(1)

I gCuid 1, roinn 1.1.3., d’Iarscríbhinn VI a ghabhann le Rialachán (CE) Uimh. 1272/2008, tá liosta de na nótaí a fhéadfar a shannadh d’iontráil aicmithe agus lipéadaithe chomhchuibhithe amháin nó níos mó agus a bhaineann le substaintí a shainaithint, a aicmiú agus a lipéadú chomh maith le haicmiú agus lipéadú meascán.

(2)

Sa tuairim uaidh an 11 Meitheamh 2020 maidir le haigéad 2-eitileacsánóch agus a shalainn (2), mhol an Coiste um Measúnú Riosca (RAC) faoin nGníomhaireacht Eorpach Ceimiceán nóta nua a chur le Cuid 1, roinn 1.1.3., d’Iarscríbhinn VI a ghabhann le Rialachán (CE) Uimh. 1272/2008, chun a shoiléiriú nach mbunaítear an t-aicmiú lena gcumhdaítear grúpa substaintí san iontráil chéanna ach ar airíonna guaiseacha na coda sin den tsubstaint is coiteann do gach substaint san iontráil sin. De réir RAC, i gcás na gcodanna neamhchoiteanna de shubstaint, is gá a mheas an bhféadfadh sé go mbeadh gá le haicmiú níos déine (catagóir níos airde) maidir lena n-airíonna guaiseacha nó le haicmiú níos leithne (lena n-áirítear difreáil bhreise, spriocorgáin agus/nó ráitis ghuaise) le haghaidh na haicme guaise céanna. Ba cheart, dá bhrí sin, nóta nua X a chur le Cuid 1, roinn 1.1.3. d’Iarscríbhinn VI a ghabhann le Rialachán (CE) 1272/2008. Ós rud é gur dócha go sannfar an nóta sin do shubstaintí eile a bhfuil na hairíonna céanna acu amach anseo, ba cheart an fhoclaíocht chuí a úsáid sa chaoi nach mbeidh sé teoranta don iontráil shonrach sin.

(3)

Sa tuairim ó RAC an 20 Meán Fómhair 2019 maidir le haigéad bórach; trí-ocsaíd débhioróin, heaptocsaíd déshóidiam teitreabóróin hiodráit; teitreabóráit dhéshóidiam ainhidriúil, aigéad ortóbórach, salann sóidiam, deacaihiodráit teitreabóráite déshóidiam, peintihiodráit teitreabóráite déshóidiam, (3) agus sa tuairim ó RAC an 11 Meitheamh 2020 maidir le haigéad 2-eitileacsánóch agus a shalainn, tugadh tuairisc ar fhianaise eolaíoch go bhfuil tocsaineacht atáirgthe gach ceann de na substaintí sin mar thoradh ar eintiteas móilíneach is coiteann do shubstaintí uile an ghrúpa shonraigh. Agus tograí á mbreithniú maidir le haicmiú comhchuibhithe comhdhúl bóróin áirithe agus aigéid 2-eitileacsánóch agus a shalann, d’iarr saineolaithe ó na Ballstáit a ndeachthas i gcomhairle leo sa ghrúpa saineolaithe CARACAL (Údaráis Inniúla maidir le Clárú, Meastóireacht, Údarú agus Srianadh Ceimiceán (REACH) agus maidir le hAicmiú, Lipéadú agus Pacáistiú (CLP)) nótaí nua a chur isteach i gCuid 1, roinn 1.1.3.2., d’Iarscríbhinn VI a ghabhann le Rialachán (CE) Uimh. 1272/2008. De réir an phlé a rinneadh sa ghrúpa saineolaithe CARACAL, tá gá leis na nótaí sin chun gur féidir guais na meascán a shainaithint ar bhealach níos cruinne, meascán ina bhfuil roinnt substaintí atá san ‘iontráil ghrúpa’ chéanna. Ba cheart feidhm a bheith ag prionsabal na suimitheachta maidir le substaintí ar mar gheall ar eintiteas móilíneach comhchoiteann a bheith iontu, nó cruthú eintitis mhóilínigh chomhchoiteann a mbaineann guais leo. Mar thoradh air sin, is gá an méid a chuireann na substaintí sin le hairí guaiseach foriomlán an mheascáin i gcomhréir lena dtiúchan a chur san áireamh, trí chomparáid a dhéanamh idir an teorainn chineálach nó an sainteorainn tiúchana is infheidhme agus suim thiúchan na substaintí atá ann. Dá bhrí sin, ba cheart dhá nóta nua, nótaí 11 agus 12, a chur le Cuid 1, roinn 1.1.3.2., d’Iarscríbhinn VI a ghabhann le Rialachán (CE) 1272/2008. Ós rud é gur cheart nóta 11 a shannadh d’aigéid bhóracha agus dá salainn, agus do chomhdhúile bóracha eile a scaoileann aigéad bórach/bóráit, i bhfianaise shainiúlacht na n-iontrálacha lena mbaineann ba cheart an fhoclaíocht chuí a úsáid sa chaoi go mbainfidh sé go sonrach leis na hiontrálacha sin. Ós rud é gur dócha go sannfar nóta 12 amach anseo do shubstaintí seachas aigéad 2-eitileacsánóch agus a shalainn, ba cheart an fhoclaíocht chuí a úsáid sa chaoi nach mbeidh sé teoranta don iontráil shonrach sin.

(4)

Ba cheart Rialachán (CE) Uimh. 1272/2008 a leasú dá réir,