Inrochtaineacht suíomhanna gréasáin agus feidhmchlár móibíleach san earnáil phoiblí

ACHOIMRE AR:

Treoir (AE) 2016/2102 maidir le hinrochtaineacht suíomhanna gréasáin agus feidhmchlár móibíleach de chuid comhlachtaí san earnáil phoiblí

CAD IS AIDHM LEIS AN TREOIR?

• Is é is aidhm léi suíomhanna gréasáin agus feidhmchláir mhóibíleacha de chuid na hearnála poiblí a dhéanamh níos inrochtana, agus caighdeáin éagsúla a chomhchuibhiú laistigh den Aontas Eorpach (AE), agus bacainní á laghdú le haghaidh forbróirí táirgí agus seirbhísí a bhaineann le hinrochtaineacht.
• Tugtar deis leis sin do shaoránaigh AE, go háirithe daoine faoi mhíchumas, rochtain níos éasca a fháil ar sheirbhísí poiblí.

PRÍOMHPHOINTÍ

Ní mór do Bhallstáit AE a áirithiú go mbeidh suíomhanna gréasáin agus feidhmchláir mhóibíleacha comhlachtaí san earnáil phoiblí “níos inrochtana”, go háirithe do dhaoine faoi mhíchumas, trína ndéanamh “inbhraite, inoibrithe, intuisceana agus láidir”. Tá an caighdeán inrochtaineachta leagtha amach sa chaighdeán Eorpach comhchuibhithe EN 301 549 v3.2.1 (2021-03). Tá na codanna den chaighdeán sin a bhaineann leis an treoir seo liostaithe in Iarscríbhinn A den chaighdeán.

Ní mór do chomhlachtaí san earnáil phoiblí ráiteas mionsonraithe, cuimsitheach agus soiléir maidir le hinrochtaineacht a sholáthar ar bhonn rialta maidir le conas a chloíonn a suíomhanna gréasáin agus a bhfeidhmchláir mhóibíleacha leis an treoir seo, lena n–áirítear:

• míniú maidir le gnéithe neamh–inrochtana ar bith, agus faisnéis maidir le malairtí inrochtana;
• cur síos maidir le conas is féidir le húsáideoir mainneachtain a thuairisciú maidir le comhlíonadh na treorach seo, nó conas faisnéis a iarraidh atá eisiata ó raon feidhme na treorach seo;
• nasc le sásra gearán ar féidir é a úsáid mura bhfuil an fhreagairt sásúil.

Bunaítear le Cinneadh Cur Chun Feidhme (AE) 2018/1523, gníomh cur chun feidhme arna ghlacadh ag an gCoimisiún Eorpach, samhail–ráiteas inrochtaineachta.

Ní mór do na Ballstáit an méid seo a leanas a dhéanamh freisin:

• cur i bhfeidhm na gceanglas inrochtaineachta maidir le cineálacha eile suíomhanna gréasáin agus feidhmchlár móibíleach atá clúdaithe le dlíthe náisiúnta atá ann cheana a éascú;
• cláir oiliúna a éascú maidir le hinrochtaineacht suíomhanna gréasáin agus feidhmchlár móibíleach;
• feasacht a mhúscailt maidir le ceanglais inrochtaineachta;
• dea–chleachtas a chomhroinnt, arna héascú ag an gCoimisiún;
• infhaighteacht nós imeachta éifeachtach forfheidhmithe a áirithiú.

Is féidir leis na Ballstáit reachtaíocht a choimeád nó a achtú a théann níos faide ná íoscheanglais na treorach seo.

