Tionchar na hinfheistíochta AE ar phoist agus ar an bhfás

Tugtar léargas ginearálta sa pháipéar seo ar Bheartas Comhtháthaithe leasaithe an Aontais Eorpaigh (AE), beartas a mbaintear feidhm as chun beagnach trian den bhuiséad AE a stiúradh trí bhíthin bearta a chruthaíonn fás eacnamaíoch, poist agus iomaíochas. Féachtar anseo le míchothromaíochtaí idir na 28 mBallstát AE agus na 277 réigiún a laghdú.

GNÍOMH

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún: An séú tuarascáil maidir le comhtháthú eacnamaíoch, sóisialta agus críochach: infheistíocht ar mhaithe le poist agus le fás (COM(2014) 473 final an 23.7.2014)

ACHOIMRE

Tugtar léargas ginearálta sa pháipéar seo ar Bheartas Comhtháthaithe leasaithe an Aontais Eorpaigh (AE), beartas a mbaintear feidhm as chun beagnach trian den bhuiséad AE a stiúradh trí bhíthin bearta a chruthaíonn fás eacnamaíoch, poist agus iomaíochas. Féachtar anseo le míchothromaíochtaí idir na 28 mBallstát AE agus na 277 réigiún a laghdú.

CÉARD A DHÉANANN AN TEACHTAIREACHT/TUARASCÁIL SEO?

• Tugann an teachtaireacht achoimre ar Bheartas Comhtháthaithe AE don tréimhse 7 mbliana roimhe seo (2007-13).
• Déantar cur síos sa teachtaireacht ar eilimintí an Bheartais Chomhtháthaithe leasaithe don tréimhse 2014-20.
• Déantar cur síos sa teachtaireacht freisin ar na caibidlíochtaí leanúnacha idir an Coimisiún Eorpach agus na Ballstáit AE maidir le cláir infheistíochta.

PRÍOMHPHOINTÍ

• Táthar ag infheistiú níos mó i ndaoine ná roimhe seo faoin mbeartas comhtháthaithe nua trí Chiste Sóisialta na hEorpa a thacú agus béim níos mó á cur ar chothroime shóisialta agus ar dhul i ngleic le dífhostaíocht i measc an ógra.
• Faoin mbeartas nua, tá laghdú tagtha ar líon na n-infheistíochtaí, agus glactar le cur chuige “caighdeán thar mhéid”. Dírítear go príomha ar na réimsí seo a leanas: taighde agus nuálaíocht, teicneolaíochtaí digiteacha, tacaíocht do ghnóthais bheaga, agus geilleagar atá neamhdhíobhálach don aeráid / a úsáideann níos lú fuinnimh.
• Buíochas leis an mbeartas leasaithe, tá cúram níos troime ar chathracha maidir le cláir infheistíochta a cheapadh toisc go bhfuil sé beartaithe timpeall leath den airgead infheistíochta a chaitheamh ar chathracha.
• Cuirtear le comhar críochach agus tá sé níos éasca do réigiúin agus do chathracha obair le chéile dá bharr.
• Lena chinntiú go gcaitear airgead go heagnaí, dírítear níos mó sa bheartas leasaithe ar na cuspóirí agus ar na torthaí ná mar a rinneadh roimhe seo agus cuirtear béim níos mó ar mheasúnuithe agus ar dhreasachtaí do thionscadail éifeachtacha.

CÚLRA

Athraíonn na coinníollacha eacnamaíocha agus sóisialta san AE ó thír go tír agus ó réigiún go réigiún. Féachtar leis an mBeartas Comhtháthaithe, a ndéantar é a leasú gach seacht mbliana, na difríochtaí sin a laghdú. Ba ríthábhachtach an beartas le linn na géarchéime airgeadais le déanaí chun leanúint le hinfheistíochtaí a chur ar fáil do na Ballstáit AE a raibh a mbuiséid ag laghdú. Tá an beartas ag teacht le straitéis AE Eoraip 2020 i leith fáis chliste, inbhuanaithe agus chuimsithigh.

PRÍOMHTHÉARMAÍ

Tá trí chlár airgeadais éagsúla ina gcuid de bheartas comhtháthaithe AE:

• Ciste Sóisialta na hEorpa (CSE): infheistíocht in oideachas níos fearr, i riarachán poiblí níos fearr, san fhostaíocht agus i gcothroime shóisialta.
• Ciste Forbraíochta Réigiúnaí na hEorpa (CFRE): infheistíocht i bpríomhréimsí tosaíochta, amhail taighde agus nuálaíocht nó gnóthais bheaga.
• An Ciste Comhtháthaithe: infheistíocht i mBallstáit AE a bhfuil na meánioncaim is ísle acu, chun éagothromaíochtaí a laghdú.

Nuashonraithe 08.12.2014