Anailís ar ola olóige

ACHOIMRE AR:

Rialachán (CEE) Uimh. 2568/91 maidir le saintréithe na hola olóige agus ola d’iarmhar ológ agus maidir le modhanna ábhartha na hanailíse

Rialachán Tarmligthe (AE) 2018/1096 lena leasaítear Rialachán Cur Chun Feidhme (AE) 29/2012 maidir le ceanglais le haghaidh táscairí áirithe ar lipéadú ola olóige

CAD IS AIDHM LEIS NA RIALACHÁIN?

• Sainítear le Rialachán (CEE) Uimh. 2568/91 ón gCoimisiún Eorpach na saintréithe sonracha is infheidhme maidir le gach catagóir ola olóige agus na cineálacha anailíse a chuirtear i bhfeidhm chun comhréireacht a chinneadh. Leagtar amach leis freisin ceanglais um rialú do Bhallstáit AE.
• Le Rialachán Tarmligthe (AE) 2018/1096 ón gCoimisiún (féach gníomhartha tarmligthe) athbhreithnítear táscairí áirithe maidir le lipéadú ola olóige a bhaineann le haigéadacht agus bliain an fhómhair.

PRÍOMHPHOINTÍ

Catagóirí ola olóige

Tá ocht gcatagóir ola olóige ann.

• Is í ola olóige úríon an chatagóir leis an gcaighdeán is airde. Ní fhaightear fabhtanna orgánaileipteacha ar bith inti agus tá sí torthaíoch. Ní foláir nach mbeidh a leibhéal aigeadachta níos mó ná 0.8%.
• D’fhéadfaí roinnt fabhtanna céadfacha a fháil in ola olóige íon, ach ar leibhéal an–íseal. Ní foláir nach mbeidh a haigeadacht níos mó ná 2%.
• Is ionann ola olóige íon ar chaighdeán níos ísle agus ola olóige lampante a bhfuil aigéadacht níos mó ná 2% inti, gan aon saintréithe torthaíocha agus fabhtanna céadfacha suntasacha. Déantar í a mhínghlanadh nó a úsáid chun críocha tionsclaíocha.
• Faightear ola olóige scagtha i ndiaidh ola olóige lampante agus, corruair, ola olóige íon a scagadh. Níl sí beartaithe don mhargadh miondíola agus tá leibhéal aigéadachta suas le 0.3% inti.
• Tagann ola olóige atá comhdhéanta d’olaí olóige scagtha agus d’olaí olóige íona as ola olóige scagtha a chumasc le hola olóige úríon nó ola olóige íon. Tá méid aigéadachta suas le 1% inti.
• Faightear amhola phrabhaite olóige ó thaos iarmharach a fhaightear i ndiaidh an ola a eastóscadh trí mhodhanna meicniúla.
• Faightear amhola phrabhaite olóige scagtha trí amhola phrabhaite olóige a mhínghlanadh. Tá méid aigéadachta suas le 0.3% inti.
• Faightear ola phrabhaite olóige as ola phrabhaite olóige scagtha a chumasc le hola olóige úríon nó ola olóige íon agus tá méid aigéadachta suas le 1% inti.

Modhanna anailíse chun catagóiriú ola a chinneadh

Déantar na catagóirí éagsúla olaí olóige a ghrádú de réir paraiméadair cháilíochta, a bhaineann leo seo a leanas:

• saintréithe fisiceimiceacha, amhail an leibhéal aigéadachta, an t–innéacs sárocsaíde, cion na n–aigéad sailleach agus comhdhéanamh na stéaról;
• saintréithe orgánaileipteacha (céadfacha), amhail torthaíocht agus easpa fabhtanna orgánaileipteacha.

Tugtar achoimre sa rialachán ar na modhanna éagsúla anailíse chun na gnéithe seo a leanas den chomhdhéanamh a dhearbhú:

• saoraigéid shailleacha, sloinnte mar chéatadán d’aigéad oiléach
• innéacs sárocsaíde
• cion céarach
• comhdhéanamh agus ábhar na stéaról agus na ndé–alcól trítheirpéine
• an céatadán de mhonapalmatáit 2–ghlicrile
• comhdhéanamh na n–aigéad sailleach
• saintréithe orgánaileipteacha ola olóige íon
• stigmastadienes
• tríghlicríd
• céaracha, eistir mheitile d’aigéid shailleacha agus eistear eitile d’aigéid shailleacha.

Comhréireacht

Ní mór do na Ballstáit a áirithiú go ndéanfar seiceálacha comhréireachta iomchuí, bunaithe ar anailís riosca, lena áirithiú go mbeidh an ola olóige a chuirtear ar an margadh i gcomhréir leis an gcatagóir dearbhaithe. Féadfaidh na critéir seo a bheith i gceist leis na critéir um measúnú riosca:

• an chatagóir ola, tréimhse an táirgthe, praghas na n–olaí i ndáil le holaí glasraí eile, na hoibríochtaí cumaisc agus pacála, na saoráidí agus na dálaí stórála, an tír thionscnaimh, an tír cinn scríbe, an modh iompair nó méid an bhirt;
• suíomh na n–oibreoirí sa slabhra margaíochta, an méid agus an luach a chuirtear ar an margadh, raon na gcatagóirí ola, an cineál gnó a dhéantar amhail muilleoireacht, stóráil, míghlanadh, cumasc, pacáistiú nó díol miondíola;
• torthaí a fuarthas le linn seiceálacha roimhe seo, lena n–áirítear líon agus cineál na bhfabhtanna a fuarthas, gnáthchaighdeán na n–olaí a chuirtear ar an margadh, feidhmíocht an trealaimh theicniúil a úsáidtear;
• iontaofacht chórais dearbhaithe cáilíochta na n–oibreoirí nó na gcóras féinseiceála a bhaineann le comhréireacht maidir leis na caighdeáin mhargaíochta;
• an áit ina ndéantar an tseiceáil, go háirithe más é an chéad phointe iontrála nó an pointe imeachta deireanach ó AE nó an áit ina ndéantar na holaí a tháirgeadh, a phacáistiú, a lódáil nó a dhíol leis an tomhaltóir deiridh.

