Comhaontú Comhpháirtíochta idir an tAontas Eorpach agus na hOileáin Fhilipíneacha

ACHOIMRE AR:

Creat-Chomhaontú maidir le Comhpháirtíocht agus Comhar idir an tAontas Eorpach agus na hOileáin Fhilipíneacha

Cinneadh 2012/272/AE ón gComhairle maidir le síniú an chomhaontaithe

Cinneadh (AE) 2017/2414 ón gComhairle maidir leis an gcomhaontú a thabhairt i gcrích

CAD IS AIDHM LEIS AN GCOMHAONTÚ AGUS LEIS NA CINNTÍ?

• Bunaítear bunús dlí nua feabhsaithe leis an gcomhaontú, rud a chuirfidh ar chumas an Aontais Eorpaigh (AE) agus na nOileán Filipíneach a gcaidreamh a neartú, go háirithe maidir le hábhair pholaitiúla, shóisialta agus eacnamaíocha, lena n-áirítear cearta an duine.
• Formheasann Cinneadh 2012/272/AE ón gComhairle síniú an chomhaontaithe comhpháirtíochta ag an Aontas.
• Formheastar le Cinneadh (AE) 2017/2414 ón gComhairle an comhaontú féin.

PRÍOMHPHOINTÍ

Leis an gcomhaontú gabhann na páirtithe orthu féin idirphlé agus comhar cuimsitheach a dhéanamh ar roinnt saincheisteanna lena n–áirítear an méid seo a leanas:

• cúrsaí polaitiúla, sóisialta agus eacnamaíocha i ngach fóram agus eagraíocht ábhartha réigiúnach agus idirnáisiúnta;
• sceimhlitheoireacht agus coireanna trasnáisiúnta a chomhrac;
• cearta an duine agus an t–idirphlé maidir leis an gcomhrac in aghaidh coireanna tromchúiseacha is cúram idirnáisiúnta;
• leathadh arm ollscriosta, mionarm agus arm éadrom a chomhrac, agus próisis síochána agus cosc coinbhleachtaí a chur chun cinn;
• gach réimse trádála agus infheistíochta comhleasa;
• réimse an cheartais agus na slándála, lena n-áirítear:
  • comhar dlíthiúil,
  • drugaí aindleathacha,
  • sciúradh airgid,
  • an choireacht eagraithe agus an t-éilliú a chomhrac,
  • cosaint sonraí,
  • dídeanaithe agus daoine easáitithe ina dtír féin;
• na réimsí imirce agus oibreachais mhuirí;
• earnálacha eile comhleasa, lena n–áirítear:
  • gnóthaí fostaíochta agus sóisialta,
  • beartas eacnamaíoch,
  • closamharc, na meáin agus na hilmheáin,
  • iompar,
  • an comhshaol agus acmhainní nádúrtha, lena n-áirítear an t-athrú aeráide;
• feabhas a chur ar rannpháirtíocht an dá pháirtí i gcláir um chomhar foréigiúnach agus réigiúnach atá oscailte do rannpháirtíocht an pháirtí eile;
• róil agus próifílí na nOileán Filipíneach agus AE a ardú;
• tuiscint idir dhaoine agus idirphlé agus idirghníomhaíocht éifeachtach le sochaí shibhialta eagraithe a chur chun cinn.

Modh comhair

• Cuirfidh gach páirtí na hacmhainní cuí ar fáil, lena n–áirítear na hacmhainní airgeadais, a mhéid is féidir de réir a n–acmhainní agus a rialachán faoi seach, chun na cuspóirí um chomhar a chomhlíonadh.
• Spreagfaidh na páirtithe an Banc Eorpach Infheistíochta chun leanúint lena oibríochtaí sna hOileáin Fhilipíneacha, i gcomhréir lena nósanna imeachta agus lena chritéir um mhaoiniú.

Comhchoiste

Déanfaidh comhchoiste a bheidh comhdhéanta d’ionadaithe ón dá pháirtí an méid seo a leanas:

• feidhmiú agus cur chun feidhme cuí an chomhaontaithe a áirithiú;
• tosaíochtaí a leagan síos i ndáil le haidhmeanna an chomhaontaithe;
• moltaí a dhéanamh chun cuspóirí an chomhaontaithe a chur chun cinn.

DÁTA TEACHT I BHFEIDHM

Tháinig sí i bhfeidhm an 1 Márta 2018.

CÚLRA

• Tá na hOileáin Fhilipíneacha ina gcuid de Chomhlachas Náisiúin na hÁise Thoir Theas, ar príomh-chomhpháirtí de chuid an Aontais é.
• Ó mhí na Nollag 2014 i leith, tá fabhair thrádála fheabhsaithe ag na hOileáin Fhilipíneacha leis an Aontas Eorpach faoi scéim ghinearálaithe fabhar an Aontais.
• Tá an chaibidlíocht maidir le comhaontú saorthrádála idir an tAontas Eorpach agus na hOileáin Fhilipíneacha ar siúl ó bhí mí na Nollag 2015 ann.

Le haghaidh tuilleadh faisnéise, féach:

• Na hOileáin Fhilipíneacha — caidreamh trádála AE leis na hOileáin Fhilipíneacha. Fíricí, figiúirí agus na forbairtí is déanaí (an Coimisiún Eorpach)
• An tAontas Eorpach agus na hOileáin Fhilipíneacha (an tSeirbhís Eorpach Gníomhaíochta Seachtraí).

PRÍOMHDHOICIMÉID

Creat-Chomhaontú maidir le Comhpháirtíocht agus Comhar idir an tAontas Eorpach agus a Bhallstáit, de pháirt, agus Poblacht na nOileán Filipíneach, den pháirt eile (IO L 343, 22.12.2017, lgh. 3–32).

Ionchorpraíodh sa téacs dlíthiúil leasuithe i ndiaidh a chéile ar an gcreat-chomhaontú. Níl de luach ar an leagan comhdhlúite seo ach luach doiciméadach amháin.

Cinneadh 2012/272/EU ón gComhairle an 14 Bealtaine 2012 maidir le síniú, thar ceann an Aontais, an Chreat-Chomhaontaithe um Chomhpháirtíocht agus um Chomhar idir an tAontas Eorpach agus a Bhallstáit, de pháirt, agus Poblacht na nOileán Filipíneach, den pháirt eile (IO L 134, 24.5.2012, lch. 3).

Cinneadh (AE) 2017/2414 ón gComhairle an 25 Meán Fómhair 2017 maidir le tabhairt i gcrích, thar ceann an Aontais, an Chreat-Chomhaontaithe maidir le Comhpháirtíocht agus Comhar idir an tAontas Eorpach agus a Bhallstáit, de pháirt, agus Poblacht na nOileán Filipíneach, den pháirt eile (IO L 343, 22.12.2017, lgh. 1–2).

DOICIMÉID GHAOLMHARA

Fógra maidir le teacht i bhfeidhm an Chreat-Chomhaontaithe maidir le Comhpháirtíocht agus Comhar idir an tAontas Eorpach agus a Bhallstáit, de pháirt, agus Poblacht na nOileán Filipíneach, den pháirt eile (IO L 78, 21.3.2018, lch. 1).

Nuashonraithe 16.01.2023