Trealamh a úsáidtear in atmaisféir inphléasctha (treoir ATEX)

ACHOIMRE AR:

Treoir 2014/34/AE maidir le comhchuibhiú dhlíthe na mBallstát a bhaineann le trealamh agus córais chosanta atá ceaptha lena n úsáid in atmaisféir a d’fhéadfadh a bheith pléascach.

CAD IS AIDHM LEIS AN TREOIR?

Leagtar síos leis an treoir ATEX rialacha aonfhoirmeacha ar fud an Aontais Eorpaigh (AE) maidir le trealamh agus le córais chosanta a cheaptar lena n úsáid in atmaisféir a d’fhéadfadh a bheith pléascach a dhíol agus a chur i seirbhís. Tá sé mar aidhm leis a áirithiú go gcomhlíonann táirgí ceanglais áirithe maidir le hardleibhéal cosanta a sholáthar do shláinte agus do shábháilteacht daoine, go háirithe oibrithe, agus, nuair is iomchuí, cosaint ainmhithe clóis agus maoine.

Tá feidhm aige maidir le réimse leathan táirgí, lena n áirítear trealamh a úsáidtear ar ardáin ola agus gáis seasta amach ón gcósta, i stáisiúin pheitriceimiceán, i mianaigh, i muilte plúir (tá cáithníní aer-iompartha plúir ard-inadhainte) agus i limistéir eile a bhféadfadh atmaisféar pléascach a bheith iontu.

PRÍOMHPHOINTÍ

Sainítear sa treoir freagrachtaí na monaróirí, na n allmhaireoirí agus na ndáileoirí sa mhéid a bhaineann le trealamh agus le córais chosanta lena n úsáid in atmaisféir inphléasctha a dhíol:

• Ní mór marcáil chomhréireachta CE a bheith ar na táirgí go léir a dhíoltar san Aontas. Taispeánann sé sin go gcloíonn na táirgí le bunriachtanais sábháilteachta reachtaíocht AE.
• Sular féidir marcáil chomhréireachta a fháil, bíonn ar an monaróir measúnú sábháilteachta agus comhréireachta a dhéanamh agus doiciméadúchán teicniúil a leagadh amach le haghaidh na dtáirgí.
• Bíonn ar allmhaireoirí a chinntiú go bhfuil measúnuithe cearta comhréireachta déanta ag na monaróirí. Mura bhfuil, ní mór dóibh é sin a chur in iúl don údarás um fhaireachán ar shábháilteacht.
• Ní mór an doiciméadúchán riachtanach go léir a thaifeadadh agus a choimeád ar feadh 10 mbliana.
• Ní mór an doiciméadúchán agus an fhaisnéis sábháilteachta a scríobh i dteanga a thuigfidh úsáideoirí deiridh go héasca;
• Ní mór do mhonaróirí agus d’allmhaireoirí a seoladh poist a léiriú ar a gcuid táirgí.
• Féadfaidh monaróirí meáin leictreonacha a úsáid chun an fhaisnéis atá ag teastáil chun comhlíonadh táirge a léiriú, a chur ar fáil do na húdaráis um fhaireachán ar shábháilteacht.

Ina theannta sin, sonraítear sa treoir na riachtanais atá le déanamh ag na húdaráis náisiúnta a dhéanann faireachán ar shábháilteacht, le gur féidir allmhairiú táirgí contúirteacha ó thíortha neamh-AE a aithint agus a chosc.

Gníomhartha cur chun feidhme

Tá an chumhacht ag an gCoimisiún Eorpach gníomhaíochtaí cur chun feidhme a ghlacadh:

Déantar na cinntí cur chun feidhme maidir le foilsiú an liosta de chaighdeáin chomhchuibhithe le haghaidh trealaimh agus córais chosanta atá beartaithe lena n úsáid in atmaisféir a d’fhéadfadh a bheith pléascach a fhoilsiú agus a thabhairt cothrom le dáta ar bhonn rialta.

Aisghairm

Leasaíodh agus aisghaireadh Treoir 94/9/CE leis le héifeacht ón 20 Aibreán 2016.

CÉN UAIR ATÁ TOSACH FEIDHME NA RIALACHA?

B’éigean an treoir a thrasuí sa dlí náisiúnta an 19 Aibreán 2016. Tá na rialacha sin i bhfeidhm ón 20 Aibreán 2016.

CÚLRA

Nuashonraítear sa treoir na rialacha AE maidir le trealamh agus le córais chosanta a cheaptar lena n úsáid in atmaisféir inphléasctha a dhíol. Is cuid é sin den iarracht an dlí Eorpach a nuachóiriú i réimse leathan earnálacha tionsclaíocha chun na rialacha a shimpliú, ualaí riaracháin a laghdú agus rialacha níos soiléire agus níos comhsheasmhaí a chur ar bun.

Le haghaidh tuilleadh faisnéise, féach:

• Trealamh le haghaidh atmaisféir a d’fhéadfadh a bheith pléascach (ATEX) (An Coimisiún Eorpach).

PRÍOMHDHOICIMÉAD

Treoir 2014/34/AE ó Pharlaimint na hEorpa agus ón gComhairle an 26 Feabhra 2014 maidir le comhchuibhiú dhlíthe na mBallstát a bhaineann le trealamh agus le córais chosanta atá beartaithe lena n úsáid in atmaisféir a d’fhéadfadh a bheith pléascach (athmhúnlú) (IO L 96, 29.3.2014, lgh. 309-356).

DOICIMÉID GHAOLMHARA

Treoir 1999/92/CE ó Pharlaimint na hEorpa agus ón gComhairle an 16 Nollaig 1999 maidir le híosriachtanais chun sábháilteacht agus cosaint sláinte oibrithe a d’fhéadfadh a bheith i mbaol ó atmaisféir phléascacha a fheabhsú (15ú Treoir aonair de réir bhrí Airteagal 16(1) de Threoir 89/391/CEE) (IO L 23, 28.1.2000, lgh. 57-64).

Rinneadh leasuithe comhleanúnacha ar Threoir 1999/92/CE a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Nuashonraithe 28.10.2022