Cúnamh airgeadais don Spáinn
ACHOIMRE AR:
Cinneadh 2012/443/AE — bearta sonracha chun cobhsaíocht airgeadais a threisiú sa Spáinn
CAD IS AIDHM LEIS AN GCINNEADH?
Ceadaíodh leis clár um chúnamh airgeadais chun cuidiú leis an Spáinn a hearnáil baincéireachta a athchaipitliú agus a athstruchtúrú.
PRÍOMHPHOINTÍ
- Sa chlár um chúnamh airgeadais arna chomhaontú ag airí airgeadais an limistéir euro i mí Iúil 2012 sholáthair tíortha an limistéir euro maoiniú suas le €100 billiún don Spáinn ar feadh 18 mí.
- Ní raibh ach thart ar €38.9 mbilliún den chúnamh curtha ag obair ag an Spáinn chun a cuid bainc a athchaipitliú agus €2.5 bhilliún eile chun an chuideachta bainistíochta infheistíochta as an Spáinn, Sareb, a chaipitliú, nuair a tháinig deireadh leis an gclár i mí Eanáir 2014.
- Mar mhalairt ar an gcúnamh, b’éigean don Spáinn, i gcomhairle leis an mBanc Ceannais Eorpach (BCE), leis an Údarás Baincéireachta Eorpach (ÚBE) agus leis an gCiste Airgeadaíochta Idirnáisiúnta (CAI), an méid seo a leanas a dhéanamh:
- riachtanais chaipitil na mbanc aonair a shainaithint trí athbhreithniú cuimsitheach ar cháilíocht sócmhainní a dhéanamh ar an earnáil agus tástálacha struis ó bhanc go banc a dhéanamh;
- athchaipitliú, athstruchtúrú agus/nó réiteach ordúil a fháil ar bhainc laga, agus an costas ar cháiníocóirí a íoslaghdú;
- droch–shócmhainní na mbanc a fhaigheann tacaíocht phoiblí a scaradh amach óna chéile agus iad a aistriú chuig an gcuideachta bainistíochta infheistíochta Sareb;
- a córais rialála agus maoirseachta a neartú agus rialachas a threisiú.
- Gach 3 mhí, sheiceáil an Coimisiún Eorpach, BCE agus ÚBE an raibh, an Spáinn ag comhlíonadh na gcoinníollacha a bhí ag gabháil leis an gcúnamh.
- Tar éis don Spáinn an clár a fhágáil i mí na Nollag 2013, lean an Coimisiún ag faire ar gheilleagar na Spáinne agus ar a hearnáil airgeadais faoi na bearta faireachais iarchláir atá leagtha amach i Rialachán (AE) Uimh. 472/2013.
- Tá an Spáinn faoi réir fhaireachais iarchláir an Aontais Eorpaigh (AE) faoi láthair. Faoin socrú sin, déanfaidh an Coimisiún, ag obair le BCE, an méid seo a leanas:
- cuairteanna rialta a thabhairt ar an tír chun measúnú a dhéanamh ar gheilleagar na Spáinne agus ar a earnáil airgeadais;
- ullmhóidh sé tuarascálacha leathbhliantúla chun faireachán a dhéanamh ar dhul chun cinn agus a chinneadh an bhfuil gá le bearta breise.
- Leanfar den fhaireachas go dtí go mbeidh 75% ar a laghad de na hiasachtaí a fuair sí íoctha ar ais ag an Spáinn.
CÉN UAIR ATÁ TOSACH FEIDHME AN CHINNIDH?
Tá sé i bhfeidhm ón 24 Iúil 2012.
CÚLRA
Ar an 25 Meitheamh 2012, d’iarr rialtas na Spáinne cúnamh airgeadais seachtrach faoi théarmaí an chláir um chúnamh airgeadais d’fhonn institiúidí airgeadais a athchaipitliú tríd an tSaoráid Eorpach um Chobhsaíocht Airgeadais.
Chomhaontaigh na Ceannairí Stáit agus an Rialtas ag Cruinniú Mullaigh an Limistéir Euro an 29 Meitheamh 2012 go dtiocfadh an cúnamh ina dhiaidh sin ón Sásra Cobhsaíochta Eorpach, ach nach dtabharfaí an tosaíocht chéanna ina leith i gcomhair aisíocaíochta agus a thugtar i leith iasachtaí eile de chuid na Saoráide Eorpaí um Chobhsaíocht Airgeadais. Síníodh an meabhrán tuisceana ar an 23 Iúil. Glacadh san áireamh ina chur chun feidhme iomlán gach breithniú ábhartha eile a bhí i ráiteas Chruinniú Mullaigh an Limistéir Euro an 29 Meitheamh 2012.
Rinne an Coimisiún agus BCE dlúthmhonatóireacht ar fheidhmiú an chláir; rinne BCE agus an tSaoráid Eorpach um Chobhsaíocht Airgeadais páirtmhonatóireacht air freisin. Ghlac an Ciste Airgeadais Idirnáisiúnta dhlúthpháirt sa mhonatóireacht sin freisin.
Le haghaidh tuilleadh faisnéise, féach:
PRÍOMHDHOICIMÉAD
Cinneadh 2012/443/AE ón gComhairle an 23 Iúil 2012 ina dtugtar aghaidh ar an Spáinn maidir le bearta sonracha chun cobhsaíocht airgeadais a threisiú (IO L 202, 28.7.2012, lgh. 17-20).
DOICIMÉID GHAOLMHARA
Rialachán (AE) Uimh. 407/2010 ón gComhairle an 11 Bealtaine 2010 lena mbunaítear sásra cobhsaíochta airgeadais Eorpach (IO L 118, 12.5.2010, lgh 1-4).
Rinneadh leasuithe comhleanúnacha ar Rialachán (CE) Uimh. 407/2010 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.
Rialachán (AE) Uimh. 472/2013 ó Pharlaimint na hEorpa agus ón gComhairle an 21 Bealtaine 2013 maidir le neartú ar an bhfaireachas eacnamaíoch agus buiséadach ar Bhallstáit sa limistéar euro a bhfuil deacrachtaí tromchúiseacha acu nó a bhfuil deacrachtaí tromchúiseacha ag bagairt orthu i ndáil lena gcobhsaíocht airgeadais (IO L 140, 27.5.2013, lgh. 1-10).
Nuashonraithe 02.06.2022