Cumas cruthaithe fostaíochta na hearnála comhshaoil

Is ríthábhachtach é fás atá inbhuanaithe ó thaobh an chomhshaoil de toisc nach bhfuil sochaí thraidisiúnta an tomhaltais, ina chaitear rudaí amach, inmharthana níos mó de bharr amhábhar atá i ngannchúis, agus méadú leanúnach ag teacht ar an ngannchúis sin. Spreagann an geilleagar glas, nó geilleagar ciorclach, an fostaíocht nua freisin.

ACHT

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún - An Tionscnamh um Poist Ghlasa: Leas a bhaint as cumas cruthaithe fostaíochta an gheilleagair ghlais (COM(2014) 446 final, 2.7.2014).

ACHOIMRE

CÉARD A DHÉANANN AN TEACHTAIREACHT SEO?

Déantar cur síos sa teachtaireacht ar an gcaoi ar féidir scileanna agus beartais mhargadh an tsaothair a fhorbairt agus a spreagadh chun tacú le fostaíocht agus chun fostaíocht a chruthú de réir mar a chuirtear an geilleagar glas i bhfeidhm.

PRÍOMHPHOINTÍ

Moltar sa teachtaireacht gur cheart díriú ar na ceithre réimse seo a leanas agus iarracht á déanamh ag AE aistriú chuig geilleagar glas atá tíosach ar fhuinneamh a spreagadh:

• An bhearna scileanna a dhúnadh. Ní mór bearta a chur i bhfeidhm (ar leibhéal AE agus ar leibhéal náisiúnta) chun forbairt lucht oibre oilte a spreagadh a bheadh in ann an t-éileamh méadaitheach ó éicithionscail atá ag leathnú a chomhlíonadh. Tá réamhaisnéis níos fearr de dhíth chun na héilimh thodhchaíocha sin a aithint.
• Athrú a thuar. Is féidir tréimhsí ina dtarlaíonn mórathruithe eacnamaíocha a shárú níos fearr trí anailís shoiléir a dhéanamh orthu roimh ré agus trí iad a bhainistiú ar mhodh éifeachtach íogair (.i. comhar níos dlúithe idir an lucht bainistíochta agus na hoibrithe). Beidh gá le treoirlínte ar leith sna hearnálacha ina dtiocfaidh an t-athrú is mó orthu agus ina mbainfear na bacainní a chuireann cosc ar oibrithe bogadh chuig poist nua in áit éigin eile.
• Cruthú fostaíochta a thacú. D’fhéadfaí maoiniú ó na cistí éagsúla AE sóisialta, réigiúnacha, talmhaíochta agus comhshaoil agus ó chistí eile a úsáid chun fás inbhuanaithe agus chun cruthú fostaíochta a chur chun cinn. Moltar sa teachtaireacht gur cheart aistriú i dtreo cánachais chomhshaoil (.i. cánacha a ghearradh ar údar an truaillithe), agus deireadh a chur de réir a chéile le cánacha saothair.
• Caighdeán sonraí a fheabhsú. Ní mór sainmhínithe comhaontaithe ginearálta a leagadh amach don gheilleagar glas*, don fhás atá inbhuanaithe ó thaobh an chomhshaoil de* agus do phoist ghlasa* chun léargas níos soiléire a fháil ar na hathruithe a chuirtear i bhfeidhm agus chun fianaise níos cruinne a chur ar fáil don lucht déanta beartas le haghaidh cinntí todhchaíocha.

EOCHAIRTHÉARMAÍ

Geilleagar glas: geilleagar a dhéanann iarracht fás eacnamaíoch, inbhuanaitheacht chomhshaoil agus cuimsiú sóisialta a chur chun cinn.

Fás atá inbhuanaithe ó thaobh an chomhshaoil de: úsáid acmhainní atá comhoiriúnach maidir leis an éiceolaíocht agus éifeachtúlacht eacnamaíoch.

Post glas: post a chuireann le caighdeán an chomhshaoil a chaomhnú nó a athbhunú, cibé maidir le talmhaíocht, le tionscal, le seirbhísí nó le riarachán.

CÚLRA

Ní féidir an t-athrú chuig geilleagar glas a sheachaint toisc mhéadú ar ghanntanas na n-acmhainní agus toisc chostais fuinnimh agus amhábhar atá ag méadú. Má théitear leis an athrú san Eoraip, beimid níos iomaí go ginearálta, cruthófar fostaíocht inbhuanaithe d’ardchaighdeán agus cosnófar leas na nglúnta amach anseo. In ainneoin na géarchéime eacnamaíche agus airgeadais, tháinig méadú ar líon na bpost in earraí agus i seirbhísí comhshaoil in AE ó 3 mhilliún sa bhliain 2002 go dtí 4.2 milliún sa bhliain 2011.

Féach láithreán gréasáin an Choimisiúin Eorpaigh maidir leis an ngeilleagar glas chun tuilleadh faisnéise a fháil.

Nuashonraithe 08.12.2014