Tosaíonn an comhaontú le réamhrá ina leagtar amach na cúiseanna agus na haidhmeanna is bonn leis. Tagann 7 dteideal ina dhiaidh sin:

Teideal 1:

Cuspóirí:

Rochtain níos fearr a thabhairt do Ghána ar an margadh ná mar atá ceadaithe ag Scéim Ghinearálta AE um Fhabhair.
Míshocracht a sheachaint tar éis do Chomhaontú Cotonou dul in éag.
Cuidiú le cuspóirí ginearálta Ghána a bhaint amach leis an mbochtaineacht a laghdú agus le comhtháthú réigiúnach, comhar eacnamaíoch agus dea-rialachas a chur chun cinn san Afraic Thiar.
Rannpháirtíocht Ghána sa gheilleagar domhanda a chur chun cinn.
Naisc AE-Ghána a neartú atá bunaithe ar dhlúthpháirtíocht agus ar chomhleas.
Teacht ar chomhaontú a bheidh ar comhréir le rialacha EDT

Teideal 2:

Comhpháirtíocht um fhorbairt:

Geallann na páirtithe sa chomhaontú don mhéid seo a leanas:
- comhar airgeadais agus neamhairgeadais;
- comhar chun na tairbhí do Ghána a uasmhéadú;
- an timpeallacht ghnó a dhéanamh chomh fabhrach agus is féidir;
- tacaíocht a thabhairt do Ghána i gcur chun feidhme rialacha a bhaineann le trádáil;
- oibriú chun Gána a dhéanamh iomaíoch sna réimse atá cumhdaithe faoin gcomhaontú.
Aithníonn an dá thaobh go bhféadfadh dleachtanna custaim níos ísle tionchar suaite a bheith acu agus comhaontaíonn siad go gcomhoibreoidh siad chun aon éifeacht dhiúltach a mhaolú.

Teideal 3:

Córas trádála le haghaidh earraí

Tá an teideal seo roinnte ina 4 chaibidil:

Caibidil 1:
Dleachtanna custaim* & bearta neamhtharaife
Aontaíonn na páirtithe:
- go mbeidh táillí agus muirir eile a eascraíonn as oibleagáidí dlíthiúla roimh dháta shíniú an chomhaontaithe i bhfeidhm ar feadh deich mbliana eile, agus d’fhéadfaí é sin a shíneadh;
- nach mbeidh dleachtanna custaim ar bith ar allmhairí isteach in AE de tháirgí a thionscnóidh i nGána ach amháin ar airm agus armlón, a luaithe is a thiocfaidh an comhaontú i bhfeidhm;
- le haghaidh cineálacha áirithe earraí, coimeádfar dleachtanna custaim ar onnmhairí AE go Gána, nó díothófar iad thar 15 bliana; agus
- déanfar rialacha tionscnaimh a idirbheartú.
Caibidil 2:
Bearta cosanta trádála
- Féadfaidh ceachtar páirtí bearta frithdhumpála agus frithchúitimha ghairm, igcomhréir le rialacha EDT.
- Mar an gcéanna, féadfaidh ceachtar taobh bearta iltaobhacha cosanta a ghairm. Ní mór é sin a dhéanamh de réir GATT (an Comhaontú Ginearálta um Tharaifí agus Trádáil), Comhaontú EDT maidir le Bearta Cosanta, agus Comhaontú EDT maidir leis an Talmhaíocht.
- Féadfaidh ceachtar páirtí iarratas a dhéanamh ar bhearta cosanta faoi chúinsí sonracha. Níl feidhm ag roinnt de na bearta cosanta ach maidir le Gána amháin (cur isteach ar mhargaí nó cosaint naíthionscail)
- Aithníonn an dá thaobh an tábhacht atá le comhar sa réimse um bearta cosanta trádála.
Caibidil 3:
Custaim agus éascú trádála
Aontaíonn na páirtithe:
- faisnéis a chomhroinnt maidir le reachtaíocht agus nósanna imeachta um chustam;
- oibriú le chéile ar nósanna imeachta um allmhairiú, onnmhairiú agus idirthuras;
- comhar chun nósanna imeachta trádála a uathoibriú;
- cur chuige coiteann a ghlacadh maidir le heagraíochtaí idirnáisiúnta lena n-áirítear EDT, an Chomhairle um Chomhar Custaim, na Náisiúin Aontaithe agus UNCTAD, Comhdháil na Náisiún Aontaithe ar Thrádáil agus Forbairt;
- comhar a chur chun cinn idir na gníomhaireachtaí gaolmhara go léir;
- rialacha um luacháil chustaim a leagan síos maidir le trádáil chómhalartach faoi rialacha GATT.
Caibidil 4:
Bacainní teicniúla ar thrádáil & bearta sláintíochta agus fíteashláintíochta
- Coimeádann Gána agus AE a gcearta faoi oibleagáidí iltaobhacha amhail: comhaontuithe EDT maidir le bearta sláintíochta agus fíteashláintíochta (SFS) agus maidir le bacainní teicniúla ar thrádáil; an Coinbhinsiún Idirnáisiúnta maidir le Cosaint Plandaí; CODEX Alimentarius; an Eagraíocht Dhomhanda um Shláinte Ainmhithe.
- Féadfaidh ceachtar taobh criosanna um stádas sainithe sláintíochta agus fíteashláintíochta a shainaithint faoi chomhaontú EDT SFS (e.g. réigiúin atá saor ó ghalair nó ina bhfuil méideanna ísle de leitheadúlacht lodnaidí nó galar).
- Cuirfidh gach taobh an taobh eile ar an eolas faoi aon athrú ar cheanglais theicniúla um allmhairiú le haghaidh táirgí lena n-áirítear ainmhithe beo agus plandaí. Cuirfidh siad in iúl don taobh eile chomh maith aon riail nua lena gcuirtear cosc ar earraí áirithe a allmhairiú.
- Aontaíonn an dá thaobh comhoibriú i gcomhlachtaí idirnáisiúnta um shocrú caighdeán.

