Baic ar thrádáil – an Sásra Mear–idirghabhála

PRÍOMHPHOINTÍ

• Sonraítear i Rialachán (CE) 2679/98, arna leasú le Rialachán (AE) 2024/2747, nár cheart go ndéanfaí difear d’fheidhmiú ceart bunúsach, mar a aithnítear sna Ballstáit agus ar leibhéal an Aontais, lena n–áirítear ceart oibrithe agus fostóirí chun comhaontuithe comhchoiteanna a chaibidliú agus a chur i gcrích agus, i gcás coinbhleachtaí leasa, beart comhchoiteann a dhéanamh chun a leasanna a chosaint.
• Nuair a tharlaíonn bac fisiceach ar thrádáil, nó go bhfuil bagairt ann go dtarlóidh sé, ní mór do Bhallstát ar bith a bhfuil faisnéis ábhartha aige í a aistriú láithreach chuig an gCoimisiún Eorpach. Cuireann an Coimisiún an fhaisnéis sin ar aghaidh láithreach chuig gach Ballstát mar aon le faisnéis eile a mheasann sé a bheith ábhartha.
• Ní mór don Bhallstát ina bhfuil an bac ag tarlú freagairt go pras ar iarratais ar fhaisnéis ón gCoimisiún agus ó Bhallstáit eile maidir leis an gcineál baic agus an beart atá déanta aige nó atá beartaithe aige a dhéanamh. Ní mór an fhaisnéis uile a mhalartaítear idir na Ballstáit a tharchur chuig an gCoimisiún chomh maith.
• Nuair a tharlaíonn bac, ní mór don Bhallstát ábhartha na bearta riachtanacha agus comhréireacha uile a dhéanamh ionas go n–atosófar an tsaorghluaiseacht earraí, agus an beart atá déanta aige a chur in iúl don Choimisiún ansin.
• Nuair a chinneann an Coimisiún go bhfuil bac ag tarlú, cuireann sé Ballstát ábhartha ar an eolas faoi na cúiseanna lenar tháinig sé ar an gconclúid sin agus iarrann sé ar an mBallstát na bearta riachtanacha agus comhréireacha uile a dhéanamh chun an bac sin a thógáil. Beidh cúig lá ag an mBallstát ansin leis na bearta atá déanta aige nó atá beartaithe a dhéanamh aige, a chur in iúl don Choimisiúin, nó freagra réasúnta a thabhairt faoin gcúis nach bhfuil gá le bearta a dhéanamh.
• Féadfar na Ballstáit nach dtugann freagairt faoin spriocdháta a thug an Coimisiún a chur ar aghaidh chuig Cúirt Bhreithiúnais an Aontais Eorpaigh.
• Chomh maith leis na rialacha thuasluaite a leasú i ndáil le cearta bunúsacha a urramú, cuirtear airteagal nua (5A) leis le Rialachán (AE) 2024/2747. Sonraítear san airteagal sin, i gcás ina ndearnadh modh éigeandála an mhargaidh inmheánaigh a ghníomhachtú, maidir le hAirteagail 3 go 5 de Rialachán (CE) Uimh. 2679/98, lena ndéantar foráil maidir le sásra le haghaidh plé déthaobhach agus fógra faoi na baic ar fheidhmiú an mhargaidh inmheánaigh, nach mbeidh feidhm acu a thuilleadh maidir leis na hearraí atá ainmnithe mar earraí atá ábhartha i gcás géarchéime ar feadh thréimhse mhód éigeandála an mhargaidh inmheánaigh.