Deiseanna iascaireachta sa Mheánmhuir agus sa Mhuir Dhubh (2022)

PRÍOMHPHOINTÍ

Raon feidhme

Tá feidhm ag an rialachán maidir le soithí iascaireachta an Aontais Eorpaigh (AE) a oibríonn sa Mheánmhuir agus sa Mhuir Dhubh agus a shaothraíonn na stoic seo a leanas:

• an eascann, an coiréalach dearg agus an dorád coiteann sa Mheánmhuir;
• an séacla gorm agus dearg, an rós–séacla domhainmhara, an séacla mór dearg, an colmóir Eorpach, gliomach na hIorua agus an milléad dearg sa Mheánmhuir Thiar;
• an t–ainseabhaí, an sairdín, an colmóir Eorpach, gliomach na hIorua, an sól coiteann, an rós–séacla domhainmhara agus an milléad dearg i Muir Aidriad;
• an séacla mór dearg agus an séacla gorm agus dearg i gCaolas na Sicile, sa Mhuir Iónach agus i Muir na Leiveainte;
• an deargán i Muir Alboran;
• an salán agus an turbard sa Mhuir Dhubh.

Tá feidhm aige chomh maith maidir le hiascaigh áineasa¹ i gcás go dtagraítear dóibh go sainráite sa rialachán.

Áirítear iad seo a leanas ar na deiseanna iascaireachta a chumhdaítear sa rialachán:

• teorainneacha gabhálacha le haghaidh na bliana 2022;
• teorainneacha iarrachta iascaireachta le haghaidh na bliana 2022.

Gabhálacha iomlána incheadaithe

Cinneann Ballstáit AE go bliantúil na gabhálacha iomlána incheadaithe (TACanna), a leagtar amach sna hiarscríbhinní, ar bhonn tograí ón gCoimisiún Eorpach.

• Is ionann TACanna agus uasmhéid na n–iasc de speicis dhifriúla is féidir a ghabháil le linn na bliana faoi seach.
• Leanann na teorainneacha atá leagtha síos an prionsabal a bhaineann le saothrú inbhuanaithe na stoc éagsúil i gcomhréir leis an uastáirgeacht inbhuanaithe².
• Tá na TACanna bunaithe ar an gcomhairle eolaíoch is fearr atá ar fáil, ag cur san áireamh gnéithe bitheolaíochta agus socheacnamaíocha agus cóir chothrom á háirithiú idir na hearnálacha iascaireachta.
• Roinntear an TAC do gach speiceas ar leithligh ina chuótaí — cionta den TAC a shanntar don Aontas Eorpach, dá Bhallstáit nó do thíortha nach tíortha den Aontas Eorpach iad.
• Tá na teorainneacha gabhálacha agus iarrachta i gcomhréir leo seo a leanas:
  • an plean bainistíochta ilbhliantúil maidir le stoic ghrinnill³ sa Mheánmhuir thiar, a glacadh faoi Rialachán (AE) 2019/1022 (féach an achoimre) agus
  • cinntí an Choimisiúin Iascaigh Ghinearálta don Mheánmhuir (GFCM) maidir leis an eascann, an coiréalach dearg, an dorád, speiceas beag peiligeach agus stoic ghrinnill i Muir Aidriad, an séacla mór dearg agus stoic séaclaí gorma agus dearga sa Mhuir Iónach, i Muir na Leiveainte agus i gCaolas na Sicile, agus plean bainistíochta ilbhliantúil GFCM maidir leis an turbard don Mhuir Dhubh.