Rialacha Nós Imeachta an Mhaoirseora Eorpaigh ar Chosaint Sonraí

Ó 2004 i leith, d’fhás an Maoirseoir Eorpach ar Chosaint Sonraí ó chomhlacht beag a raibh dhá bhall foirne agus rúnaí amháin ann go dtí comhlacht a bhfuil breis is 50 nduine ag obair ann anois. Atheagraíodh an institiúid sa bhliain 2010, agus teacht in aois a bhí i gceist di nuair a glacadh le Rialacha Nós Imeachta sa bhliain 2012.

ACHT

Cinneadh Uimh. 2013/504/AE ón Maoirseoir Eorpach ar Chosaint Sonraí maidir le Rialacha Nós Imeachta a ghlacadh.

ACHOIMRE

Is údarás neamhspleách maoirseachta an Maoirseoir Eorpach ar Chosaint Sonraí (MECS) a chinntíonn go mbíonn meas ag institiúidí agus ag comhlachtaí an Aontais Eorpaigh (AE) ar shonraí pearsanta agus ar phríobháideacht. Leagtar amach a chumhachtaí i Rialachán (CE) Uimh. 45/2001 maidir le daoine aonair a chosaint i ndáil le próiseáil sonraí pearsanta ag institiúidí agus ag comhlachtaí an AE agus maidir le saorghluaiseacht sonraí den sórt sin. Tá 3 phríomhról aige:

• Maoirseacht:bíonn air a chinntiú go ndéantar sonraí pearsanta bhaill foirne an AE agus daoine eile a phróiseáil go dleathach ag institiúidí agus ag comhlachtaí an AE. Ní mór meas a bheith ag rialaitheoirí sonraí ar a n-oibleagáidí, amhail sonraí pearsanta a phróiseáil chun na críche sainiúla dlisteanaí arna sonrú nuair a bailíodh iad, agus chun na críche sin amháin. Bíonn cearta infheidhmithe ag an duine is ábhar do na sonraí (a phróiseáiltear a shonraí), amhail an ceart chun eolais faoi phróiseáil na sonraí agus an ceart chun sonraí a cheartú. Ní mór Oifigeach Cosanta Sonraí inmheánach a bheith ag institiúidí/comhlachtaí uile an AE. Déanann MECS imscrúdú chomh maith ar ghearáin a fhaightear ó dhaoine aonair a cheapann go ndearnadh a gcearta maidir le sonraí pearsanta a shárú ag institiúid nó ag comhlacht an AE.
• Comhairliúchán: cuireann MECS comhairle ar an Choimisiún Eorpach, ar Pharlaimint na hEorpa agus ar an Chomhairle Eorpach maidir leis an tionchar a bhíonn ag dréacht-dlíthe nua ar chosaint sonraí agus maidir le ceisteanna eile a bhaineann le príobháideacht saoránach. Déanann MECS dlúthfhaireachán ar an athbhreithniú atá á dhéanamh ar an chreat dlíthiúil um chosaint sonraí.
• Comhar: comhoibríonn MECS le húdaráis eile um chosaint sonraí chun cur chuige comhsheasmhach maidir le ceisteanna cosanta sonraí a spreagadh ar fud na hEorpa. Is é an tairseach lárnach um chomhar le húdaráis náisiúnta maoirseachta ná Meitheal Airteagail 29.

Ghlac MECS le Rialacha Nós Imeachta sa bhliain 2012. Athluaitear sna rialacha seo a lán de na prionsabail a leagtar síos i Rialachán (CE) Uimh. 45/2001 agus leagtar síos iontu chomh maith rialacha mionsonraithe maidir leis na nithe seo a leanas: próisis inmheánacha chinnteoireachta, róil na maoirseoirí agus an bhoird bainistíochta, eagrú agus oibriú na rúnaíochta, beartú, riarachán inmheánach agus oscailteacht agus trédhearcacht na hinstitiúide.

Cúlra

Ó bunaíodh MECS sa bhliain 2004, tháinig mórathruithe ar an chomhthéacs dlíthiúil, eacnamaíoch agus teicneolaíochta. Leagadh síos an chosaint sonraí mar phrionsabal ginearálta dhlí an AE i gConradh Liospóin, agus cuireadh béim le roinnt cinntí i gCúirt Bhreithiúnais an Aontais Eorpaigh ar an tábhacht a bhaineann le cosaint príobháideachta agus le cosaint sonraí mar bhunchuid phróiseas cinnteoireachta an AE.

ACHT GAOLMHAR

Rialachán (CE) Uimh. 45/2001 ó Pharlaimint na hEorpa agus ón gComhairlemaidir le daoine aonair a chosaint i ndáil le próiseáil sonraí pearsanta ag institiúidí agus ag comhlachtaí an Chomhphobail agus maidir le saorghluaiseacht sonraí den[Iris Oifigiúil L 8, 12.1.2001, lch. 1]. chineál sin[Iris Oifigiúil L 8, 12.1.2001, lch. 1].

Nuashonrú is déanaí: 27.06.2014