Ról na hEorpa i múnlú thodhchaí bhainistíocht an idirlín

Tá sraith tograí eisithe ag an gCoimisiún Eorpach maidir le conas ar cheart an t-idirlíon a bhainistiú agus a rith sa todhchaí.

GNÍOMH

Teachtaireacht ón gCoimisiún chuig Parlaimint na hEorpa, chuig an gComhairle, chuig an gCoiste Eacnamaíoch agus Sóisialta, chuig Coiste na Réigiún: Beartas agus Bainistíocht Idirlín - Ról na hEorpa i múnlú thodhchaí bhainistíocht an idirlín [COM(2014) 72 final, an12 Feabhra 2014 - nár foilsíodh san Iris Oifigiúil].

ACHOIMRE

Tá sé mar aidhm ag na tograí seo ón gCoimisiún Eorpach (CE) an tslí ina mbainistítear agus ina reáchtáiltear achmhainní agus feidhmeanna an idirlín a athchóiriú. Tugtar bainistíocht an idirlín air sin. Forbraíodh an t-idirlíon mar ghréasán na ngréasán dáilte agus feidhmíonn sé gan bhord rialaithe lárnach.

Nochtadh faireachas ar an mórscála le déanaí agus tá ról lárnach na Stáit Aontaithe (SAM) maidir le bainistíocht an idirlín á cheistiú. Ós rud é go bhfuil múnla bhainistíocht an idirlín bunaithe ar SAM faoi láthair, measann CE go bhfuil gá le hathrú réidh i dtreo múnla bainistíochta níos domhanda a eagrú.

Tá bainistíocht an idirlín in ainm is feidhmiú cuí an idirlín a áirithiú. Sampla amháin is ea gur cheart go mbeadh teacht ar shuíomh idirlín ar bith ó áit ar bith timpeall an domhain. An dara sampla is ea go bhfeidhmíonn gach córas teicniúil le chéile pé áit a bhfuil an t-úsáideoir. An tríú sampla is ea gur féidir seoltaí idirlín a úsáid timpeall an domhain.

Dírítear sna tograí ar na príomhréimsí beartais a bhaineann le héiceachóras casta bhainistíocht an idirlín:

• prionsabail a fhorbairt maidir le bainistíocht an idirlín, creatlach comhoibrithe agus bunfheidhmeanna idirlín (Cuid 2,3 agus 4);
• neartú an mhúnla ilgheallsealbhóirí atá ann faoi láthair (Cuid 5);
• agus caithfear dul i ngleic le cuid de na saincheisteanna i gcomhthéacs bhainistíocht an idirlín sa todhchaí, mar shampla an idirghníomhú láidir idir noirm theicniúla agus beartas idirlín, na príomhdhúshláin maidir le muinín a atógáil, agus easaontachtaí dlíthe agus dlínsí (Cuid 6,7 agus 8).

Áirítear sna tograí gur cheart do CE na nithe seo a leanas a dhéanamh:

• tacú le réimse prionsabail chomhleanúnacha maidir le bainistíocht dhomhanda an idirlín a bhunú atá comhsheasmhach le cearta bunúsacha agus luachanna daonlathacha;
• dul i gcomhairle le grúpaí saoránach, pobail theicniúla agus acadúla agus tionscal na hEorpa, Parlaimint na hEorpa agus Ballstáit AE maidir le conas rannpháirtíocht leordhóthanach agus thrédhearcach ilgheallsealbhóirí i bhfoirmliú na mbeartas Eorpach maidir le bainistíocht an idirlín sa todhchaí a chinntiú;
• oibriú leis an gComhairle Eorpach agus le Parlaimint na hEorpa chun glacadh agus feidhmiú tapa na príomhreachtaíochta a bhaint amach d’fhonn muinín ar líne a mhéadú: ba cheart athchóiriú an chreata cosanta sonraí agus an treoir mholta maidir le slándáil gréasáin agus faisnéise a áireamh leis sin;
• tús a chur le hathbhreithniú domhain idirnáisiúnta ar na rioscaí easaontachtaí dlíthe agus dlínsí a thagann chun cinn ar an idirlíon;
• na roghanna ábhartha ar fad a mheas chun na heasaontachtaí dlíthe agus dlínsí sin a réiteach.

Ina theannta sin, moltar sna tograí CE bonn d’fhís chomhchoiteann Eorpach do bhainistíocht an idirlín. Ina measc, áirítear:

• cearta bunúsacha agus luachanna daonlathacha agus struchtúir rialachais ilgheallsealbhóirí atá bunaithe ar rialacha soiléire a chosaint agus a chur chun cinn;
• Corparáid Idirlín dhomhandaithe d’Ainmneacha agus d’Uimhreacha Sannta (ICANN) agus Údarás Idirlín d’Uimhreacha Sannta (IANA) a úsáid;
• Fóram neartaithe agus athchóirithe maidir le Bainistíocht an Idirlín a úsáid.

Thairis sin, tá sé ar intinn ag CE árdán ar líne darb ainm an Fhaireachlann Dhomhanda ar Bheartais Idirlín (GIPO). Is é an aidhm atá leis ná go ndéanfaí acmhainn dhomhanda ar líne do GIPO chun faireachán a dhéanamh ar cheapadh beartas idirlín, rialacháin agus teicneolaíocht chun naisc idir fóraim agus díospóireachtaí éagsúla a aithint. Is éard atá i gceist leis sin go mbeadh sé níos éasca do gheallsealbhóirí gan mórán acmhainní bainistíocht agus beartas an idirlín a leanúint, a thuiscint agus dul i ngleic leis.

GNÍOMHARTHA GAOLMHARA

Teachtaireacht ón gCoimisiún chuig an gComhairle agus chuig Parlaimint na hEorpa - Bainistíocht Idirlín - Bainistíocht ainmneacha agus seoltaí Idirlín - Anailís agus measúnú ón gCoimisiún Eorpach maidir le Páipéar Bán Roinn Tráchtála na Stáit Aontaithe (COM(1998) 476 final, an 29 Iúil 1998).

Teachtaireacht ón gCoimisiún chuig Parlaimint na hEorpa agus chuig an gComhairle - Bainistíocht idirlín: an chéad chéim eile (COM(2009) 277 final, an 18 Meitheamh 2009).

22.04.2014