Ní mór do na Ballstáit na critéir maidir leis an riosca um neamhchomhlíonadh agus an líon íosta oibreoirí, beart agus cainníochtaí atá faoi réir seiceáil chomhréireachta a chur in iúl roimhe ré. Caithfear seiceáil chomhréireachta amháin ar a laghad in aghaidh gach 1,000 tona d’ola olóige a mhargaítear sa Bhallstát a dhéanamh in aghaidh na bliana.

Mura dtagann ola leis an gcur síos ar a catagóir, ní mór don Bhallstát pionóis éifeachtacha, comhréireacha agus athchomhairleacha a chur i bhfeidhm ag brath ar thromchúis na neamhrialtachta agus minicíocht na seiceálacha a mhéadú má tá na neamhrialtachtaí suntasach.

Saintréithe orgánaileipteacha (céadfacha)

Féadfaidh na Ballstáit painéil um measúnú a fhaomhadh chun saintréithe orgánaileipteacha a mheas agus a dheimhniú. I gcás go mbeadh deacrachtaí ag na Ballstáit painéil um blaiseadh a chur ar bun ar a gcríoch, féadfaidh siad painéal um blaiseadh atá faofa i mBallstát eile a lorg.

Lipéadú

Leasaítear le Rialachán Tarmligthe (AE) 2018/1096 Rialachán Cur Chun Feidhme (AE) Uimh. 29/2012 maidir le caighdeáin mhargaíochta d’ola olóige i ndáil le roinnt téarmaí roghnacha is féidir a chur ar an lipéad:

• léiriú den aigéadacht uasta a bhfuiltear ag súil leis faoin dáta marthanachta íosta;
• bliain an fhómhair.

CÉN UAIR ATÁ TOSACH FEIDHME NA RIALACHÁN?

• Tá feidhm le Rialachán (CEE) Uimh. 2568/91 ón 6 Meán Fómhair 1991.
• Tá Rialachán Tarmligthe (AE) 2018/1096 i bhfeidhm ón 6 Lúnasa 2018.

CÚLRA

Féach chomh maith:

• Ola olóige in AE (An Coimisiún Eorpach)
• Ola olóige — Bileog eolais (An Coimisiún Eorpach).

PRÍOMHDHOICIMÉID

Rialachán (CEE) Uimh. 2568/91 an 11 Iúil 1991 maidir le saintréithe na hola olóige agus ola d’iarmhar ológ agus maidir le modhanna ábhartha na hanailíse (IO L 248, 5.9.1991, lgh. 1–83).

Rinneadh leasuithe comhleanúnacha ar Rialachán (CEE) Uimh. 2568/91 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Rialachán Tarmligthe (AE) 2018/1096 ón gCoimisiún an 22 Bealtaine 2018 lena leasaítear Rialachán (AE) Uimh. 29/2012 maidir le tásca áirithe ar lipéadú ola olóige (IO L 197, 3.8.2018, lgh. 3–4).

DOICIMÉID GHAOLMHARA

Rialachán (AE) Uimh 1308/2013 ó Pharlaimint na hEorpa agus ón gComhairle an 17 Nollaig 2013 lena mbunaítear comheagraíocht na margaí i dtáirgí talmhaíochta agus lena n–aisghairtear Rialacháin (CEE) Uimh. 922/72, (CEE) Uimh. 234/79, (CE) Uimh. 1037/2001 agus (CE) Uimh. 1234/2007 (IO L 347, 20.12.2013, lgh. 671-854).

Féach an leagan comhdhlúite.

Rialachán Cur Chun Feidhme (AE) Uimh. 29/2012 ón gCoimisiún an 13 Eanáir 2012 maidir le caighdeáin mhargaíochta d’ola olóige (códú) (IO L 12, 14.1.2012, lgh. 14–21).

Féach an leagan comhdhlúite.

Rialachán (AE) Uimh. 1169/2011 ó Pharlaimint na hEorpa agus ón gComhairle an 25 Deireadh Fómhair 2011 maidir le soláthar faisnéise bia do thomhaltóirí, lena leasaítear Rialachán (CE) Uimh. 1924/2006 agus Rialachán (CE) Uimh. 1925/2006 ó Pharlaimint na hEorpa agus ón gComhairle, agus lena n–aisghairtear Treoir 87/250/CEE ón gCoimisiún, Treoir 90/496/CEE ón gComhairle, Treoir 1999/10/CE ón gCoimisiún, Treoir 2000/13/CE ó Pharlaimint na hEorpa agus ón gComhairle, Treoir 2002/67/CE agus Treoir 2008/5/CE ón gCoimisiún agus Rialachán (CE) Uimh. 608/2004 ón gCoimisiún (IO L 304, 22.11.2011, lgh. 18-63).

Féach an leagan comhdhlúite.

Nuashonraithe 14.10.2021