Treoirlínte maidir le Státchabhair do líonraí leathanbhanda

ACHOIMRE AR:

Teachtaireacht — Treoirlínte maidir le Státchabhair do líonraí leathanbhanda

CAD IS AIDHM LEIS NA TREOIRLÍNTE?

Soláthraítear leo treoir maidir leis an dóigh a gcuirfidh an Coimisiún Eorpach rialacha maidir le Státchabhair an Aontais Eorpaigh (AE) i bhfeidhm agus measúnú á dhéanamh ar an gcabhair a sholáthraíonn Ballstáit AE chun tacú le húsáid agus le glacadh líonraí leathanbhanda.

Tá na rialacha sin leagtha amach in Airteagal 107 (2)(a) agus (3)(c) den Chonradh ar Fheidhmiú an Aontais Eorpaigh.

PRÍOMHPHOINTÍ

Déantar idirdhealú sna treoirlínte idir coinníollacha sonracha oiriúnachta, agus cuirtear na coinníollacha sin i bhfeidhm leo agus cabhair á measúnú maidir le:

• líonraí rochtana seasta;
• líonraí rochtana móibíleacha; agus
• líonraí aisiompair (atá riachtanach do líonraí seasta agus móibíleacha araon).

Breithníonn an Coimisiún an méid seo a leanas agus measúnuithe oiriúnachta á ndéanamh aige faoi Airteagal 107(3)(c).

• Rannchuidiú le forbairt eacnamaíoch gníomhaíochtaí nó réimsí áirithe, go háirithe:
  • an ghníomhaíocht eacnamaíoch arna sainaithint ag an mBallstát;
  • éifeacht dreasachta — ní mór don tairbhí rud éigin a dhéanamh nach ndéanfadh sé murab sin;
  • meas ar dhlí an Aontais — ní mór don bheart cloí le reachtaíocht AE.
• Cothromaíocht idir éifeacht dhearfach agus dhiúltach na cabhrach ar an margadh inmheánach, go háirithe, cé acu an bhfuil an chabhair:
  • dearfach, i.e. cuireann sí le laghdú a dhéanamh ar an deighilt dhigiteach nó ar neamhionannais shóisialta nó réigiúnacha, agus rioscaí maidir le hinfheistíocht phríobháideach a bhrú amach á dteorannú;
  • ag teastáil, i.e. beidh sochair shoiléire mar thoradh uirthi nó leigheastar cliseadh margaidh léi, rud a shainaithnítear trí chomhairliúchán poiblí agus trí mhapáil a dhéanamh ar limistéir spriocdhírithe i limistéir ina bhfuil easpa infheistíocht phríobháideach, amhail limistéir iargúlta nó limistéir ina bhfuil dlús fíoríseal daonra (tugtar mionsonraí in Iarscríbhinn I ar na dea–chleachtais);
  • oiriúnach, i.e. tá sí níos oiriúnaí ná bearta riaracháin nó rialála, agus áirithítear léi feabhas suntasach i gcomparáid leis an gcás atá ann cheana;
  • comhréireach agus teoranta don íosmhéid riachtanach, i.e. ní fhéadfaí an t–athrú céanna ar iompraíocht a bhaint amach le níos lú cabhrach agus níos lú saofa, deonaítear an chabhair trí nós imeachta roghnúcháin iomaíoch, áirithítear léi neodracht theicneolaíoch, baineann sí leas as an mbonneagar atá ann cheana féin, cothaítear iomaíocht léi trí choinníollacha rochtana mórdhíola, déantar foráil léi i leith sásraí leordhóthanacha aisghlámtha, agus áirithítear léi deighilt chuntasaíochta;
  • trédhearcach, i.e. is féidir leis na Ballstáit, leis na páirtithe leasmhara, leis an bpobal agus leis an gCoimisiún a sonraí a rochtain.

Maidir leis na Ballstáit:

• spreagtar iad chun páirt a thabhairt d’údaráis náisiúnta rialála i ndearadh, cur chun feidhme agus faireachán na mbeart;
• ní mór dóibh dul i gcomhairle leis na húdaráis rialála náisiúnta maidir le táirgí, coinníollacha agus praghsáil rochtana mórdhíola, agus maidir le bonneagair atá ann cheana;
• féadfaidh siad dul i gcomhairle le húdaráis iomaíochta náisiúnta;
• féadfaidh siad lárionaid a chur ar bun amhail oifigí inniúlachta leathanbhanda chun cuidiú le húdaráis phoiblí tacaíocht stáit a dhearadh do líonraí leathanbhanda.

Ceanglaítear le rialacha trédhearcachta ar na Ballstáit an méid seo a leanas a dhéanamh:

• foilsiú ar shuíomh gréasáin dámhachtana trédhearcachta an Choimisiúin nó ar a suíomhanna gréasáin náisiúnta nó réigiúnacha:
  • téacs iomlán chinneadh na scéime cabhrach,
  • sonraí maidir le gach dámhachtain aonair os cionn €100,000 (Iarscríbhinn II);
• rochtain éasca ar fhaisnéis maidir lena suíomhanna gréasáin cuimsitheacha um Státchabhair a áirithiú agus í a chur ar fáil ar feadh 10 mbliana ar a laghad;
• tuarascálacha a chur faoi bhráid an Choimisiúin gach bliain maidir le gach beart cabhrach a fhormheasfaidh siad agus gach dhá bhliain maidir lena bpríomhghnéithe (Iarscríbhinn III).

