Imoibreoirí núicléacha sa Liotuáin - cúnamh AE don díchoimisiúnú

Ghlac an Liotuáin uirthi féin, le linn caibidlíochta chun dul isteach san Aontas Eorpach (AE), go ndúnfaí an stáisiún núicléach Ignalina - atá leagtha amach cosúil le Chernobyl - faoi dháta comhaontaithe. D’aontaigh AE go gcabhrófaí leis an Liotuáin íoc as na costais arda a bhaineann leis an bpróiseas díchoimisiúnaithe*.

ACHT

Rialachán (AE) Uimh. 1369/2013 ón gComhairle an 13 Nollaig 2013 maidir le tacaíocht an Aontais do chláir chúnaimh um dhíchoimisiúnú núicléach sa Liotuáin, agus lena n-aisghairtear Rialachán (CE) Uimh. 1990/2006.

ACHOIMRE

CÉARD A DHÉANANN AN RIALACHÁN SEO?

Déantar cur síos sa rialachán ar chlár tacaíochta airgeadais AE maidir le díchoimisiúnú gnéithe d’aonaid 1 agus 2 de stáisiún núicléach Ignalina sa Liotuáin.

PRÍOMHPHOINTÍ

Is iad seo a leanas cuspóirí sonracha chlár Ignalina:

• an breosla a bhaint de chroí imoibreora aonaid 2 agus de linnte breosla imoibreora aonad 1 agus 2, agus an breosla spíonta a bhogadh chuig saoráid ina stóráiltear breosla spíonta tirim;
• na haonaid imoibreora a chothabháil go sábháilte,;
• an halla tuirbíní agus na foirgnimh chúnta eile a dhíchóimeáil agus dramhaíl an díchoimisiúnaithe a bhainistiú go sábháilte i gcomhréir le plean mionsonraithe um bainistíocht dramhaíola.

Comhchlár oibre bliantúil

Gach bliain, idir 2014 agus 2020, glacfaidh an Coimisiún Eorpach le comhchlár oibre bliantúil le haghaidh Ignalina. Sonrófar sna comhchláir sin cuspóirí, torthaí a bhfuiltear ag súil leo, táscairí feidhmíochta agus amlíne maidir le húsáid na gcistí.

Buiséad

Gheobhaidh an clár síntiús €450,818,000 ag praghsanna reatha ón Aontas Eorpach.

CATHAIN A MBEIDH FEIDHM AG AN RIALACHÁN SEO?

Ón 1 Eanáir 2014 ar aghaidh. Aisghaireadh Rialachán (CE) Uimh. 1990/2006 le héifeacht ón dáta céanna.

EOCHAIRTHÉARMA

Díchoimisiúnú: an chéim dheireanach i saolré gléasra núicléach amhail stáisiún cumhachta nó imoibreoir taighde. Tagraíonn an téarma do gach uile ghníomh, idir an gléasra a dhúnadh agus an t-ábhar núicléach a bhaint amach agus limistéar an láithreáin agus an limistéar thart timpeall air a athbhunú. Tógfaidh an próiseas seo suas le 30 bliain.

Féach leathanach Gréasáin an Choimisiúin Eorpaigh maidir le díchoimisiúnú saoráidí núicléacha chun tuilleadh faisnéise a fháil.

Nuashonraithe 17.03.2015