Faisnéis neamhairgeadais agus éagsúlachta á nochtadh ag cuideachtaí agus grúpaí móra

PRÍOMHPHOINTÍ

Tá feidhm ag an treoir maidir le cuideachtaí agus grúpaí móra áirithe ina bhfuil níos mó ná 500 fostaí.

Faisnéis

Ceanglaítear ar na cuideachtaí sin athbhreithniú a dhéanamh ar a samhlacha gnó, ar bheartais, ar na príomhrioscaí agus ar na príomhthorthaí, lena n–áirítear ar:

• cúrsaí comhshaoil;
• gnéithe sóisialta agus fostaithe;
• meas ar chearta an duine;
• ceisteanna um fhrith-éilliú agus breabaireacht.

Mura bhfuil beartas ag cuideachtaí ar cheann de na réimsí sin, ba chóir an fáth nach bhfuil a mhíniú sa ráiteas neamhairgeadais. Ní mór do chuideachtaí chomh maith tuairisc a thabhairt ar a bpolasaí maidir le héagsúlacht an bhoird stiúrthóirí.

Treoirlínte

Ba cheart do chuideachtaí an fhaisnéis sin a nochtadh ina dtuarascáil bhliantúil, cé gur roghnaigh roinnt tíortha AE a cheadú do chuideachtaí an fhaisnéis sin a nochtadh i dtuarascáil ar leith más mian leo. Agus a ráitis á n–ullmhú acu, féadfaidh cuideachtaí treoirlínte náisiúnta, Eorpacha nó idirnáisiúnta a úsáid amhail Comhshocrú Domhanda na Náisiún Aontaithe.

Sholáthair an Coimisiún Eorpach treoirlínte neamhcheangailteacha maidir le conas faisnéis neamhairgeadais a thuairisciú in 2017. In 2019 soláthróidh sé treoirlínte breise ar conas faisnéis faoin aeráid a thuairisciú.

Fochuideachtaí

Níl sé de cheangal ar fhochuideachta ráiteas a dhéanamh má tá an fhaisnéis san áireamh i dtuarascáil a máthairchuideachta (i.e. an chuideachta a rialaíonn bainistíocht agus oibriú na fochuideachta).