Seirbhísí seachadta beartán trasteorann AE

ACHOIMRE AR:

Rialachán (AE) 2018/644 — seirbhísí seachadta beartán trasteorann

CAD IS AIDHM LEIS AN RIALACHÁN?

Tá sé mar aidhm leis:

• feabhas a chur ar thrédhearcacht praghsanna agus ar mhaoirseacht rialála; agus
• a áirithiú go bhfuil fáil ag saoránaigh agus ag gnólachtaí beaga ar sheirbhísí seachadta beartán trasteorann ar phraghas réasúnta.

PRÍOMHPHOINTÍ

Raon feidhme

Leagtar amach leis an rialachán rialacha le haghaidh seirbhísí seachadta beartán trasteorann i ndáil le 3 phríomhghné:

• maoirseacht rialála na seirbhísí seachadta beartán;
• trédhearcacht taraifí píosa aonair áirithe trína bhfoilsiú ar shuíomh gréasáin; agus
• measúnuithe i gcás go bhfuil taraifí faoi réir oibleagáid seirbhíse uilíche* chun na taraifí atá ró-ard a shainaithint.

An fhaisnéis atá le cur ar fáil

Ceanglaítear go soláthraítear faisnéis áirithe le seirbhísí seachadta beartán don údarás rialála náisiúnta (NRA)* sa tír AE ina bhfuil siad bunaithe lena n-áirítear:

• ainm, stádas dlíthiúil agus foirm dhlíthiúil, clárú na cuideachta agus CBL (cáin bhreisluacha), seoladh agus sonraí teagmhála;
• saintréithe na seirbhísí atá á dtairgeadh agus cur síos orthu;
• téarmaí agus coinníollacha ginearálta dá seirbhísí, lena n-áirítear nós imeachta gearán;
• faoin 30 Meitheamh gach bliain fhéilire:
  • láimhdeachas bliantúil;
  • líon na ndaoine atá fostaithe;
  • líon na mbeartán a láimhseáiltear;
  • ainm na bhfochonraitheoirí;
  • liosta taraifí don bhliain reatha.

Ní chaithfidh cuideachtaí ina bhfostaítear níos lú ná 50 duine agus nach soláthraíonn seirbhísí ach sa tír ina bhfuil siad bunaithe amháin an fhaisnéis sin a sholáthar, cé go bhfuil eisceachtaí ann.

Trédhearcacht

Foilseoidh an Coimisiún Eorpach na taraifí a bheidh faoi réir bearta trédhearcachta ar shuíomh gréasáin tiomnaithe faoi dheireadh mí Mhárta gach bliain.

Measúnú ar tharaifí trasteorann

Déanann na NRAanna measúnú ar inacmhainneacht na dtaraifí atá faoi réir na hoibleagáide seirbhíse uilíche is dóigh leo gur gá iad a mheasúnú. Breithníonn siad roinnt gnéithe lena n-áirítear:

• cibé an bhfuil taraifí inacmhainne agus dírithe ar chostas, agus cibé an bhfuil siad trédhearcach agus neamh-idirdhealaitheach;
• taraifí baile agus taraifí ábhartha ar bith eile le haghaidh seirbhísí seachadta beartán inchomparáide i dtír sheolta AE agus i dtír cinn scríbe AE;
• cur i bhfeidhm ar bith taraife aonfhoirmí ar 2 thír AE nó níos mó;
• méideanna, costais shonracha iompair nó láimhseála, costais ábhartha eile nó caighdeáin cháilíochta seirbhíse;
• tionchar dóchúil na dtaraifí trasteorann is infheidhme ar úsáideoirí aonair agus ar úsáideoirí fiontar beag agus meánmhéide.

Ní mór do na NRAanna measúnú a chur isteach chuig an gCoimisiún faoi dheireadh mhí an Mheithimh den bhliain fhéilire ábhartha. Ní mór don Choimisiún leagan neamhrúnda den mheasúnú a fhoilsiú laistigh de 1 mhí amháin óna fháil.

Pionóis

Socraíonn tíortha AE na rialacha maidir le pionóis as sárú a dhéanamh ar an rialachán agus ní mór dóibh a bheith ina bpionóis éifeachtacha, chomhréireacha agus athchomhairleacha.

CÉN UAIR ATÁ TOSACH FEIDHME AN RIALACHÁIN?

Tá feidhm leis ón 22 Bealtaine 2018.

CÚLRA

Chun tuilleadh eolais a fháil, féach:

• Reachtaíocht AE um post (An Coimisiún Eorpach).
• Seachadach beartán in AE (An Coimisiún Eorpach).

PRÍOMHTHÉARMAÍ

PRÍOMHDHOICIMÉAD

Rialachán (AE) 2018/644 ó Pharlaimint na hEorpa agus ón gComhairle an 18 Aibreán 2018 maidir le seirbhísí seachadta beartán trasteorann (IO L 112, 2.5.2018, lgh. 19-28)

DOICIMÉID GHAOLMHARA

Leagan comhdhlúite den Chonradh ar Fheidhmiú an Aontais Eorpaigh Prótacal (Uimh. 26) maidir le seirbhísí comhleasa (IO C 202, 7.6.2016, lch. 307)

Leagan comhdhlúite den Chonradh ar Fheidhmiú an Aontais Eorpaigh — Cuid a Trí — Beartais agus gníomhaíochtaí inmheánacha an Aontais — Teideal XV — Cosaint tomhaltóirí — Airteagal 169 (sean-Airteagal 153 CCE) (IO C 202, 7.6.2016, lch. 124)

Treoir 2011/83/AE ó Pharlaimint na hEorpa agus ón gComhairle an 25 Deireadh Fómhair 2011 maidir le cearta tomhaltóirí, lena leasaítear Treoir 93/13/CEE agus Treoir 1999/44/CE ó Pharlaimint na hEorpa agus ón gComhairle agus lena n-aisghairtear Treoir 85/577/CEE ón gComhairle agus Treoir 97/7/CE ó Pharlaimint na hEorpa agus ón gComhairle (IO L 304, 22.11.2011, lgh. 64-88)

Rinneadh leasuithe comhleanúnacha ar an Treoir a chorprú sa bhundoiciméad. Níl de luach ar an leagan comhdhlúite seo ach luach doiciméadach amháin.

Treoir 97/67/CE ó Pharlaimint na hEorpa agus ón gComhairle an 15 Nollaig 1997 maidir le rialacha coiteanna chun margadh inmheánach Comhphobail i seirbhísí poist a fhorbairt agus cáilíocht na seirbhíse a fheabhsú (IO L 15, 21.1.1998, lgh. 14-25)

Féach an leagan comhdhlúite.

Nuashonraithe 02.10.2018