Aicmiú staidrimh ar tháirgí de réir gníomhaíochta
ACHOIMRE AR:
Rialachán (CE) Uimh. 451/2008 — aicmiú nua staidrimh ar tháirgí de réir gníomhaíochta
CAD IS AIDHM LEIS AN RIALACHÁN?
- Tugtar isteach leis aicmiú nua staidrimh ar tháirgí (earraí agus seirbhísí araon) de réir gníomhaíochta (CPA) in AE, agus cuirtear in ionad aicmithe roimhe sin ó 1993 é agus aisghairtear an t-aicmiú sin leis.
- Féachtar leis an CPA le cur le rialachas eacnamaíoch níos fearr ar leibhéal AE agus ar an leibhéal náisiúnta araon trí shonraí níos inchomparáide agus níos ábhartha a sholáthar.
PRÍOMHPHOINTÍ
- Déantar táirgí a bhfuil saintréithe i gcoitinne acu a chatagóiriú le haicmithe táirgí. Is iad is bunús le staidreamh a bhailiú agus a ríomh maidir le táirgeadh, dáileadh, tomhaltas, trádáil idirnáisiúnta agus iompar na dtáirgí sin.
- Tá catagóirí táirgí CPA nasctha leis na gníomhaíochtaí faoi mar atá sainithe le haicmiú staidrimh AE maidir le gníomhaíochtaí eacnamaíocha (NACE*). Sanntar gníomhaíocht NACE do gach táirge CPA, rud a chiallaíonn go bhfuil struchtúr an CPA i gcomhréir le struchtúr NACE ar gach leibhéal.
- Tagann an CPA le haicmiú táirgí agus seirbhísí na Náisiún Aontaithe, an tAicmiú Lárnach Táirgí (CPC). De dheasca é sin is féidir staidreamh a chur i gcomparáid le staidreamh eile ar fud tíortha agus i réimsí éagsúla.
- Tá struchtúr céimlathach sé leibhéal ag an CPA. Is féidir gach leibhéal a shainaithint trí chód sonrach.
- An chéad leibhéal: 21 chuid (cód aibítreach), e.g. A: Táirgí talmhaíochta, foraoiseachta agus iascaireachta.
- An dara leibhéal: 88 rannán (cód uimhriúil dhá dhigit), e.g. 01: Táirgí talmhaíochta, sealgaireachta agus seirbhísí bainteacha.
- An tríú leibhéal: 262 ghrúpa (cód uimhriúil trí dhigit), e.g. 01.1: Barra neamh-ilbhliantúla.
- An ceathrú leibhéal: 576 aicme (cód uimhriúil ceithre dhigit), e.g. 01.11: Gránbharra (seachas rís), barra léagúmacha agus síolta ola.
- An cúigiú leibhéal: 1 357 gcatagóir (cód uimhriúil cúig dhigit), e.g. 01.11.1: Cruithneacht.
- An séú leibhéal: 3 218 bhfochatagóir (cód uimhriúil sé dhigit), e.g. 01.11.11: Cruithneacht dúraim agus 01.11.12: Cruithneacht, seachas cruithneacht dúraim.
Tá an CPA leagtha amach san iarscríbhinn.
Féadfaidh an Coimisiún Eorpach bearta a ghlacadh maidir le cur chun feidhme an rialacháin seo, lena n-áirítear cinn a cheaptar lena n-oiriúnú d’fhorbairtí eacnamaíocha agus teicneolaíocha nó lena n-ailíniú le haicmithe eacnamaíocha nó sóisialta eile.
In 2009, cuireadh an Coiste um an gCóras Staidrimh Eorpach in aonad an Choiste um an gClár Staidrimh. Tá sé freagrach as tacú leis an gCoimisiún leis an rialachán seo a chur chun feidhme. Tá sé comhdhéanta d’ionadaithe thíortha AE agus déanann an Coimisiún cathaoirleacht air.
Cuireadh an téacs san iarscríbhinn le Rialachán (AE) Uimh. 1209/2014 lena leasaítear Rialachán (CE) Uimh. 451/2008, dá dtagraítear de ghnáth mar “CPA Leagan 2.1” in ionad Rialachán (CE) Uimh. 451/2008.
CÉN UAIR ATÁ TOSACH FEIDHME AN RIALACHÁIN?
Tá feidhm leis ón 1 Eanáir 2008.
CÚLRA
Le haghaidh breis faisnéise, féach:
PRÍOMHTHÉARMAÍ
NACE: giorrúchán d’ainm aicmiú AE maidir le staidreamh gníomhaíochtaí eacnamaíochta a thagann ón bhFraincis Nomenclature statistique des activités économiques.
PRÍOMHDHOICIMÉAD
Rialachán (CE) Uimh. 451/2008 ó Pharlaimint na hEorpa agus ón gComhairle an 23 Aibreán 2008 lena mbunaítear aicmiú nua staidrimh ar tháirgí de réir gníomhaíochta (CPA) agus lena n-aisghairtear Rialachán (CEE) Uimh. 3696/93 ón gComhairle (IO L 145, 4.6.2008, lgh. 65-226)
Rinneadh leasuithe comhleanúnacha ar Rialachán (CE) Uimh. 451/2008 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.
Nuashonraithe 09.11.2017