Clásal dlúthpháirtíochta an Aontais Eorpaigh a chur i ngníomh

Cinneadh 2014/415/AE ón gComhairle maidir le cur i bhfeidhm an chlásail dlúthpháirtíochta

GNÍOMH

Cinneadh 2014/415/AE ón gComhairle an 24 Meitheamh 2014 maidir leis na socruithe a bhaineann le cur i bhfeidhm an chlásail dlúthpháirtíochta ag an Aontas.

ACHOIMRE

Buíochas leis an gclásal dlúthpháirtíochta, cuirtear ar chumas an Aontais Eorpaigh (AE) agus na mBallstát AE gníomhú i dteannta a chéile chun cuidiú le Ballstát AE eile, Ballstát a ndearnadh ionsaí sceimhlitheoireachta air nó a tharla tubaiste nádúrtha nó shaorga ann.

CÉARD A DHÉANANN AN CINNEADH SEO?

Leagtar síos sa chinneadh na rialacha agus na nósanna imeachta a bhaineann leis an gclásal dlúthpháirtíochta a fheidhmiú. Áirithíonn an cinneadh go n-oibríonn na páirtithe uile ar leibhéal náisiúnta agus ar leibhéal AE as lámha a chéile chun freagairt go tapa, go héifeachtach agus go comhsheasmhach d’ionsaithe sceimhlitheoireachta nó do thubaistí nádúrtha nó saorga.

PRÍOMHPHOINTÍ

Cuirtear an clásal i bhfeidhm:

• maidir le tubaistí agus le hionsaithe sceimhlitheoireachta i gcríoch AE, ar an talamh, ar muir nó san aer;
• maidir le cosaint an bhonneagair (amhail rigí gáis agus ola amach ón gcósta) in uiscí teorann na mBallstát AE;
• is cuma pé áit a thosaíonn an ghéarchéim (in AE nó lasmuigh de).

Leas a bhaint as an gclásal dlúthpháirtíochta

Féadfaidh an Ballstát AE lena mbaineann leas a bhaint as an gclásal dlúthpháirtíochta má mheastar go bhfuil an iomarca brú á chur ar chumais fhreagartha an Bhallstáit.

Ní mór don Bhallstát a iarratas a chur in iúl d’Uachtaránacht na Comhairle agus d’Uachtarán an Choimisiúin Eorpaigh trí mheán Ionad Freagartha Éigeandála an Choimisiúin.

Sásra freagartha in AE

A luaithe is a bhaintear leas as an gclásal dlúthpháirtíochta, baineann AE feidhm as na hionstraimí agus as na struchtúir uile a bhfuil rochtain aige orthu, ar ionstraimí agus struchtúir oibríochtúla, beartais nó airgeadais iad a bhaineann le hearnáil áirithe. Áirítear leis na hionstraimí agus na struchtúir seo Sásra Cosanta Sibhialta AE, na hionstraimí a thagann faoi Straitéis Slándála Inmheánaí AE agus na struchtúir arna bhforbairt i gcomhthéacs Chomhbheartas Slándála agus Cosanta AE (CBSC).

Buíochas leis an gComhairle, áirithítear treo polaitiúil agus straitéiseach na freagartha, agus inniúlachtaí an Choimisiúin agus an Ard-Ionadaí á gcur san áireamh go hiomlán. Gníomhachtaítear na Socruithe i leith Freagartha Comhtháite do Ghéarchéim Pholaitiúil (IPCR) ar an bpointe ag an gComhairle, rud a áirithíonn freagairt chomhsheasmhach ar leibhéal AE.

San am céanna, déanann an Coimisiún agus Ard-Ionadaí AE:

• na hionstraimí agus na cumais uile a aithint a thabharfaidh cabhair den scoth chun freagairt don ghéarchéim;
• moltaí a chur faoi bhráid na Comhairle le haghaidh beart eisceachtúil nó le haghaidh bearta a thacaíonn le mearfhreagairt na mBallstát AE.

CATHAIN A MBEIDH FEIDHM AG AN GCINNEADH?

Cuireadh an cinneadh i bhfeidhm an 20 Iúil 2014.

CÚLRA

Cuirtear Airteagal 222 den Chonradh ar Fheidhmiú an Aontais Eorpaigh (CFAE) i bhfeidhm le clásal dlúthpháirtíochta AE.

Nuashonraithe 21.09.2015