Eisiaimh

Níl feidhm ag an treoir seo maidir le craoltóirí na seirbhíse poiblí ná eagraíochtaí neamhrialtasacha nach soláthraíonn seirbhísí atá ríthábhachtach don phobal nó go sainiúil do dhaoine faoi mhíchumas. Sa bhreis air sin, níl sí infheidhme maidir leis na gnéithe inneachair seo a leanas:

• formáidí comhad oifige arna bhfoilsiú roimh an 23 Meán Fómhair 2018, mura bhfuil gá leo chun críocha próisis riaracháin ag an gcomhlacht earnála poiblí atá i gceist;
• ábhar fuaime ná físeáin arna fhoilsiú roimh an 23 Meán Fómhair 2020;
• ábhar fuaime nó físeáin beo;
• léarscáiliú ar líne, chomh fada agus a sholáthraítear faisnéis loingseoireachta ríthábhachtach ar bhealach inrochtana;
• inneachar tríú páirtí nach bhfuil faoi cheannas an chomhlachta earnála poiblí atá i gceist;
• macasamhla earraí oidhreachta nó lámhscríbhinní in imthosca áirithe;
• inneachar eislín agus inlín atá beartaithe do ghrúpa dúnta daoine, arna fhoilsiú roimh an 23 Meán Fómhair 2019, go dtí go ndéanfar nuashonrú mór air;
• inneachar suíomhanna gréasáin agus feidhmchlár móibíleach nach ndéanfar a nuashonrú nó a chur in eagar tar éis an 23 Meán Fómhair 2019 (cartlanna), mura bhfuil gá lena n–inneachar chun críocha próisis riaracháin.

Is féidir leis na Ballstáit suíomhanna gréasáin agus feidhmchláir mhóibíleacha de chuid scoileanna, naíscoileanna agus naíolann a eisiamh, ach amháin inneachar a bhaineann le feidhmeanna riaracháin ar líne atá ríthábhachtach.

Faireachán

Ní mór do na Ballstáit faireachán a dhéanamh ar chomhlíonadh agus an mhodheolaíocht á húsáid arna glacadh ag an gCoimisiún ar an 11 Deireadh Fómhair 2018. Cuimsítear an méid seo a leanas sa mhodheolaíocht, a bunaíodh le Cinneadh Cur Chun Feidhme (AE) 2018/1524:

• tréimhsiúlacht an fhaireacháin agus na socruithe samplála suíomhanna gréasáin agus feidhmchlár móibíleach;
• sampláil na leathanach gréasáin, an inneachair ar na leathanaigh sin agus inneachar na bhfeidhmchlár móibíleach;
• cur síos ar an dóigh chun comhlíontacht a dhearbhú;
• nuair a aimsítear easnaimh, meicníocht chun cuidiú le comhlachtaí earnála poiblí iad a cheartú; agus
• socruithe maidir le tástálacha uathoibríocha, láimhe agus inúsáidteachta.

Tuairisciú

Faoin 23 Nollaig 2021, agus gach trí bliana ina dhiaidh sin, cuirfidh na Ballstáit tuarascáil ina gcuirfear torthaí an fhaireacháin i láthair mar aon le faisnéis maidir le húsáid an nós imeachta forfheidhmithe faoi bhráid an Choimisiúin agus foilseoidh siad í. Clúdófar na nithe seo a leanas leis an gcéad tuarascáil:

• socruithe comhairliúcháin le páirtithe leasmhara (eagraíochtaí daoine faoi mhíchumas agus daoine scothaosta, comhpháirtithe sóisialta, tionscal agus grúpaí eile) maidir le hinrochtaineacht suíomhanna gréasáin agus feidhmchlár móibíleach;
• nósanna imeachta chun forbairtí maidir le beartas inrochtaineachta a phoibliú;
• eispéiris agus fionnachtana as cur chun feidhme na treorach; agus
• faisnéis maidir le hoiliúint agus gníomhaíochtaí múscailte feasachta.

Cuirfear inneachar na dtuarascálacha uile ar fáil don phobal i bhformáid inrochtana. Déanfaidh an Coimisiún athbhreithniú ar chur i bhfeidhm na treorach roimh an 23 Meitheamh 2022.

CÉN UAIR ATÁ TOSACH FEIDHME NA TREORACH?