Ceanglaítear leis na rialacha trédhearcachta ar an gCoimisiún foilsiú ar a naisc suímh gréasáin le bearta náisiúnta agus réigiúnacha.

Liostaítear in Iarscríbhinn IV ceithre shamhail thipiciúla infheistíochta: maoiniú bearnaí, tacaíocht chomhchineáil, infheistíocht dhíreach agus lamháltóir.

Féadfaidh an Coimisiún a cheangal ar eolaí neamhspleách measúnú a dhéanamh ar scéimeanna cabhrach i ndiaidh a gcur chun feidhme lena áirithiú nach mbaineann iomaíocht ná trádáil saofa leo. Tá meastóireachtaí éigeantach do scéimeanna lena bhfuil saintréithe nua nó lena mbaineann cabhair os cionn €150 milliún in 1 bhliain nó €750 milliún ar an iomlán.

Tagann na treoirlínte in ionad na dtreoirlínte ó 2013 i leith (féach an achoimre).

CÉN UAIR ATÁ TOSACH FEIDHME NA DTREOIRLÍNTE?

Tá siad i bhfeidhm ón 1 Feabhra 2023.

CÚLRA

Tá an nascacht ina bloc bunúsach tógála don aistriú digiteach. Tá sí ríthábhachtach don fhás eacnamaíoch, don nuálaíocht agus don chomhtháthú sóisialta agus críochach.

Cuireann na rialacha nua le cuspóirí straitéiseacha an Aontais Eorpaigh (AE) maidir le nascacht ghigighiotán a áirithiú do chách agus cumhdach 5G gach áit san Aontas Eorpach a áirithiú faoi dheireadh na deich mbliana seo. Chun é sin a bhaint amach, tá gá le hinfheistíocht, infheistíocht phríobháideach den chuid is mó. Is féidir é sin a chomhlánú le cistí poiblí.

Léirítear sna rialacha na tosaíochtaí atá leagtha amach sa teachtaireacht maidir leis an tsochaí ghigighiotáin, sa teachtaireacht maidir le todhchaí dhigiteach na hEorpa a mhúnlú, sa teachtaireacht maidir leis an gcompas digiteach agus sa chlár beartais 2030 don deacáid dhigiteach (féach an achoimre).

Ionas nach ndéanfar trádáil nó an margadh inmheánach a shaobhadh leis an Státchabhair, cuirtear cosc uirthi le hAirteagal 107(1). Déantar foráil i leith eisceachtaí in Airteagal 107(2) agus in Airteagal (3) agus sa rialachán ginearálta maidir le blocdhíolúine (Rialachán (AE) Uimh. 651/2014 — féach an achoimre).

Le haghaidh tuilleadh faisnéise, féach:

• Státchabhair: Glacann an Coimisiún rialacha leasaithe maidir le Státchabhair do líonraí leathanbhanda — preaseisiúint (An Coimisiún Eorpach).

PRÍOMHDHOICIMÉAD

Teachtaireacht ón gCoimisiún — Treoirlínte maidir le Státchabhair do líonraí leathanbhanda (IO C 36, 31.1.2023, lgh. 1–42).

DOICIMÉID GHAOLMHARA

Cinneadh (AE) 2022/2481 ó Pharlaimint na hEorpa agus ón gComhairle an 14 Nollaig 2022 lena mbunaítear Clár Beartais na Deacáide Digití 2030 (IO L 323, 19.12.2022, lgh. 4–26).

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún — Compás Digiteach 2030: an modh Eorpach i dtreo na Deacáide Digití (COM(2021) 118 final, 9.3.2021).

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún — Todhchaí dhigiteach na hEorpa a mhúnlú (COM(2020) 67 final, 19.2.2020).

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún — Nascacht i gcomhair Margadh Aonair Digiteach atá Iomaíoch — I dTreo Sochaí Ghigighiotáin Eorpach (COM(2016) 587 final, 14.9.2016).

Leagan comhdhlúite den Chonradh ar Fheidhmiú an Aontais Eorpaigh — Cuid a Trí — Beartais agus gníomhaíochtaí inmheánacha an Aontais — Teideal VII — Rialacha comhchoiteanna maidir le hiomaíocht, le cánachas agus le comhfhogasú dlíthe — Caibidil 1 — Rialacha iomaíochta — Alt 1 — Rialacha a bhaineann le gnóthais — Airteagal 106 (sean–Airteagal 86 CCF) (IO C 202, 7.6.2016, lgh. 90–91).

Leagan comhdhlúite den Chonradh ar Fheidhmiú an Aontais Eorpaigh — Cuid a Trí — Beartais an Aontais agus gníomhaíochtaí inmheánacha — Teideal VII — Comhrialacha maidir le hiomaíocht, cánachas agus comhfhogasú dlíthe — Caibidil 1 — Rialacha iomaíochta — Roinn 2 — Cabhair arna ndeonú ag Stáit — Airteagal 107 (sean-Airteagal 87 CCE) (IO C 202, 7.6.2016, lgh. 91–92).

Rialachán (AE) Uimh. 651/2014 an 17 Meitheamh 2014 lena sonraítear catagóirí áirithe cabhrach atá comhoiriúnach leis an margadh inmheánach agus Airteagal 107 agus Airteagal 108 den Chonradh á gcur i bhfeidhm (IO L 187, 26.6.2014, lgh. 1–78).

Rinneadh leasuithe comhleanúnacha ar Rialachán (AE) Uimh. 651/2014 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Nuashonraithe 15.03.2023