ACHOIMRE

Sa pháipéar seo ón gCoimisiún Eorpach, cuirtear bearta ar aghaidh chun rochtain ar amhábhair a dhaingniú agus a fheabhsú don Aontas Eorpach, ar ghné lárnach í le haghaidh iomaíochas an Aontais.

CAD A DHÉANTAR SA TEACHTAIREACHT?

Leantar le trí chuspóir an tionscnaimh um amhábhair (RMI), a dréachtaíodh in 2008, agus neartaítear iad:

soláthar inbhuanaithe agus cothrom ó na margaí idirnáisiúnta a áirithiú;
soláthar inbhuanaithe a chruthú laistigh den Aontas Eorpach;
éifeachtúlacht agus athchúrsáil acmhainní a neartú.

PRÍOMHPHOINTÍ

Bealach chun spriocanna na straitéise Eoraip 2020 maidir le fás cliste, inbhuanaithe agus uilechuimsitheach a bhaint amach (faoi chodanna na straitéise maidir leis an aontas nuálaíochta agus leis an Eoraip atá tíosach ar acmhainní).
An chomhpháirtíocht nuálaíochta Eorpach maidir le hamhábhair. Bunaithe in 2013, is é misean na comhpháirtíochta poiblí-príobháidí seo treoir ardleibhéil a chur ar fáil don Choimisiún Eorpach, do thíortha AE agus d’eagraíochtaí príobháideacha maidir le cuir chuige nuálacha i leith na ndúshlán a bhaineann le hamhábhair. Tá mar aidhm leis an méid a chuireann an tionscal le holltáirgeacht intíre (OTI) AE a mhéadú go timpeall 20 % faoi 2020.
Liosta de 14 amhábhar ríthábhachtacha* (méadaíodh an liosta sin go 20 amhábhar in 2014). Déantar athbhreithniú ar an liosta sin gach 3 bliana.
“Taidhleoireacht maidir le hamhábhair”. Is é atá i gceist leis sin saincheisteanna a bhaineann le hamhábhair a mhúscailt in idirphlé idir AE agus tíortha eile. I measc na dtopaicí a phléitear, áirítear follasacht shlabhra an tsoláthair, inrianaitheacht amhábhar (lena áirithiú go bhfoinsítear iad ar bhealach freagrach) agus oscailteacht airgeadais.

CÚLRA

Tá amhábhair ríthábhachtach do gheilleagar AE. Ní bhíonn sé éasca, uaireanta, iad a úsáid agus a eastóscadh go héifeachtach in AE mar gheall ar thosca inbhuanaitheachta agus ar dhlíthe dochta comhshaoil. Ag an am céanna, bíonn sé deacair soláthar seasta ó lasmuigh d’AE a áirithiú mar gheall ar chúinsí amhail bacainní trádála, éagobhsaíocht pholaitíochta, agus praghasluainithe (d’éirigh siad sin dian go maith in 2008).

Féach an beartas agus an straitéis um amhábhair ar láithreán gréasáin an Choimisiúin Eorpaigh chun tuilleadh faisnéise a fháil.

PRÍOMHTHÉARMAÍ

*Amhábhair is ea iad amhábhair“ríthábhachtacha”a bhfuil tábhacht eacnamaíoch leo (i dtéarmaí an luacha a chuirtear le OTI) ach a bhfuil a soláthar faoi bhagairt freisin (de bharr cúinsí éagsúla, amhail cobhsaíocht pholaitíochta nó cáilíocht rialála, lena ndéantar suas an táscaire rialála domhanda).
Cuimsítear ar liosta reatha na n-amhábhar ríthábhachtach antamón, beirilliam, bóráití, cróimiam, cóbalt, gual cóic, fluar, gailliam, gearmáiniam, indiam, maignéisít, maignéisiam, graifít nádúrtha, niaibiam, miotail de chuid an ghrúpa platanaim, carraig fosfáite, dúile tearc-chré (troma), dúile tearc-chré (éadroma), miotal sileacain, agus tungstan.

GNÍOMH

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún lena dtéitear i ngleic leis na dúshláin i margaí tráchtearraí agus maidir le hamhábhair (COM(2011) 25 final an 2.2.2011)