Tá feidhm léi ón 22 Nollaig 2016 agus b’éigean dlí a dhéanamh di sna Ballstáit faoin 23 Meán Fómhair 2018. Ní mór do na Ballstáit na bearta sin a chur i bhfeidhm mar a leanas:

• ón 23 Meán Fómhair 2019 maidir le suíomhanna gréasáin arna bhfoilsiú tar éis an 22 Meán Fómhair 2018;
• ón 23 Meán Fómhair 2020 maidir le suíomhanna gréasáin uile eile de chuid comhlachtaí san earnáil phoiblí;
• ón 23 Meitheamh 2021 maidir le feidhmchláir mhóibíleacha de chuid comhlachtaí san earnáil phoiblí.

CÚLRA

Le haghaidh tuilleadh faisnéise, féach:

• Inrochtaineacht ghréasáin (An Coimisiún Eorpach)
• Molann an Coimisiún táirgí agus seirbhísí a dhéanamh níos inrochtana do dhaoine faoi mhíchumas — preaseisiúint (An Coimisiún Eorpach)
• Ráiteas ó Leas–Uachtarán Ansip agus Coimisinéir Oettinger lena gcuirtear fáilte roimh ghlacadh na chéad rialacha uile–Eorpacha chun suíomhanna gréasáin agus feidhmchláir na hearnála poiblí a dhéanamh níos inrochtana (An Coimisiún Eorpach)
• Coinbhinsiún na Náisiún Aontaithe ar Chearta Daoine faoi Mhíchumas (Na Náisiúin Aontaithe)
• An Caighdeán Eorpach Nua maidir le riachtanais inrochtaineachta i dtaca le soláthar poiblí táirgí agus seirbhísí TFC (Institiúid Eorpach na gCaighdeán Teileachumarsáide).

PRÍOMHDHOICIMÉAD

Treoir (AE) 2016/2102 ó Pharlaimint na hEorpa agus ón gComhairle an 26 Deireadh Fómhair 2016 maidir le hinrochtaineacht suíomhanna gréasáin agus feidhmchláir móibíleach de chuid comhlachtaí san earnáil phoiblí (IO L 327, 2.12.2016, lgh. 1-15)

DOICIMÉID GHAOLMHARA

Cinneadh Cur Chun Feidhme (AE) 2021/1339 ón gCoimisiún an 11 Lúnasa 2021 lena leasaítear Cinneadh Cur Chun Feidhme (AE) 2018/2048 a mhéid a bhaineann leis an gcaighdeán comhchuibhithe i ndáil le suíomhanna gréasáin agus feidhmchláir mhóibíleacha (IO L 289, 12.8.2021, lgh. 53-55)

Cinneadh (AE) 2018/2048 ón gCoimisiún an 20 Nollaig 2018 a mhéid a bhaineann leis an gcaighdeán comhchuibhithe i ndáil le suíomhanna gréasáin agus feidhmchláir mhóibíleacha a dréachtaíodh mar thaca le Treoir (AE) 2016/2102 ó Pharlaimint na hEorpa agus ón gComhairle (IO L 327, 21.12.2018, lgh. 84-86)

Rinneadh leasuithe comhleanúnacha ar Chinneadh (AE) 2018/2048 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Cinneadh Cur Chun Feidhme (AE) 2018/1523 ón gCoimisiún an 11 Deireadh Fómhair 2018 lena mbunaítear samhail–ráiteas inrochtaineachta de réir Threoir (AE) 2016/2102 ó Pharlaimint na hEorpa agus ón gComhairle maidir le hinrochtaineacht suíomhanna gréasáin agus feidhmchlár móibíleach de chuid comhlachtaí san earnáil phoiblí (IO L 256, 12.10.2018, lgh. 103-107)

Cinneadh Cur Chun Feidhme (AE) 2018/1524 ón gCoimisiún an 11 Deireadh Fómhair 2018 lena mbunaítear modheolaíocht faireacháin agus na socruithe maidir le tuairisciú ag na Ballstáit de réir Threoir (AE) 2016/2102 ó Pharlaimint na hEorpa agus ón gComhairle maidir le hinrochtaineacht suíomhanna gréasáin agus feidhmchlár móibíleach de chuid comhlachtaí san earnáil phoiblí (IO L 256, 12.10.2018, lgh. 108-116)

Féach an leagan comhdhlúite.

Nuashonraithe 27.10.2021