Comhaontú comhlachais idir an AE agus Meiriceá Láir

PRÍOMHPHOINTÍ

Tá trí shnáithe sa chomhaontú

1. Idirphlé polaitiúil

   Is iad cuspóirí an idirphlé pholaitiúil idir an dá pháirtí:

   • comhpháirtíocht pholaitiúil phribhléideach a bhunú;
   • comhluachanna, prionsabail agus comhchuspóirí a chosaint trína gcur chun cinn ar an leibhéal idirnáisiúnta, go háirithe ag na Náisiúin Aontaithe (NA);
   • na Náisiúin Aontaithe a neartú mar chroílár an chórais iltaobhaigh, ionas go mbeidh sé ábalta aghaidh a thabhairt ar na dúshláin dhomhanda;
   • malartú leathan tuairimí, seasaimh agus faisnéise a chumasú as a dtiocfaidh comhthionscnaimh ar an leibhéal idirnáisiúnta;
   • comhoibriú i réimse an bheartais eachtraigh agus slándála, agus é mar chuspóir a seasaimh a chomhordú agus comhthionscnaimh leasa fhrithpháirtigh a ghlacadh sna fóraim idirnáisiúnta ábhartha.

   Féadfaidh idirphlé den sórt sin gach gné leasa fhrithpháirtigh ar an leibhéal idirnáisiúnta nó réigiúnach a chumhdach; luaitear roinnt saincheisteanna sonracha, áfach, lena n-áirítear:

   • dí-armáil
   • an comhrac in aghaidh na sceimhlitheoireachta
   • imirce
   • an comhshaol.
2. Comhar

   Tugtar tús áite sa chomhaontú do chomhar atá dírithe ar na cuspóirí seo a leanas a bhaint amach:

   • neartú na síochána agus na slándála;
   • institiúidí daonlathacha, an dea-rialachas agus infheidhmeacht iomlán an smachta reachta, comhionannas inscne, gach cineál neamh-idirdhealaithe, éagsúlacht chultúrtha, iolrachas, cur chun cinn agus urraim do chearta an duine, saoirsí bunúsacha, trédhearcacht agus rannpháirtíocht na saoránach a atreisiú;
   • cur le comhtháthú sóisialta;
   • fás eacnamaíoch a chur chun cinn d’fhonn forbairt inbhuanaithe a chur chun cinn;
   • an próiseas lánpháirtíochta réigiúnaí i Meiriceá Láir a láidriú;
   • cumais táirgthe agus bainistíochta a threisiú agus iomaíochas a fheabhsú.
3. Trádáil

   I measc chuspóirí an tsnáithe seo tá an méid a leanas:

   • trádáil earraí a leathnú agus a éagsúlú;
   • trádáil in earraí a éascú;
   • trádáil i seirbhísí a léirscaoileadh, i gcomhréir le hAirteagal V den Chomhaontú Ginearálta um Thrádáil i Seirbhísí;
   • comhtháthú réigiúnach eacnamaíoch a chur chun cinn i réimse na nósanna imeachta custaim, na rialachán teicniúil agus na mbeart sláintíochta agus fíteashláintíochta;
   • timpeallacht a fhorbairt a chabhródh le hinfheistíocht mhéadaithe;
   • margaí soláthair an rialtais a oscailt go héifeachtach, go cómhalartach agus de réir a chéile;
   • cearta maoine intleachtúla a chosaint go dóthanach agus go héifeachtach;
   • saoriomaíocht neamhshaofa a chur chun cinn sa chaidreamh eacnamaíoch agus trádála;
   • sásra um réiteach díospóidí atá éifeachtach, cothrom agus intuartha a bhunú;
   • trádáil agus infheistíocht idirnáisiúnta a chur chun cinn idir na páirtithe.

Cuimsítear leis an gcomhaontú roinnt beart chun na cuspóirí seo a bhaint amach, go háirithe:

• déantar foráil ann i leith rochtain fheabhsaithe ar an margadh d’onnmhairí AE go Meiriceá Láir trí:
  • deireadh a chur le taraifí ar earraí monaraithe, iascaigh agus talmhaíochta,
  • aghaidh a thabhairt ar bhacainní ar thrádáil earraí,
  • rochtain an mhargaidh ar sholáthar, ar sheirbhísí agus ar infheistíocht rialtais a fheabhsú;
• bunaítear leis cothroime iomaíochta trí rialacha comhchoiteanna i réimsí amhail:
  • maoin intleachtúil agus tásca geografacha,
  • iomaíocht agus cúnamh Stáit,
  • réiteach díospóidí;
• neartaítear leis comhtháthú réigiúnach trí bhearta a thabhairt isteach amhail:
  • doiciméad riaracháin aonair le haghaidh dearbhuithe custaim,
  • rogha aonair dleachta ar allmhairí don réigiún;
• leagtar amach leis comhaontú maidir le forbairt inbhuanaithe atá ceaptha chun:
  • tuilleadh forbartha eacnamaíochta trí thrádáil,
  • aghaidh a thabhairt ar an idirghaol idir beartais trádála agus sóisialta agus comhshaoil,
  • scéimeanna trádála agus margaíochta a spreagadh agus a chur chun cinn bunaithe ar chritéir inbhuanaitheachta.