tríd an bpost cláraithe chuig clárlann CBAE i Lucsamburg.
- Molann CBAE go n–úsáidfidh cúirteanna agus binsí náisiúnta an feidhmchlár e-Curia.
- Ní mór don iarratas ar réamhrialú an chlárlann a shroicheadh mar aon leis na doiciméid ábhartha agus doiciméid go léir a bheidh úsáideach le haghaidh láimhseáil an cháis ag CBAE agus, go háirithe, sonraí teagmhála beachta na bpáirtithe sna príomhimeachtaí agus a n–ionadaithe, más ann dóibh, mar aon le comhad an cháis sna príomhimeachtaí nó le cóip de.
Costais agus cúnamh dlíthiúil
- Tá nósanna imeachta um réamhrialú os comhair CBAE saor in aisce.
- Rialaíonn an chúirt tarchurtha na costais a thabhaíonn na páirtithe, nuair is gá.
- Mura bhfuil dóthain acmhainní ag páirtí sna príomhimeachtaí, féadfaidh CBAE cúnamh dlíthiúil a dheonú don pháirtí sin chun na costais a thabhódh sé os comhair CBAE a chlúdach, go háirithe na costais a bhaineann lena ionadaíocht. Ní fhéadfar an cúnamh sin a dheonú, áfach, ach mura bhfuil cúnamh á fháil cheana ag an bpáirtí lena mbaineann faoi rialacha náisiúnta nó a mhéid nach gclúdaítear leis an gcúnamh sin na costais arna dtabhú os comhair CBAE, nó nach gclúdaítear ach i bpáirt iad.
Ról chlárlann CBAE
- Déanann an chlárlann idirchaidreamh leis an gcúirt tarchurtha le linn na n–imeachtaí agus cuireann sé cóip de na cáipéisí agus na hiarrataí faisnéise uile ar fáil dó.
- Ag deireadh na n–imeachtaí, cuireann an chlárlann cinneadh CBAE chuig an gcúirt tagartha. Ba cheart don chúirt tarchurtha an chlárlann a choinneáil ar an eolas faoi aon ghníomh a rinneadh agus faoin gcinneadh deiridh sa chás.
Tarchuir bhrostaithe agus phráinneacha
- Faoi Airteagail 105-114 dá rialacha nós imeachta, féadfaidh CBAE a chinneadh go gcaithfí roinnt tarchur a láimhseáil trí nósanna imeachta brostaithe nó práinneacha.
- Tá na spriocdhátaí níos giorra, mar shampla, d’fhonn deis a thabhairt do na Ballstáit a mbarúlacha a thabhairt i gcás tarchuir bhrostaithe.
- Ní mór don chúirt tarchurtha údar a thabhairt leis an bpráinn, agus aird a dhíriú ar na rioscaí féideartha a bhaineann leis an ngnáthnós imeachta a leanúint.
- Ba cheart iarratais ar nós imeachta brostaithe nó práinneach a sheoladh tríd an bhfeidhmchlár e-Curia nó tríd an ríomhphost.
CÉN UAIR ATÁ TOSACH FEIDHME NA MOLTAÍ?
Tá siad i bhfeidhm ón 8 Samhain 2019.
CÚLRA
Le haghaidh tuilleadh faisnéise, féach:
PRÍOMHTHÉARMAÍ
Réamhrialú. Nós imeachta a úsáidtear i gcásanna ina gceistítear léirmhíniú nó bailíocht dhlí AE, agus:
- i gcás ina bhfuil cinneadh riachtanach do chúirt náisiúnta d’fhonn breithiúnas a thabhairt; nó
- i gcás nach bhfuil aon leigheas breithiúnach ann faoin dlí náisiúnta.
Nós imeachta brostaithe. Nós imeachta i gcás go gcaithfear an cás a láimhseáil go tapa mar gheall ar a chineál agus ar a imthosca eisceachtúla. Ní fhéadfaidh nós imeachta brostaithe a lorg ach i gcás a chruthaíonn imthosca áiritheéigeandáil lena bhfuil údar le rialú tapa CBAE maidir leis na ceisteanna arna dtarchur. D’fhéadfadh sé sin teacht chun cinn, mar shampla, má tá contúirt thromchúiseach agus láithreach ann do shláinte an phobail nó don chomhshaol, a d’fhéadfaí a sheachaint le cinneadh pras ó CBAE, nó má éilítear le himthosca áirithe neamhchinnteachtaí a bhaineann le saincheisteanna bunúsacha an dlí bunreachtúil náisiúnta agus dhlí AE a réiteach laistigh d’achar an–ghearr.
Nós imeachta práinneach. Nós imeachta nach bhfuil feidhm aige ach maidir le cásanna a bhaineann le ceisteanna maidir le saoirse, slándáil agus ceartas. Go sonrach, cuirtear teorainn le líon na bpáirtithe atá údaraithe chun barúlacha scríofa a thíolacadh agus éascaítear leis, i gcásanna fíorphráinne, go bhfágfaí an chéim scríofa den nós imeachta ar lár roimh CBAE.
PRÍOMHDHOICIMÉID
Moltaí chuig cúirteanna agus binsí náisiúnta maidir le nósanna imeachta um réamhrialú a thionscnamh (IO C 439, 25.11.2016, lgh. 1-8).
Leagan comhdhlúite den Chonradh ar Fheidhmiú an Aontais Eorpaigh — Cuid a Sé - Forálacha institiúideacha agus airgeadais — Teideal I — Forálacha institiúideacha — Caibidil 1 — Na hinstitiúidí — Roinn 5 — Cúirt Bhreithiúnais an Aontais Eorpaigh — Airteagal 267 (iar-Airteagal 234 CCE) (IO C 202, 7.6.2016, lch. 164).
Leagan comhdhlúite den Chonradh ar an Aontas Eorpach — Teideal III — Forálacha maidir leis na hinstitiúidí — Airteagal 19 (IO C 202, 7.6.2016, lch. 27).
DOICIMÉID GHAOLMHARA
Rialacha Nósanna Imeachta na Cúirte Breithiúnais (IO L 265, 29.9.2012, lgh. 1-42).
Leasú ar Rialacha Nós Imeachta na Cúirte Breithiúnais (IO L 173, 26.6.2013, lch. 65).
Nuashonraithe 26.04.2022