Faisnéis bhunriachtanach faoi tháirgí infheistíochta

PRÍOMHPHOINTÍ

Faisnéis bhunriachtanach d’infheisteoirí miondíola

• Ní mór do tháirgeoir táirge infheistíochta a bhfuil sé beartaithe é a dhíol d’infheisteoirí miondíola doiciméad um fhaisnéis bhunriachtanach a sholáthar maidir leis an táirge. Ní mór dóibh siúd a dhíolann na táirgí infheistíochta sin nó a thugann comhairle ina leith doiciméad um fhaisnéis bhunriachtanach a chur ar fáil d’infheisteoir sula ndéantar comhaontú ar bith.
• Ba cheart go mbeadh trí leathanach sna doiciméid um fhaisnéis bhunriachtanach agus go soláthrófaí iontu faisnéis shoiléir maidir le táirge, rud a chuirfidh ar chumas an infheisteora cinneadh eolasach infheistíochta a dhéanamh.
• Ba cheart don fhaisnéis seo a leanas a bheith sna doiciméid um fhaisnéis bhunriachtanach:
  • ainm an táirge agus aitheantas an táirgeora;
  • na cineálacha infheisteoirí a bhfuil an táirge airgeadais ceaptha dóibh;
  • próifíl riosca agus luaíochta an táirge airgeadais, ina gcuimsítear táscaire riosca achomair, uasmhéid an chaipitil infheistithe a d’fhéadfaí a chailliúint agus cásanna feidhmíochta cuí maidir leis an táirge;
  • na costais a bheidh le híoc ag an infheisteoir a bhaineann leis an infheistíocht sa táirge airgeadais;
  • faisnéis faoi conas is féidir le hinfheisteoir gearán a dhéanamh nó cé leis is féidir an gearán a dhéanamh i gcás go bhfuil fadhb leis an táirge nó leis an duine a tháirgeann, a dhíolann nó a thugann comhairle maidir leis an táirge.

Rabhadh tuisceana maidir le táirgí infheistíochta atá deacair a thuiscint

I gcás go bhfuil sé an–deacair táirge infheistíochta a thuiscint, ní mór don soláthraí a áirithiú go bhfuil an rabhadh seo a leanas sa doiciméad um fhaisnéis bhunriachtanach: “Tá tú ar tí táirge a cheannach nach bhfuil simplí agus d’fhéadfadh sé a bheith deacair a thuiscint”.

Na táirgí infheistíochta atá cumhdaithe

• Baineann na rialacha le táirgí infheistíochta miondíola pacáistithe agus táirgí infheistíochta atá árachas–bhunaithe (ar a dtugtar PRIIPanna fosta). Is réimse caighdeánach táirgí infheistíochta iad sin a thairgeann bainc nó comhairleoirí airgeadais do thomhaltóirí de ghnáth, mar shampla, d’fhonn airgead a shábháil do chuspóir faoi leith amhail teach a cheannach nó d’oideachas linbh.
• Áirítear orthu sin cistí infheistíochta, táirgí infheistíochta árachas–bhunaithe, urrúis struchtúrtha miondíola, taiscí struchtúrtha agus táirgí struchtúrtha.

Pointe rochtana aonair Eorpach

Déantar airteagal nua i Rialachán leasaitheach (AE) Uimh. 2023/2869 a ionchorprú i Rialachán leasaitheach (AE) Uimh. 1286/2014 maidir le rochtain aonair ar an bpointe rochtana aonair Eorpach, arna bhunú faoi Rialachán (AE) 2023/2859 — féach an achoimre. Soláthrófar faisnéis phoiblí airgeadais agus faisnéis a bhaineann le trádáil faoi chuideachtaí de chuid an Aontais Eorpaigh (AE) agus faoi tháirgí infheistíochta AE faoin gcomhaontú um aitheantas frithpháirteach. Ón 10 Eanáir 2028, agus an doiciméad um fhaisnéis bhunriachtanach á chur ar fáil ag an bpobal faoi Rialachán (AE) Uimh. 86/2014, ceanglaítear leis an ngníomh leasaitheach ar an monaróir córas faireacháin an fhaisnéis sin a chur isteach ag an am céanna chuig an gcomhlacht bailiúcháin ábhartha chun go mbeifear ábalta í a rochtain ar an CFG. Leagtar amach leis an rialachán leasaitheach chomh maith na coinníollacha (i gcomhthéacs chur i bhfeidhm na faisnéise) nach mór don doiciméad um fhaisnéis a chomhlíonadh ina leith.

Gníomhartha tarmligthe

• Forlíontar le Rialachán Tarmligthe (AE) 2017/653, arna leasú le Rialachán Tarmligthe (AE) 2021/2268, Rialachán (AE) Uimh. 1286/2014.
• In Iarscríbhinn I leis bunaítear teimpléad comhchoiteann le haghaidh doiciméad um fhaisnéis bhunriachtanach ina ndéantar cur síos ar chuspóir an táirge infheistíochta chun cuidiú le hinfheisteoirí cineál, rioscaí, costais, (costais dul isteach/imeachta, costais leanúnacha agus theagmhasacha), gnóthachain agus caillteanais fhéideartha an táirge a thuiscint agus cuidiú leo é a chur i gcomparáid le táirgí eile.
• Ní mór faisnéis a sholáthar sna doiciméid um fhaisnéis bhunriachtanach, amhail:
  • ainm an táirge agus an mhonaróra, cineál PRIIP, a chuspóirí infheistíochta, infheisteoir miondíola beartaithe;
  • rioscaí agus toradh — táscaire riosca lena n–áirítear an phróifíl riosca agus luaíochta, táscaire riosca achomair, insintí i ndáil le táscaire riosca achomair, lena n–áirítear maidir le huaschaillteanas féideartha, agus teimpléid agus insintí cásanna feidhmíochta;
  • cad a tharlóidh mura bhfuil monaróir PRIIP ábalta eisíocaíocht a dhéanamh (faisnéis faoin scéim um ráthaíocht / um chúiteamh, na rioscaí atá clúdaithe agus na rioscaí nach bhfuil clúdaithe);
  • costais le himeacht ama agus comhdhéanamh na gcostas;
  • an tréimhse shealbhaíochta atá molta agus faisnéis faoi dhí–infheistiú roimh aibíocht agus na táillí/pionóis is infheidhme, más iomchuí;
  • conas is féidir le hinfheisteoir miondíola gearán a dhéanamh.
• Pléitear gnéithe eile sna hiarscríbhinní ina dhiaidh sin:
  • Iarscríbhinn II — modheolaíocht chun riosca a chur i láthair;
  • Iarscríbhinn III — cur i láthair an táscaire achomair riosca;
  • Iarscríbhinn IV — cásanna feidhmíochta;
  • Iarscríbhinn V — modheolaíocht chun cásanna feidhmíochta a chur i láthair;
  • Iarscríbhinn VI — modheolaíocht chun costais a ríomh;
  • Iarscríbhinn VII — costais a chur i láthair.