(1)

I gcomhréir le hAirteagal 5 de Rialachán (AE) 2017/852, onnmhairiú, allmhairiú agus monarú a dhéanamh san Aontas ar na táirgí ar cuireadh mearcair leo a leagtar amach in Iarscríbhinn II a ghabhann leis an Rialachán sin, tá sé le toirmeasc ó na dátaí a leagtar amach san Iarscríbhinn sin, seachas na táirgí sin atá fíor-riachtanach le haghaidh cosaint shibhialta agus úsáidí míleata agus na táirgí sin a úsáidtear le haghaidh taighde, calabrú ionstraimíochta nó mar chaighdeán tagartha.

(2)

Thug an tAontas Coinbhinsiún Minamata maidir le Mearcair (an ‘Coinbhinsiún’) i gcrích le Cinneadh (AE) 2017/939 (2) ón gComhairle agus tháinig sé i bhfeidhm an 16 Lúnasa 2017. Toirmisctear le hAirteagal 4(1) den Choinbhinsiún onnmhairiú, allmhairiú agus mhonarú a dhéanamh ar tháirgí ar cuireadh mearcair leo a liostaítear i gCuid I d’Iarscríbhinn A a ghabhann leis an gCoinbhinsiún sin tar éis an dáta a chuirfear deireadh le húsáid an mhearcair de réir a chéile a shonraítear le haghaidh na dtáirgí sin. Ceanglaítear le hAirteagal 4(8) den Choinbhinsiún ar Chomhdháil na bPáirtithe sa Choinbhinsiún (‘COP’) athbhreithniú a dhéanamh ar Iarscríbhinn A a ghabhann leis an gCoinbhinsiún tráth nach déanaí ná 5 bliana tar éis an dáta a thiocfaidh sé i bhfeidhm.

(3)

Chuir an tAontas tograí isteach chun Iarscríbhinní A agus B a ghabhann leis an gCoinbhinsiún a leasú trí bhíthin Chinneadh (AE) 2021/727 ón gComhairle (3). Ag an gceathrú cruinniú de COP, a tionóladh ón 21 go dtí an 25 Márta 2022, glacadh Cinneadh MC-4/3 lena leasaítear Cuid I d’Iarscríbhinn A a ghabhann leis an gCoinbhinsiún trí ocht dtáirge ar cuireadh mearcair leo a áireamh san Iarscríbhinn sin. Thacaigh an tAontas leis an gCinneadh sin trí bhíthin Chinneadh (AE) 2022/549 ón gComhairle (4).

(4)

I gCuid A d’Iarscríbhinn II a ghabhann le Rialachán (AE) 2017/852, liostaítear cheana féin straidhntomhsairí atá le húsáid i bpleitismeagraif mar cheann de na táirgí ar cuireadh mearcair leo a áirítear i gCuid I d’Iarscríbhinn A a ghabhann leis an gCoinbhinsiún le Cinneadh MC-4/3 chomh maith le dlúthshoilse fluaraiseacha a bhfuil ballasta comhtháite iontu (CFL.i) chun críoch soilsithe ghinearálta ≤ 30 vata ina bhfuil cion mearcair is mó ná 2,5 mg in aghaidh an dóire lampa. Mar thoradh air sin agus chun Rialachán (AE) 2017/852 a ailíniú le Cinneadh MC-4/3, is gá seacht dtáirge ar cuireadh mearcair leo a áireamh i gCuid A d’Iarscríbhinn II a ghabhann leis an Rialachán sin: (i) dlúthshoilse fluaraiseacha a bhfuil ballasta comhtháite iontu (CFL.i) chun críoch soilsithe ghinearálta ≤ 30 vata ina bhfuil cion mearcair nach mó ná 2,5 mg in aghaidh an dóire lampa, (ii) lampaí fluaraiseacha catóide fuaire (CCFLanna) agus lampaí fluaraiseacha leictreoide seachtraí (EEFLanna) den uile fhad le haghaidh taispeántais leictreonacha, (iii) trasduchtóirí brú leáite, tarchuradóirí brú leáite agus braiteoirí brú leáite, (iv) folúschaidéil mearcair, (v) cothromóirí boinn agus meáchain rotha, (vi) scannán agus páipéar fótagrafach agus (vii) tiomántán le haghaidh satailítí agus spásárthaí.

(5)

Ba cheart, dá bhrí sin, Rialachán (AE) 2017/852 a leasú dá réir,