Astaíochtaí de chomhdhúile soghalaithe orgánacha i bpéinteanna, vearnaisí agus táirgí ath-bhailchríochnaithe feithicle

PRÍOMHPHOINTÍ

Sainítear sa treoir na sonraíochtaí teicniúla le haghaidh péinteanna agus vearnaisí áirithe (seachas aerasóil) agus táirgí ath–bhailchríochnaithe feithiclí. Is brait iad go príomha a chuirtear ar fhoirgnimh nó ar fheithiclí. Tá na táirgí seo liostaithe i bhfochatagóirí in Iarscríbhinn I den treoir.

Déantar Rialachán (CE) Uimh. 1272/2008 a chomhlánú leis an treoir seo maidir le lipéadú substaintí agus ullmhóidí ceimiceacha agus cuirtear an fhreagracht ar thíortha AE as a áirithiú nach mbeidh na táirgí lena mbaineann ar díol ach amháin i gcás nach sáraíonn an t–ábhar COS a bhaineann leo na teorainneacha atá leagtha amach in Iarscríbhinn II den treoir (idir 30 agus 750 gram/lítear (g/l) le haghaidh péinteanna agus vearnaisí) agus go gcomhlíonann siad na ceanglais lipéadaithe. Ní mór an méid seo a leanas a bheith léirithe ar an lipéad:

• fochatagóir an táirge agus na teorainnluachanna COS ábhartha in g/l;
• ábhar uasta COS in g/l an táirge i riocht atá réidh le húsáid.

Liostaítear in Iarscríbhinn II den treoir freisin uas-teorainnluachanna ábhair COS le haghaidh táirgí ath–bhailchríochnaithe feithiclí. Déanfaidh an Coimisiún Eorpach an liosta seo a oiriúnú chun dul chun cinn teicniúil a chur san áireamh.

Ní mór do thíortha AE torthaí an chláir mhonatóireachta a thuairisciú chun a léiriú go bhfuil an treoir agus na catagóirí agus na cainníochtaí táirgí atá ceadúnaithe á gcomhlíonadh. Ní mór é a thuairisciú don Choimisiún gach 5 bliana. Ní mór do thíortha cead a thabhairt do shaorchúrsaíocht na dtáirgí sin a chomhlíonann ceanglais na treorach ina riocht réidh le húsáid. Ní mór dóibh freisin pionóis a leagan síos maidir le rialacha náisiúnta a glacadh i gcomhréir leis an treoir a shárú agus a áirithiú go gcuirfear i bhfeidhm iad.

Chuir an Coimisiún an tuarascáil seo faoi bhráid Pharlaimint na hEorpa agus na Comhairle, inar scrúdaíodh:

• an acmhainn leathan chun laghduithe a dhéanamh ar ábhar táirgí COS lasmuigh de raon feidhme na treorach, lena n–áirítear aerasóil do phéinteanna agus do vearnaisí;
• an fhéidearthacht go bhféadfaí, sa dara céim, laghdú breise a dhéanamh ar ábhar COS i dtáirgí ath–bhailchríochnaithe feithiclí;
• aon ghné nua de thionchar socheacnamaíoch an dara céime mar a bhí beartaithe do phéinteanna agus do vearnaisí.

Ina theannta sin, chuir an Coimisiún tuarascáil isteach inar cuireadh san áireamh forbairtí teicneolaíochta i monarú péinteanna, vearnaisí agus táirgí ath–bhailchríochnaithe feithiclí. Sa tuarascáil sin scrúdaítear an raon leathan agus an acmhainn atá ann chun laghduithe breise a dhéanamh ar ábhar COS i dtáirgí atá faoi raon feidhme na treorach, lena n–áirítear an t–idirdhealú féideartha idir péinteanna a úsáidtear don taobh istigh agus don taobh amuigh.

Leasaíodh sa Treoir um Péinteanna an Treoir um Astaíochtaí Tuaslagóirí COS roimhe seo (Treoir 1999/13/CE a aisghaireadh ó shin faoi 2010/75/AE, an Treoir maidir le hAstaíochtaí Tionsclaíocha) lenar baineadh an fhoghníomhaíocht maidir le “hAth–bhailchríochnú Feithiclí” (péinteáil feithiclí bóthair a dhéantar mar chuid de dheisiú, de chaomhnú nó de mhaisiú feithicle ar shiúl ó shuiteálacha déantúsaíochta) dá raon feidhme. Tagann an ghníomhaíocht sin faoi raon feidhme na Treorach um Péinteanna anois.

Mar eisceacht (“maolú”), níl gá le comhlíonadh den sórt sin le haghaidh péinteanna, vearnaisí agus táirgí ath–bhailchríochnaithe feithiclí atá le húsáid:

• maidir le gníomhaíochtaí atá liostaithe in Iarscríbhinn VII (Cuid I) a ghabhann le Treoir 2010/75/AE agus a rialaítear i gcomhréir lena Caibidil V, nó
• chun foirgnimh agus feithiclí seanré a bhfuil luach stairiúil agus cultúrtha ag baint leo a athchóiriú agus a chothabháil.

Le Rialachán (AE) 2019/1020 maidir le straitéis náisiúnta um fhaireachas margaidh, déanfar na ceanglais faireacháin agus tuairiscithe a aisghairm agus cuirfear an Rialachán sin ina n–ionad ón 16 Iúil 2021.