Oibríochtaí míleata agus cosanta an Aontais Eorpaigh a mhaoiniú (Athena)

ACHOIMRE AR:

Cinneadh (CBES) 2015/528 ón gComhairle – maoiniú costais choiteanna oibríochtaí de chuid an Aontais Eorpaigh a bhfuil impleachtaí míleata nó cosanta ag gabháil leo (Athena)

ACHOIMRE

CAD A DHÉANTAR SA CHINNEADH SEO ÓN GCOMHAIRLE?

—

Bunaítear sásra leis chun maoiniú costais choiteanna oibríochtaí de chuid an Aontais Eorpaigh a bhfuil impleachtaí míleata nó cosanta ag gabháil leo, Athena, a bhainistiú.

—

Sásra neamhbhrabúis is ea Athena agus tá an cumas dlí is gá aige conarthaí a dhéanamh agus a bheith ina pháirtí in imeachtaí dlíthiúla, i measc nithe eile.

PRÍOMHPHOINTÍ

—

Is é an Coiste Speisialta comhlacht cinnteoireachta Athena, ina bhfuil ionadaí amháin ó gach ceann de na 27 tír AE a thugann ranníocaíochtaí i leith maoiniú oibríochtaí míleata AE (tá an Danmhairg díolmhaithe ó ghníomhaíochtaí a bhaineann le cosaint i gcomhthéacs AE).

—

tá trí chomhlacht bainistíochta faoin gcoiste speisialta:

—

an Riarthóir, a dhréachtaíonn dréachtbhuiséid (a chuirtear isteach chuig an gCoiste Speisialta), agus a chuireann cinntí an Choiste Speisialta i bhfeidhm;

—

An Ceannasaí Oibríochtaí, a chuireann tograí caiteachais chuig an Riarthóir, i measc nithe eile, agus

—

An tOifigeach Cuntasaíochta.

—

Sainítear sa Chinneadh costais incháilithe an chómhaoinithe ag Athena ag brath ar chéim na hoibríochta, atá sainithe ina iarscríbhinní:

—

Iarscríbhinn I — na costais choiteanna arna gcumhdach ag Athena nuair a thabhaítear iad;

—

Iarscríbhinn II — costais a thabhaítear ó chéim ullmhúcháin na n-oibríochtaí (e.g. misin thaiscéalaíocha, aslonnú leighis éigeandála sa chás nach féidir cóireáil leighis a chur ar fáil ar an toirt); agus

—

Iarscríbinn III — costais a thabhaítear ó chéim ghníomhach na n-oibríochtaí, etc. Baineann siad sin le costais cheanncheathrú oibríochtaí arna stiúradh ag AE, iompar, beairicí agus lóisteáil, cumarsáid, etc.

—

Gach bliain, molann an Riarthóir an dréachtbhuiséad don Choiste Speisialta don bhliain dar gcionn. Dréachtaítear é sin le tacaíocht ó gach ceannasaí oibríochta. Ní mór réamhaisnéis ar an ioncam chun caiteachas a chumhdach a bheith ann mar aon le leithdháiltí airgeadais chun an méid seo a leanas a chumhdach:

—

costais choiteanna a thabhaítear in ullmhú na n-oibríochtaí,

—

costais le haghaidh oibríochtaí atá ar siúl nó atá pleanáilte cheana.

Áirítear iad seo a leanas ar shamplaí de na hoibríochtaí a fhaigheann tairbhe ó mhaoiniú Athena:

—

EUFOR ALTHEA sa Bhoisnia agus an Heirseagaivéin

—

EUNAVFOR ATALANTA (Corn na hAfraice)

—

EUMAM RCA (Poblacht na hAfraice Láir).

CÉN UAIR ATÁ TOSACH FEIDHME AN CHINNIDH SEO?

Tháinig sé i bhfeidhm an 27 Márta 2015.

CÚLRA

Ghlac Comhairle AE an chéad doiciméad (10155/02) maidir le maoiniú oibríochtaí bainistíochta géarchéime arna stiúradh ag AE in 2002. Idir an dá linn, cruthaíodh sásra Athena le Cinneadh 2004/197/CBES ar dtús. Rinneadh an Cinneadh sin a leasú cúpla uair agus cuireadh Cinneadh (CBES) 2015/528 ina ionad ar deireadh in 2015 .

Athena - maoiniú oibríochtaí slándála agus cosanta ar shuíomh gréasáin Chomhairle an Aontais Eorpaigh

GNÍOMH

Cinneadh (CBES) 2015/528 ón gComhairle an 27 Márta 2015 lena mbunaítear sásra do mhaoiniú costais choiteanna oibríochtaí de chuid an Aontais Eorpaigh a bhfuil impleachtaí míleata nó cosanta ag gabháil leo, Athena, a riar agus lena n-aisghairtear Cinneadh 2011/871/CBES (IO L 84, 28.3.2015, lgh. 39-63)

Nuashonraithe 16.11.2015