Tástáil chun sábháilteacht feithiclí agus leantóirí a áirithiú

PRÍOMHPHOINTÍ

Raon feidhme

Beidh feidhm ag an dlí maidir le feithiclí atá ábalta taisteal ag luasanna níos mó ná 25 km/uair sna catagóirí seo a leanas.

• Gluaisteáin phaisinéirí agus feithiclí tráchtála éadroma (catagóirí M1 agus N1). Le tástáil 4 bliana tar éis clárúcháin den chéad uair agus gach 2 bhliain ina dhiaidh sin.
• Feithiclí i gcatagóir M1 a úsáidtear mar thacsaithe nó mar otharchairr, mar bhusanna nó mar mhionbhusanna (M2, M3), mar fheithiclí earraí troma (N2, N3) agus mar leantóirí troma (O3, O4). Le tástáil 1 bhliain tar éis clárúcháin den chéad uair agus gach bliain ina dhiaidh sin.
• Tarracóirí gasta lena bhfuil luas deartha 40 km/uair (T1b, T2b, T3b, T4.1b, T4.2b agus T4.3b) agus a úsáidtear chun críocha tráchtála. Le tástáil 4 bliana tar éis clárúcháin den chéad uair agus gach 2 bhliain ina dhiaidh sin.

Gluaisrothair chumhachtacha

Déanfar tástáil ar fheithiclí dhá roth nó trí roth (catagóir L) ar a bhfuil inneall dócháin níos mó ná 125 cm³ ó 2022 ar aghaidh, mura dtaispeánfar le staidreamh um shábháilteacht ar bhóithre do na 5 bliana roimhe sin go bhféadfaí an leibhéal céanna sábháilteachta ar bhóithre a bhaint amach le bearta malartacha.

Tástálacha ródacmhainneachta roimh na dátaí dlite

B’fhéidir gur gá tástáil a dhéanamh ar fheithiclí roimh na dátaí dlite i gcúinsí áirithe:

• tar éis timpiste;
• i gcás gur athraíodh sealbhóir an deimhnithe clárúcháin;
• nuair a shroichtear míleáiste de 160,000 km;
• i gcásanna go gcuirtear isteach go mór ar shábháilteacht ar bhóithre.

Díolúintí

D’fhéadfadh na cineálacha feithiclí seo a leanas a bheith díolmhaithe ó thástálacha ródacmhainneachta:

• feithiclí a mbaineann tábhacht leo ó thaobh na staire de;
• feithiclí taidhleoireachta;
• feithiclí a úsáideann na fórsaí armtha, na póilíní, na custaim, na seirbhísí dóiteáin nó chun críocha talmhaíochta agus foraoiseachta amháin;
• feithiclí a úsáidtear ar na hoileáin bheaga amháin.

Ionaid tástála ceadaithe

Caithfidh ionaid tástála cheadaithe agus chomhlíontacha a bheith ag gach Ballstát AE agus caithfidh na cigirí critéir inniúlachta a shásamh agus bheith saor ó choinbhleacht leasa ar bith.

Measúnú fabhtanna

• Aicmítear fabhtanna mar mhionfhabhtanna, mar mhórfhabhtanna nó mar fhabhtanna contúirteacha, ach ní leor mionfhabhtanna chun teip a thabhairt d’fheithiclí.
• I gcás gur fabhtanna contúirteacha atá ann, féadtar toirmisc a chur ar úsáid na feithicle ar bhóithre poiblí go dtí go gceartófar an fabht.

Deimhniú ródacmhainneachta

I gcás go n–athchláraítear feithicil atá cláraithe i mBallstát éigin eile cheana féin, caithfidh na Ballstáit eile aitheantas a thabhairt dá deimhniú, fiú amháin má tháinig athrú úinéireachta uirthi.

Faoi 2021, ceanglófar ar ionaid tástála faisnéis ábhartha a chomhroinnt le húdaráis náisiúnta a mBallstáit féin.

Ríomh–ardán Eorpach um Fhaisnéis Feithicle

Caithfear iniúchadh a dhéanamh ar fhéidearthacht, ar na costais agus ar na sochair a bhaineann le Ríomhardán Eorpach um Fhaisnéis Feithilce a bhunú.

Calaois

• Cuirfear sonraí ón tástáil roimhe sin ar fáil do na cigirí d’fhonn calaois odaiméadair (an gléas a úsáidtear chun an fad a taistealaíodh a thomhas a chúbláil) a bhrath.
• Is cion inphionóis é má thugtar bréagléiriú ar an míleáiste atá déanta ag feithicil.