Íocaíochtaí neamhairgid — calaois agus góchumadh a chomhrac

PRÍOMHPHOINTÍ

Bunaítear leis an treoir na cionta coiriúla seo a leanas nuair a dhéantar iad d’aon ghnó:

• úsáid chalaoiseach as ionstraim íocaíochta neamhairgid¹ a goideadh nó a brionnaíodh;
• gadaíocht, brionnú, agus seilbh nó fáil neamhdhleathach (lena n-áirítear díol) d’fhoirmeacha fisiceacha íocaíochta, amhail cártaí íocaíochta (“ionstraimí íocaíochta corpracha neamhairgid”);
• fáil neamhdhleathach, brionnú, agus seilbh nó fáil neamhdhleathach (lena n-áirítear díol) d’fhoirmeacha digiteacha íocaíochta, amhail íocaíochtaí móibíleacha, sparáin leictreonacha agus airgeadraí fíorúla (“ionstraimí íocaíochta neamhchorpracha neamhairgid”);
• haiceáil isteach i gcórais faisnéis nó sonraí ríomhaireachta a chúbláil chun airgead duine a aistriú go neamhdhleathach;
• cionta ar bith de na cionta thuas a ghríosú nó cabhrú nó neartú leo.

Bunaítear leis an treoir chomh maith na coinníollacha do dhaoine dlítheanacha (eintiteas ag a bhfuil pearsantacht dhlíthiúil) a bheidh faoi dhliteanas i leith cionta agus déantar na pionóis do dhaoine aonair agus do dhaoine dlítheanacha a neasú léi chomh maith.

Ní mór do thíortha AE:

• a áirithiú go mbeidh acmhainní dóthanacha ag imscrúdaitheoirí agus ionchúisitheoirí cionta tromchúiseacha agus cionta eagraithe;
• pointe náisiúnta teagmhála a fheidhmítear 24/7 a bhunú chun faisnéis a mhalartú maidir le cionta agus an Coimisiún Eorpach, Europol agus Eurojust a chur ar an eolas gurb ann dó;
• nósanna imeachta bheith i bhfeidhm acu chun freagra a thabhairt ar iarratais phráinneacha ar chúnamh faoi cheann ocht n uair an chloig;
• a éascú gur féidir cionta a thuairisciú go tapa d’údaráis náisiúnta forfheidhmithe dlí agus d’údaráis náisiúnta inniúla eile;
• institiúidí airgeadais agus daoine dlítheanacha eile a spreagadh chun calaois amhrasta a thuairisciú;
• sonraí staidrimh i ndíth ainm a thaifeadadh, a sholáthar agus a chur ar fail maidir le céimeanna tuairiscithe, imscrúdaitheacha agus breithiúnacha na gcionta éagsúla agus iad sin a sheoladh ar bhonn bliantúil chuig an gCoimisiún.

Tugtar isteach leis an treoir cúnamh agus tacaíocht d’íospartaigh — daoine aonair agus daoine dlítheanacha araon — na calaoise sonraí pearsanta. Spreagtar tíortha AE léi le hionaid náisiúnta faisnéise ar líne aonair a chur ar bhun d’íospartaigh na calaoise. Iarrtar orthu go sonrach léi:

• faisnéis agus comhairle a chur ar fáil maidir le conas cosaint a thabhairt ar thoradh diúltach agus ar dhamáiste do chlú;
• sonraí a sholáthar maidir le heagraíochtaí a phléann le coireacht a bhaineann le haitheantas agus tacaíocht d’íospartaigh;
• faisnéis a sholáthar gan mhoill mhíchuí i ndiaidh an chéad teagmhála leis an údarás ábhartha maidir leis an dóigh le:
  • gearán a dhéanamh maidir leis an gcion;
  • faisnéis a fháil faoin gcás;
  • gearán a dhéanamh mura dtugtar meas dá gcearta sna himeachtaí coiriúla;
  • rochtain, le sonraí teagmhála, a fháil ar chumarsáid faoina gcomhad;
• feachtais faisnéise agus ardaithe feasachta agus cláir taighde agus oideachais a eagrú chun calaois a laghdú.

Déanfaidh an Coimisiún faoin:

• 31 Lúnasa 2019, clár mionsonraithe a sholáthar chun monatóireacht a dhéanamh ar thionchar na treorach;
• 31 Bealtaine 2023, tuarascáil a thabhairt do Pharlaimint na hEorpa agus don Chomhairle maidir leis na bearta náisiúnta a rinneadh chun cloí leis an reachtaíocht;
• 31 Bealtaine 2026, measúnú ar thionchar na reachtaíochta maidir le dul i ngleic leis an gcalaois agus maidir le cearta an duine i dtuarascáil do Pharlaimint na hEorpa agus don Chomhairle.