Cistí fiontraíochta sóisialta Eorpacha

PRÍOMHPHOINTÍ

• Díríonn gnólachtaí sóisialta ar chuspóirí sóisialta mar a n–aidhm chorparáideach, seachas ar bhrabúis a uasmhéadú amháin. Tá 10 % de chuideachtaí uile an Aontais Eorpaigh (AE) san earnáil fáis seo agus fostaíonn siad os cionn 11 mhilliún duine. Cé go bhfaigheann siad tacaíocht ón phobal go minic, is ríthábhachtach iad infheistíochtaí príobháideacha ó chistí a infheistíonn i bhfiontraithe sóisialta chun go n–éireoidh leo.
• Tá dhá fhadhb le sárú ag na cistí seo:
  • is féidir leis bheith costasach agus deacair ciste dá leithéid a chur ar bun agus infheisteoirí a mhealladh, go háirithe infheistíocht trasteorann.
  • ní bhíonn sé éasca i gcónaí d’infheisteoirí cistí dá leithéid a aithint ná na buntáistí a bhaineann le cineálacha éagsúla cistí a chur i gcomparáid lena chéile.
• Chun réidh a fháil leis na bacainní sin, ghlac AE reachtaíocht lena gcruthaítear lipéad le haghaidh cistí fiontraíochta sóisialta Eorpacha, á dhéanamh níos fusa d’infheisteoirí eolas a fháil faoi cheann scríbe a gcuid infheistíochtaí.
• Maidir leis an lipéad:
  • cabhraíonn sé leis an infheisteoir cistí fiontraíochta sóisialta Eorpacha a aithint agus a roghnú;
  • cabhraíonn sé le gnólachtaí sóisialta trí rochtain níos éasca ar mhaoiniú;
  • cuireann sé ar chumas bainisteoirí ar chistí infheistíochta maoiniú a chruinniú ar bhealach nach mbeadh chomh costasach ná chomh casta.
• Maidir le cistí a mhargaítear ag baint úsáid as an lipéad sin, ní mór 70 % ar a laghad dá n–infheistíochtaí a dhíriú ar ghnólachtaí sóisialta.
• Ina theannta sin, ní mór dóibh príomheolas a sholáthar d’infheisteoirí ar bhealach caighdeánaithe. Cumhdaítear leis an bhfaisnéis seo réimsí amhail iad seo a leanas:
  • cuspóirí sóisialta an chiste;
  • na gnólachtaí shóisialta a n–infheistítear iontu;
  • an dóigh a meastar an mbaineann na gnólachtaí sin a spriocanna sóisialta amach.
• Nuair a bheidh an t–eolas riachtanach curtha ar fáil ó chiste agus roinnt coinníollacha tábhachtacha maidir lena eagrú agus lena fheidhmiú á gcomhlíonadh aige, is féidir leis an gciste sin infheistíochtaí ó gach cearn de AE a bhailiú gan mórchostais a thabhú.
• I dteannta leis an riail maidir le 70 %, ní mór do bhainisteoir ciste dea–iompar an ghnólachta agus córais agus rialuithe éifeachtacha a thaispeáint agus ní mór dó coinbhleachtaí leasa a sheachaint. Sna tíortha ina bhfuil na cistí bunaithe déanann na húdaráis náisiúnta maoirseacht orthu agus is féidir leo lipéad a aistarraingt mura gcomhlíontar aon cheann de na coinníollacha riachtanacha.
• In 2014, ghlac an Coimisiún Eorpach gníomh cur chun feidhme (Rialachán Cur Chun Feidhme (AE) Uimh. 594/2014) ina ndéileáiltear le fógra imeachtaí a bhaineann le pas bainisteoirí na gcistí fiontraíochta sóisialta cáilitheacha agus le gnéithe a bhaineann le bainisteoir ciste fiontraíochta shóisialta Eorpaigh a bhaint den chlár.
• Mar cheann de na bearta faoi thionscnamh Aontas na Margaí Caipitil, leasaíodh an rialachán maidir le cistí fiontraíochta sóisialta Eorpacha le Rialachán (AE) 2017/1991 a ceapadh chun an margadh a oscailt do chistí fiontraíochta sóisialta incháilithe chun éifeachtaí scála a mhéadú, costais idirbheart agus oibriúcháin a laghdú, iomaíocht a mhéadú agus rogha infheisteoirí a neartú. Méadaítear leis úsáid ainmniú na “gcistí fiontraíochta sóisialta Eorpacha” chuig bainisteoirí gnóthas comhinfheistíochta¹ atá údaraithe faoi Threoir 2011/61/AE — féach an achoimre.
• Forlíontar le Rialachán Tarmligthe (AE) 2019/819 Rialachán (AE) Uimh. 346/2013 lena leagtar síos rialacha maidir le coinbhleachtaí leasa a bhaineann leis an méid seo a leanas:
  • na cineálacha coinbhleachtaí leasa;
  • an ceanglas maidir le beartas coinbhleachtaí leasa i scríbhinn a bhunú agus na nósanna imeachta agus na bearta nach mór a chuimsiú ar a laghad sa bheartas sin;
  • coinbhleachtaí leasa a bhainistiú;
  • straitéisí chun cearta vótála a fheidhmiú chun coinbhleachtaí leasa a chosc;
  • nochtadh na gcoinbhleachtaí leasa.
• Tugtar sonraí ann chomh maith maidir le nósanna imeachta chun tionchar sóisialta dearfach a thomhas agus ceanglais maidir le faisnéis réamhchonarthach a sholáthraítear d’infheisteoirí i réimse na gcistí fiontraíochta sóisialta Eorpacha.