An Gníomh Eorpach um Shaoirse na Meán

PRÍOMHPHOINTÍ

I measc nithe eile, déantar an méid seo a leanas leis an nGníomh Eorpach um Shaoirse na Meán:

• cosnaítear saoirse na meán agus neamhspleáchas eagarthóireachta trína cheangal ar Bhallstáit AE saoirse eagarthóireachta éifeachtach sholáthraithe seirbhíse na meán a urramú;
• cosnaítear foinsí iriseoireachta agus cumarsáid rúnda, lena n–áirítear maidir le bagairtí ar iriseoirí nó úsáid neamhdhlisteanach earraí spiaireachta;
• áirithítear feidhmiú neamhspleách na meán seirbhíse poiblí, lena n–áirítear trí dhearbhuithe a sholáthar maidir lena gcuid acmhainní airgeadais agus na rialacha maidir le ceapadh agus dífhostú cinn agus/nó ball de bhoird bhainistíochta na meán seirbhíse poiblí;
• áirithítear trédhearcacht úinéireacht na meán trí oibleagáidí um nochtadh do sholáthraithe seirbhíse na meán maidir le faisnéis shonrach (e.g. ainmneacha dlíthiúla, sonraí teagmhála, úinéireacht);
• soláthraítear cosaintí ar bhaint gan údar ag ardáin mhóra ar líne (atá ainmnithe faoin nGníomh um Sheirbhísí Digiteacha) ábhar na meán a chuirtear ar fáil de réir caighdeáin ghairmiúla ach a mheastar a bheith neamh–chomhoiriúnach le téarmaí agus coinníollacha;
• tugtar isteach an ceart chun oiriúnú tairiscintí meán maidir le feistí agus comhéadain, amhail teilifíseáin nasctha, lenar féidir le húsáideoirí na socruithe réamhshocraithe a athrú chun teacht lena roghanna féin;
• áirithítear go soláthróidh na Ballstáit measúnú ar thionchar na bpríomh–chomhchruinnithe i margadh na meán maidir le hiolrachas sna meáin agus maidir le neamhspleáchas eagarthóireachta;
• áirithítear trédhearcacht maidir le tomhas pobail meáin do sholáthraithe seirbhíse na meán agus d’fhógróirí na meán.
• bunaítear ceanglais trédhearcachta maidir le leithdháileadh na fógraíochta stáit ar sholáthraithe seirbhíse na meán agus ar ardáin ar líne ag údaráis phoiblí agus ag eintitis;
• déantar comhar agus comhordú idir rialtóirí na meán a threisiú agus a leathnú, lena n–áirítear bearta a bhaineann le seirbhísí na meán ó lasmuigh den Aontas Eorpach;
• éascaítear idirphlé struchtúrtha idir ardáin an–mhór ar líne, soláthraithe seirbhíse na meán agus an tsochaí shibhialta.

Tugtar isteach leis an rialachán leasú spriocdhírithe ar Threoir 2010/13/AE tríd an mBord Eorpach um Sheirbhísí Meán a chur in ionad Ghrúpa na Rialálaithe Eorpacha um Sheirbhísí Meán Closamhairc. Is comhlacht comhairleach neamhspleách é sin ina bhfuil ionadaithe ó údaráis nó ó chomhlachtaí meán náisiúnta agus a fhaigheann cúnamh ó rúnaíocht de chuid an Choimisiúin Eorpaigh, rud a chuirfidh cur i bhfeidhm éifeachtach agus comhsheasmhach chreat um dhlí meán an Aontais chun cinn.