An dul chun cinn a dhéantar maidir le spriocanna fuinnimh in-athnuaite 2020 an Aontais Eorpaigh a bhaint amach

ACHOIMRE AR:

Tuarascáil ar an dul chun cinn maidir le fuinneamh in-athnuaite – COM(2015) 293 final

ACHOIMRE

CÉARD A DHÉANANN AN TUARASCÁIL SEO?

Déantar measúnú sa tuarascáil seo ar an dul chun cinn atá déanta ag an Aontas Eorpach (AE) agus ag na tíortha AE maidir leis na spriocanna seo a leanas a bhaint amach: 20 % d’ídiú iomlán fuinnimh agus 10 % d’ídiú fuinnimh san earnáil iompair a fháil ó fhoinsí in-athnuaite* faoi 2020. Comhlíonann an tuarascáil na riachtanais atá leagtha amach sa Treoir maidir le Fuinneamh In-athnuaite 2009, treoir a bhfuil riachtanas inti chun tuarascálacha a chur le chéile gach 2 bhliain i ndáil leis an dul chun cinn a dhéantar maidir le fuinneamh in-athnuaite.

PRÍOMHPHOINTÍ

• Sonraítear sa tuarascáil seo go dtagann cion 15.3% d’ídiú iomlán fuinnimh AE ó fhoinsí in-athnuaite (2014). Mar sin, tá ag éirí go maith ag AE ar an iomlán maidir leis an sprioc 20 % a bhaint amach.
• Socraíonn na tíortha AE a spriocanna fuinnimh in-athnuaite féin agus cur chuige chun na spriocanna sin a chomhlíonadh. Déantar comhpháirteanna éagsúla a chumhdach sna pleananna náisiúnta gníomhaíochta sin, amhail:
  • spriocanna aonair fuinnimh in-athnuaite don earnáil leictreachais, don earnáil téimh/fuaraithe agus don earnáil iompair;
  • bearta riachtanacha beartais chun spriocanna náisiúnta a bhaint amach; agus
  • an meascán foinsí in-athnuaite a bhfuil sé beartaithe ag an tír AE é a úsáid.
• Meastar go n-éireoidh le 25 de na 28 dtír AE a spriocanna 2020 a chomhlíonadh, agus go ndéanfaidh 19 de na 25 thír sin a spriocanna a shárú.
• Tá dul chun cinn níos lú déanta maidir le 10 % d’ídiú fuinnimh a bhaint amach san earnáil iompair ó fhoinsí in-athnuaite faoi 2020. Níor baineadh amach ach 5.7% ar an meán in AE in 2014.
• Leagann na tíortha AE spriocanna eatramhacha dhá bhliain amach suas go dtí 2020. Éireoidh na spriocanna níos uaillmhianaí agus, mar sin, beidh ar thíortha AE áirithe iarrachtaí níos mó a dhéanamh nó dul i gcomhar le tíortha AE eile chun na spriocanna sin a bhaint amach.
• Deimhnítear sa tuarascáil freisin go bhfuil an treoir maidir le fuinneamh in-athnuaite ag obair go maith; tháinig laghdú ar astaíochtaí CO₂ agus laghdaíodh an spleáchas ar bhreoslaí iontaise. Fuarthas sa tuarascáil freisin go gcuireann spriocanna 2020 go mór le hinfheistíochtaí domhanda i bhfuinneamh in-athnuaite.

CÚLRA

Cheadaigh AE an chéad dlí maidir le fuinneamh in-athnuaite in 2001, Treoir 2001/77/CE, a chuir leictreachas ó fhoinsí in-athnuaite chun cinn. Cuireadh Treoir 2003/30/CE i bhfeidhm ina dhiaidh sin, lena leagadh síos bonn dlíthiúil maidir le húsáid bithbhreoslaí agus foinsí in-athnuaite eile san earnáil iompair. Rinneadh an bealach a réiteach leis na treoracha sin don treoir um fhuinneamh in-athnuaite in 2009.

EOCHAIRTHÉARMAÍ

*Déanannfoinsí in-athnuaitetagairt d’fhoinsí f uinnimh nach féidir iad a laghdú, amhail cumhacht na gaoithe, cumhacht na gréine nó bithmhais inbhuanaithe. De réir réamh-mheastachán 2014, ba iad bithmhais (47 %), hidreachumhacht (17 %) agus cumhacht na gaoithe (11 %) na trí phríomhfhoinse fhuinnimh in-athnuaite in AE.

GNÍOMH

Tuarascáil ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún: Tuarascáil ar an dul chun cinn maidir le fuinneamh in-athnuaite (COM(2015) 293 final an 15.6.2015)

GNÍOMHARTHA GAOLMHARA

Treoir 2009/28/CE ó Pharlaimint na hEorpa agus ón gComhairle an 23 Aibreán 2009 maidir le húsáid fuinnimh ó fhoinsí in-athnuaite a chur chun cinn agus lena leasaítear agus lena n-aisghairtear ina dhiaidh sin Treoir 2001/77/CE agus Treoir 2003/30/CE (IO L 140, 5.6.2009, lgh. 16-62)

Ionchorpraíodh sa bhuntéacs leasuithe i ndiaidh a chéile ar Threoir 2009/28/CE. Is chun críocha doiciméadúcháin amháin an leagan comhdhlúite seo.

Nuashonraithe 10.11.2015