Coláiste Eorpach um Shlándáil agus um Chosaint

ACHOIMRE AR:

Cinneadh 2013/189/CBES ón gComhairle lena mbunaítear Coláiste Eorpach um Shlándáil agus um Chosaint (CESC)

CAD A DHÉANTAR SA CHINNEADH?

• Bunaítear an Coláiste Eorpach um Shlándáil agus um Chosaint leis.
• Tugtar cur síos ar a struchtúr, ar a ról, ar a thascanna agus ar an gcaoi ina mhaoinítear é.

PRÍOMHPHOINTÍ

Is éard atá sa Choláiste Eorpach um Shlándáil agus um Chosaint (CESC) gréasán d’institiúidí náisiúnta, de choláistí, d’acadaimh agus d’údaráis ar fud an Aontais Eorpaigh (AE) ag déileáil le ceisteanna um beartais slándála agus chosanta, chomh maith le hInstitiúid an Aontais Eorpaigh um Staidéar Slándála. Oibríonn sé faoi fhreagracht fhoriomlán Ardionadaí an Aontais do Ghnóthaí Eachtracha agus don Bheartas Slándála. Bunaíodh an coláiste i mí Iúil 2005.

Seo a leanas príomhchuspóirí an CESC:

• an comhchultúr slándála agus cosanta laistigh den chomhbheartas slándála agus cosanta (CBSC) a fheabhsú sa bhreis;
• tuiscint níos fearr ar an CBSC a chur chun cinn mar chuid riachtanach de chomhbheartas eachtrach agus slándála AE (CBES);
• tacaíocht a thabhairt do chomhpháirtíochtaí an AE i réimse na slándála agus na cosanta, go háirithe comhpháirtíochtaí le tíortha a ghlacann páirt i misin CBSC;
• pearsanra eolasach a chur ar fáil d'institiúidí agus do chomhlachtaí AE ar féidir leo oibriú go héifeachtach ar na cúrsaí uile a bhaineann le CBSC;
• pearsanra eolasach a chur ar fáil do rialtais agus d’fhoirne na dtíortha AE a bhfuil cur amach acu ar bheartais, ar institiúidí agus ar nósanna imeachta an AE i réimse an CBES;
• caidreamh gairmiúil agus teagmhálacha a chur chun cinn ina measc siúd a gcuirtear oiliúint orthu.

Is iad príomhthascanna an CESC ná gníomhaíochtaí oiliúna aeagrú agus a chur ar siúl i réimse CBSC. Tá 3 chineál oiliúna ann:

• an Cúrsa Ardleibhéil;
• na Cúrsaí Ionduchtaithe; agus
• cúrsaí do lucht éisteachta speisialaithe nó cúrsaí ina ndírítear ar rud éigin sainiúil.

Seo a leanas roinnt gníomhaíochtaí eile de chuid an CESC:

• córais chianfhoghlama atá bunaithe ar an ghréasán a fhorbairt;
• ábhair oiliúna a tháirgeadh;
• cláir um malartú idir institiúidí oiliúna a thacú; agus
• oiliúint sna réimsí seo a leanas a bhainistiú: cosc coinbhleachtaí agus bainistíocht géarchéime sibhialta.

Struchtúr an CESC

• 1.

  Coiste Stiúrtha: tá an Coiste Stiúrtha, ar a bhfuil ionadaithe ó thíortha AE, freagrach as gníomhaíochtaí an CESC a chomhordú agus a threorú ar an iomlán.

• 2.

  Bord Acadúil Feidhmiúcháin: den chuid is mó, is ionadaithe sinsearacha ó institiúidí sibhialta, taidhleoireachta, póilíneachta agus míleata atá air. Tá sé freagrach as cáilíocht agus as comhtháthú ghníomhaíochtaí oiliúna an CESC.

• 3.

  Ceannaire an CESC:tá ceannaire an CESC freagrach as gníomhaíochtaí oiliúna an CESC a eagrú agus a bhainistiú agus as bainistíocht airgeadais agus riaracháin an CESC .

• 4.

  Rúnaíocht an CESC:cuidíonn rúnaíocht an CESC le Ceannaire an CESC tascanna a chomhlíonadh .

Ar fhoireann CESC tá baill foirne atá ar iasacht don CESC ó institiúidí AE, ó na gníomhaireachtaí SEGS agus AE, chomh maith le saineolaithe náisiúnta ar iasacht ó thíortha AE.

Buiséad

Faigheann an CESC ranníocaíocht bhliantúil ó bhuiséad AE chomh maith le ranníocaíochtaí comhchineáil do ghníomhaíochtaí oiliúna an CESC. Faightear roinnt cistiúcháin bhreise ó na tíortha agus institiúidí AE nó ó bhronntóirí eile.

CÉN UAIR ATÁ TOSACH FEIDHME AN CHINNIDH?

Tá feidhm leis ón 1 Aibreán 2013.

CÚLRA

Cuireann an Coláiste Eorpach um Shlándáil agus um Chosaint oiliúint ar fáil maidir le comhbheartas slándála agus cosanta AE i gcomhthéacs an chomhbheartais eachtraigh agus slándála. Forbraítear comhthuiscint ar an CBSC ag an choláiste agus scaiptear dea-chleachtas sa réimse seo, leis.

GNÍOMH

Cinneadh 2013/189/CBES ón gComhairle an 22 Aibreán 2013 lena mbunaítear Coláiste Eorpach um Shlándáil agus um Chosaint (CESC) agus lena n-aisghairtear Gníomhaíocht Chomhpháirteach 2008/550/CBES (IO L 112, 24.4.2013, lgh. 22-29)

Rinneadh leasuithe leantacha ar Chinneadh 2013/189/CBES a chorprú sa bhuntéacs. Níl de luach ar an leagan comhdhlúite seo ach leagan doiciméadach amháin.

Nuashonraithe 04.07.2016