Príomhchógais áirithe do thíortha i mbéal forbartha — sraonadh trádála isteach in AE a sheachaint

ACHOIMRE AR:

Rialachán (AE) 2016/793 — sraonadh trádála príomhchógas áirithe isteach san Aontas Eorpach a sheachaint

CAD IS AIDHM LEIS AN RIALACHÁN?

• Bunaítear leis córas praghsála difreáilte i gcomhair drugaí chun na trí mhórghalar theagmhálacha (VEID/SEIF, maláire, eitinn agus galair faille ghaolmhara) a chóireáil. Tugtar “táirgí cisealphraghsáilte”* ar na drugaí sin.
• Tugtar isteach leis rialuithe lena áirithiú go rachaidh na cógais níos saoire sin chuig an áit atá ceaptha dóibh, agus nach ar an margadh dubh in AE a chuirfear iad sa deireadh.

PRÍOMHPHOINTÍ

• I gcás monaróirí agus onnmhaireoirí ar mian leo praghsanna a dhifreáil, ní mór dóibh ceadú a fháil ar dtús ón gCoimisiún Eorpach.
• Chun an ceadú sin a fháil, ní mór dóibh ainm an chógais agus an comhábhar gníomhach nó na comhábhair ghníomhacha atá ann a sholáthar, mar aon lena phraghas, a uimhir chóid agus na tíortha ina mbeidh sé ar díol.
• Nuair a bhíonn an stádas “cisealphraghsáilte” tugtha do tháirge, cuirtear lógó sainiúil ar an bpacáistíocht agus na doiciméid go léir ionas gur furasta é a aithint.
• D’fhéadfadh an “cisealphraghas” i leith na ndrugaí sin a bheith cothrom le 25 % den mheánphraghas a ghearrtar sna tíortha atá ina mbaill den Eagraíocht um Chomhar agus Forbairt Eacnamaíochta (ECFE), nó cothrom leis na costais dhíreacha táirgthe móide 15 %.
• Tá 76 thír, ón Afganastáin go dtí an tSiombáib, incháilithe i gcomhair an tsocraithe speisialta praghsála sin.
• Má fhaightear amach go bhfuil ceann ar bith de na cógais ar phraghas íseal á allmhairiú ar ais chuig AE, féadfar é a choigistiú agus a dhíothú mura dtoileoidh an t-allmhaireoir é a chur ar fáil chun cuspóirí daonnúla.
• Déantar códú i Rialachán (AE) 2016/793 ar Rialachán (CE) Uimh. 953/2003 ón gComhairle.

CÉN UAIR ATÁ TOSACH FEIDHME AN RIALACHÁIN?

Tá sé i bhfeidhm ón 13 Meitheamh 2016.

CÚLRA

• Ní mór do thíortha i mbéal forbartha rochtain a bheith acu ar dhrugaí ar phraghas réasúnta chun dul i ngleic le galair amhail VEID/SEIF, maláire agus eitinn. D’fhonn monaróirí cógas leighis a spreagadh chun na drugaí sin a sholáthar ar phraghas laghdaithe, ní mór bearta a bheith i bhfeidhm ionas nach gcuirfear ar ais chuig AE iad, áit a bhfuil costas na gcógas céanna sin níos airde.
• Is é an buntáiste a bhaineann le “cisealphraghsáil” ná go bhfuil sí ina spreagadh ag monaróirí i dtaobh na cógais a dháileadh ar thíortha spriocdhírithe ar an bpraghas is ísle is féidir (an “cisealphraghas”), agus a gcuid costas taighde agus forbartha á n-aisghabháil acu trí mheán na bpraghsanna níos airde a ghearrtar i dtíortha ECFE.
• Le haghaidh tuilleadh faisnéise, féach:
  • “Rochtain ar chógais” ar shuíomh gréasáin an Choimisiúin Eorpaigh.

* PRÍOMHTHÉARMAÍ

PRÍOMHDHOICIMÉAD

Rialachán (AE) 2016/793 ó Pharlaimint na hEorpa agus ón gComhairle an 11 Bealtaine 2016 chun sraonadh trádála príomhchógas áirithe isteach san Aontas Eorpach a sheachaint (códú) (IO L 135, 24.5.2016, lgh. 39-52)

Nuashonraithe 28.11.2016