Táirgí lochtacha – dliteanas

PRÍOMHPHOINTÍ

Leis an treoir nua, déantar na rialacha reatha maidir le dliteanas a oiriúnú do na réimsí seo a leanas.

• An geilleagar digiteach. Rinneadh an sainmhíniú ar “tháirge” a shoiléiriú chun bogearraí a chumhdach, córais intleachta saorga (IS) san áireamh:
  • tá gach cineál bogearraí, lena n–áirítear feidhmchláir agus córais IS, cumhdaithe faoin treoir nua;
  • tá an monaróir faoi dhliteanas maidir le lochtanna a d’fhéadfadh tarlú i ndiaidh nuashonrú nó uasghrádú a dhéanamh ar na bogearraí atá faoina rialú;
  • tá an monaróir faoi dhliteanas i leith lochtanna a d’fhéadfadh tarlú trí fhoghlaim leanúnach an chórais IS i gcás ina bhfuil an córas IS á rialú fós ag an monaróir;
  • tá seirbhísí digiteacha atá riachtanach chun an táirge a fheidhmiú agus a corpraíodh sa táirge faoi rialú an mhonaróra cumhdaithe faoin treoir.
• Slabhraí luacha domhanda. Áirithítear leis an treoir go bhfuil duine faoi dhliteanas i gcónaí san Aontais ar féidir leis an íospartach cúiteamh a éileamh ina choinne nó ina coinne nuair a bhunaítear monaróir lasmuigh den Aontas Eorpach:
  • féadfar allmhaireoirí agus ionadaithe údaraithe a chur faoi dhliteanas i leith damáistí de bharr an táirge lochtaigh;
  • mura bhfuil allmhaireoir nó ionadaí údaraithe ann, féadfar soláthraithe seirbhíse próiseála orduithe a chur faoi dhliteanas i leith an táirge lochtaigh;
  • is féidir ardáin ar líne a ghníomhaíonn mar mhonaróir, allmhaireoir, ionadaí údaraithe, soláthraí seirbhíse próiseála orduithe nó dáileoir a chur faoi dhliteanas i leith táirge lochtach a dhíoltar ar a n–ardán díreach cosúil le haon oibreoir eacnamaíoch eile;
  • is féidir ardáin ar líne nach ngníomhaíonn ach mar idirghabhálaí don táirge lochtach a chur faoi dhliteanas fós faoi choinníollacha áirithe.
• An geilleagar ciorclach. Beidh cuideachta nó duine a dhéanann athrú suntasach ar tháirge lasmuigh de rialú an mhonaróra bunaidh ina m(h)onaróir ar an táirge agus féadfar é/í a chur faoi dhliteanas i leith locht ar bith.

Baineann na príomhghnéithe seo a leanas leis an treoir chomh maith.

• Lochtacht. Meastar go bhfuil táirge lochtach mura soláthraítear leis an tsábháilteacht atá duine i dteideal a bheith ag súil léi nó a theastaíonn faoi dhlí an Aontais nó faoin dlí náisiúnta. I measc imthosca eile, bheadh an méid seo a leanas i gceist le measúnú ar an lochtacht:
  • cur i láthair agus saintréithe an táirge, lena n–áirítear a lipéadú;
  • an éifeacht ar an táirge mar gheall ar aon chumas leanúint ar aghaidh ag foghlaim nó ag fáil gnéithe nua;
  • an éifeacht is intuartha le réasún ar an táirge nó ar tháirge eile ar féidir a mheas go mbainfear úsáid astu in éineacht leis an táirge.
• Damáiste. Tá an ceart chun cúitimh ann nuair a rinneadh ceann de na cineálacha damáiste seo a leanas mar gheall ar an táirge lochtach:
  • bás nó díobháil phearsanta (lena n–áirítear damáiste do shláinte shíceolaíoch a aithnítear ó thaobh leighis.
  • damáiste do mhaoin;
  • scriosadh nó éilliú sonraí nár úsáideadh chun críocha gairmiúla.
• Rochtain ar fhianaise. Bunaítear leis an treoir ceart don dá pháirtí chun rochtain a iarraidh ar fhianaise atá riachtanach chun tacú lena n–éilimh.
• Dliteanas agus cúiteamh.
  • Is féidir le duine ar bith a ndearnadh damáiste dóibh de bharr táirge lochtach éileamh a thabhairt os comhair cúirt náisiúnta.
  • Beidh gnólachtaí fós faoi dhliteanas as a dtáirgí mídhleathacha ar feadh tréimhse 10 mbliana i ndiaidh an táirge a chur ar an margadh.
  • Cuirtear síneadh leis an teorainn 10 mbliana go dtí 25 bliana i gcás go mbíonn na díobhálacha pearsanta mall ag teacht chun cinn (díobhálacha sláinte folaithe).
  • Beidh trí bliana ag na híospartaigh chun éileamh ar chúiteamh a thabhairt os comhair cúirt náisiúnta.