Slándáil an tsoláthair gáis in AE
ACHOIMRE AR:
Rialachán 2017/1938 lena bhféachtar le soláthar gáis gan bhriseadh ar fud AE a chosaint
CAD IS AIDHM LEIS AN RIALACHÁN?
- Is é is aidhm dó slándáil fuinnimh an Aontais Eorpaigh (AE) a neartú trí chuidiú le cosc a chur ar bhriseadh a d’fhéadfadh a bheith sa soláthar agus freagairt dóibh nuair a tharlaíonn siad, chun a chinntiú go soláthraítear i gcónaí do theaghlaigh agus do thomhaltóirí leochaileacha eile.
- Tá an rialachán mar chuid de phacáiste an aontais fuinnimh, arb é is aidhm dó fuinneamh a dhéanamh slán, inacmhainne agus inbhuanaithe trí chomhar níos dlúithe idir Ballstáit an Aontais.
PRÍOMHPHOINTÍ
Is faoi fhreagracht chomhroinnte na gcuideachtaí gáis nádúrtha, na mBallstát agus an Choimisiúin Eorpaigh atá slándáil an tsoláthair gáis. Is iad seo a leanas príomhghnéithe an rialacháin.
- Comhar agus comhordú níos fearr idir grúpaí réigiúnacha Ballstát chun measúnú a dhéanamh ar rioscaí comhchoiteanna soláthair agus chun comhbhearta coisctheacha agus éigeandála a fhorbairt agus a chomhaontú.
- Tabhairt isteach an tsásra dlúthpháirtíochta, trínar gá do na Ballstáit cabhrú lena chéile an soláthar gáis a ráthú i gcónaí do na tomhaltóirí is leochailí — fiú i gcásanna tromchúiseacha soláthair gáis — faoi choinníollacha cúitimh córa ag an mBallstát a fhaigheann cúnamh.
- Feabhas a chur ar thrédhearcacht trí oibleagáid a chur ar chuideachtaí gáis fógra a thabhairt dá n-údarás náisiúnta maidir lena mórchonarthaí fadtéarmacha soláthair gáis a d’fhéadfadh a bheith ábhartha do chinnteacht an tsoláthair.
- Déanfaidh Líonra Eorpach na nOibreoirí Córais Tarchurtha ionsamhlú gach 4 bliana ar fud an Aontais de chásanna suaite soláthair gáis agus bonneagair.
- Tá oibleagáidí sonracha maidir leis an gComhphobal Fuinnimh ar na Ballstáit, agus déanann an Coimisiún comhordú ar na rialacha dlíthiúla.
- I bhfianaise an ghéaraithe ar ionsaí míleata na Rúise i gcoinne na hÚcráine agus an ghá atá ann cúltaca gáis an Aontais a dhaingniú, lena leasaítear Rialachán (AE) 2022/1032, ceanglaítear stóráil gáis faoi thalamh ar chríoch na mBallstát a líonadh go 80 % ar a laghad dá hacmhainn roimh gheimhreadh 2022/2023 agus go 90 % roimh na tréimhsí geimhridh sna blianta ina dhiaidh sin. Is é an aidhm atá leis an Aontas Eorpach 85% den acmhainn stórála gáis faoi thalamh a líonadh i dteannta a chéile in AE in 2022.
Aithnítear leis an ngníomh leasaitheach chomh maith na hathruithe i gcumais stórála gáis agus i gcásanna náisiúnta.
- Cuireann sé ar chumas na mBallstát an sprioc stórála a bhaint amach i bpáirt trí stoic gáis nádúrtha leachtaithe nó breoslaí malartacha a chomhaireamh.
- I gcás na mBallstát sin a bhfuil acmhainní stórála an-mhór acu i gcomparáid lena dtomhaltas gáis intíre, beidh an oibleagáid líonta le haghaidh stoic faoi thalamh teoranta do mhéid a chomhfhreagraíonn do 35 % den mheántomhaltas bliantúil gáis le 5 bliana anuas.
- Chun cinnteacht an tsoláthair a neartú, ba cheart do na Ballstáit sin nach bhfuil saoráidí stórála acu 15 % dá dtomhaltas gáis intíre bliantúil a stóráil i stoic atá lonnaithe i mBallstáit eile agus, ar an gcaoi sin, rochtain a bheith acu ar chúltaiscí gáis a stóráiltear i mBallstáit eile. Deonaítear eisceacht don Chipir, d’Éirinn agus do Mhálta fad is nach bhfuil siad idirnasctha go díreach le córas gáis na mBallstát eile.
Aisghairm
Aisghairtear leis an rialachán Rialachán (EU) Uimh. 994/2010.
CÉN UAIR ATÁ TOSACH FEIDHME AN RIALACHÁIN?
Tá sé i bhfeidhm ón 1 Samhain 2017.
CÚLRA
Le haghaidh tuilleadh faisnéise, féach:
PRÍOMHDHOICIMÉAD
Rialachán (AE) Uimh. 2017/1938 ó Pharlaimint na hEorpa agus ón gComhairle an 25 Deireadh Fómhair 2017 maidir le bearta chun slándáil an tsoláthair gáis a choimirciú agus lena n–aisghairtear Rialachán (AE) 994/2010 (IO L 280, an 28.10.2017, lgh. 1–56).
Rinneadh leasuithe comhleanúnacha ar Rialachán (CE) Uimh. 2017/1938 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.
DOICIMÉID GHAOLMHARA
Rialachán (AE) 2022/1032 ó Pharlaimint na hEorpa agus ón gComhairle an 29 Meitheamh 2022 lena leasaítear Rialacháin (AE) 2017/1938 agus (CE) Uimh. 715/2009 maidir le stóráil gáis (IO L 173, 30.6.2022, lgh. 17–33).
Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa, chuig Coiste na Réigiún agus chuig an mBanc Eorpach Infheistíochta — Creatstraitéis maidir le hAontas Fuinnimh Buanseasmhach maille le Beartas Réamhbhreathnaitheach don Athrú Aeráide (COM(2015) 80 final, 25.2.2015).
Rialachán (AE) Uimh. 347/2013 ó Pharlaimint na hEorpa agus ón gComhairle an 17 Aibreán 2013 maidir le treoirlínte le haghaidh bonneagair thras-Eorpaigh fuinnimh agus lena n–aisghairtear Cinneadh Uimh. 1364/2006/CE agus lena leasaítear Rialachán (CE) Uimh. 713/2009, Rialachán (CE) Uimh. 714/2009 agus Rialachán (CE) Uimh. 715/2009 (IO L 115, 25.4.2013, lgh. 39–75).
Féach an leagan comhdhlúite.
Treoir 2009/73/CE ó Pharlaimint na hEorpa agus ón gComhairle an 13 Iúil 2009 maidir le comhrialacha don mhargadh inmheánach sa ghás nádúrtha agus lena n-aisghairtear Treoir 2003/55/CE (IO L 211, 14.8.2009, lgh. 94–136).
Féach an leagan comhdhlúite.
Nuashonraithe 31.10.2022