Teideal 4:

Seirbhísí, infheistíocht agus rialacha a bhaineann le trádáil

Aontaíonn na páirtithe cúnamh a thabhairt le teacht ar chomhaontú um chomhpháirtíocht eacnamaíoch idir an Afraic Thiar agus AE sna réimsí seo a leanas:

Trádáil i seirbhísí agus i ríomhthráchtáil
Infheistíochtaí
Iomaíocht
Maoin intleachtúil.

Teideal 5:

Seachaint agus socrú díospóidí

Leis an gcomhaontú cuirtear sásra i bhfeidhm chun

aon díospóid trádála a sheachaint;
aon díospóid den sórt sin a shocrú trí phainéal achomhairc;
a chinntiú go gcloítear le rialú an phainéil.

Teideal 6:

Eisceachtaí ginearálta

Clásal eisceachta ginearálta: cinntítear leis nach féidir úsáid a bhaint as an gcomhaontú chun cosc a chur ar cheachtar taobh bearta a dhéanamh chun beatha a chosaint nó chun acmhainní nádúrtha a chaomhnú, mar shampla.
Eisceachtaí slándála: ní mór do na páirtithe a chéile a chur ar an eolas faoi ghníomhaíocht ar bith a dhéanfaidh siad chun leasanna slándála riachtanacha a chosaint agus síocháin agus slándáil idirnáisiúnta a choimeád, agus faoi chinntí ar bith maidir le stop a chur le tionscnaimh dá leithéid.
Cánachas: ní féidir an comhaontú a úsáid, mar shampla, chun údar a thabhairt d’idirdhealú cánach bunaithe ar an áit ina bhfuil daoine ina gcónaí nó ina bhfuil a n-infheistíochtaí acu, ná teorainn a chur ar chearta nó oibleagáidí ceachtar taoibh faoi aon choinbhinsiún cánach.

Teideal 7:

gnéithe institiúideacha, ginearálta agus deiridh an chomhaontaithe

Áirítear leis anteideal seo gnéithe amhail iad seo a leanas:

leanfaidh an 2 thaobh le hidirbheartaíocht a dhéanamh cosúil leis na cinn a úsáideadh chun teacht ar an gcomhaontú seo;
cuirfear Coiste an Chomhaontaithe um Chomhpháirtíocht Eacnamaíochta ar bun chun an comhaontú a bhainistiú;
beidh an comhaontú i bhfeidhm go huathoibríoch maidir le haon tír is iarrthóir a luaithe is a ghlacfaidh sí ballraíocht in AE.
soláthraítear naisc sa chomhaontú le Comhaontú Cotonou.

Síníodh an comhaontú an 28 Iúil 2016, ar an tuiscint go gcuirfí i gcrích ar dháta níos déanaí é. Cuireadh i bhfeidhm go sealadach é an 15 Nollaig 2016 ach níor tháinig sé i bhfeidhm fós.

Cinneadh (AE) 2016/1850 ón gComhairle an 21 Samhain 2008 maidir leis an gComhaontú eatramhach um Chomhpháirtíocht Eacnamaíochta idir Gána, de pháirt, agus an tAontas Eorpach agus a Ballstáit den pháirt eile, a shíniú agus a chur i bhfeidhm go sealadach (IO L 287, 21.10.2016, lgh. 1-2)