Fuinneamh glan don iompar: Straitéis Eorpach um breoslaí ionadúla

Braitheann an Eoraip go mór ar an ola allmhairithe mar bhreosla don chóras iompair Eorpach, rud atá an-chostasach don gheilleagar Eorpach, atá ina chúis imní maidir le slándáil an tsoláthair, agus atá neamh-inbhuanaithe ó thaobh an chomhshaoil de san fhadtéarma. Ní mór breoslaí ionadúla a bhfuil an bonneagar riachtanach ag gabháil leo a chur in ionad an spleáchais sin.

GNÍOMH

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún - Fuinneamh glan don iompar: Straitéis Eorpach um breoslaí ionadúla (COM(2013) 17 final an 24.1.2013).

ACHOIMRE

Braitheann an Eoraip go mór ar an ola allmhairithe mar bhreosla don chóras iompair Eorpach, rud atá an-chostasach don gheilleagar Eorpach, atá ina chúis imní maidir le slándáil an tsoláthair, agus atá neamh-inbhuanaithe ó thaobh an chomhshaoil de san fhadtéarma. Ní mór breoslaí ionadúla a bhfuil an bonneagar riachtanach ag gabháil leo a chur in ionad an spleáchais sin.

CÉARD A DHÉANANN AN TEACHTAIREACHT?

Leagtar amach sa teachtaireacht straitéis uilechuimsitheach le haghaidh breoslaí ionadúla agus mínítear inti conas breoslaí ionadúla a chur i bhfeidhm le haghaidh gach cineál iompair. Cuimsíonn an straitéis forbairtí teicneolaíochta agus infheistíocht in úsáid breoslaí nua. Sonraítear inti freisin conas na sochair a mhíniú do mhuintir an phobail.

PRÍOMHPHOINTÍ

• Níl réiteach aonair breosla ann do na cineálacha éagsúla iompair - iompar ar bóthar (paisinéirí agus lastas), iompar ar iarnród, aeriompar agus iompar ar uisce.
• Gás: tá deiseanna ann trí ghás peitriliam leachtach agus trí ghás nádúrtha, lena n-áirítear bithmheatán, gás nádúrtha leachtach, gás nádúrtha comhbhrúite agus gás go leacht.
• Leictreachas: tá méadú ag teacht ar líon na bhfeithiclí leictreacha a úsáideann leictreachas ón ngreille de réir mar a bhfuil forbairt ag teacht ar an teicneolaíocht.
• Bithbhreoslaí: an cineál breosla ionadúil is tábhachtaí maidir leis an sprioc fuinnimh in-athnuaite de 10 % a bhaint amach faoi 2020. Ba é an meánchuid d’fhoinsí fuinnimh in-athnuaite maidir le hídiú breosla iompair sna 28 mBallstát AE ná 5,1 % sa bhliain 2012.
• Hidrigin: tá méadú leanúnach ag teacht ar líon na gceall breosla hidrigine atá á n-úsáid i ngluaisteáin, i mbusanna, i veaineanna éadroma agus san iompar intíre.
• Bonneagar chun breoslaí ionadúla a dháileadh: ní mór bonneagar chomh fairsing agus is féidir a chur ar fáil ionas go mbeidh monaróirí in ann leas a bhaint as barainneachtaí scála agus ionas go mbeidh úsáideoirí in ann leas a bhaint as líonra leordhóthanach.
• Caighdeáin: tá sonraíochtaí coiteanna teicniúla agus sábháilteachta riachtanach, go háirithe le haghaidh feithiclí leictreonacha.
• Glacadh tomhaltórí: ba cheart go gcuirfí muintir an phobail ar an eolas faoi bhuntáistí na gcineálacha nua breosla agus ba cheart go spreagfar iad chun glacadh go hiomlán leo.

CÚLRA

Sa bhliain 2012, úsáideadh ola chun 94 % den fhuinneamh a ghiniúint a úsáideadh san earnáil iompair, sin easnamh de thimpeall 2,5 % den olltáirgeacht intíre i gcomhardú trádála AE. D’fhéadfaí breoslaí ionadúla a úsáid chun bille allmhairithe ola AE a laghdú €4,2 billiún faoi 2020, ag ardú go €9,3 billiún sa bhliain 2030.

Féach láithreán gréasáin an Choimisiúin Eorpaigh maidir le Fuinneamh glan don iompar chun tuilleadh faisnéise a fháil.

Nuashonraithe 30.04.2015