(1)

De réir Airteagal 36 de Threoir (AE) 2020/262 ón gComhairle (3), maidir le gluaiseacht earraí máil a scaoileadh lena dtomhailt i gcríoch Ballstáit amháin agus a ghluaistear go críoch Ballstáit eile chun iad a sheachadadh ansin chun críoch tráchtála, tá an ghluaiseacht sin le déanamh faoi chumhdach doiciméad riaracháin leictreonach simplithe. Ar an mbealach sin, leis an Treoir sin, maidir le húsáid an chórais ríomhairithe a leagtar amach i gCinneadh (AE) 2020/263 ó Pharlaimint na hEorpa agus ón gComhairle (4) chun faireachán a dhéanamh ar ghluaiseacht earraí máil, ar córas é a úsáidtear chun faireachán a dhéanamh ar ghluaiseachtaí earraí máil faoi shocruithe fionraí dleachta, leathnaítear úsáid an chórais sin chun faireachán a dhéanamh ar earraí máil arna scaoileadh lena dtomhailt i gcríoch Ballstáit amháin agus a ghluaistear go críoch Ballstáit eile chun iad a sheachadadh chun críoch tráchtála. Tá feidhm le bheith ag an leathnú sin ar úsáid an chórais ríomhairithe an 13 Feabhra 2023.

(2)

Chun an leathnú sin ar úsáid an chórais ríomhairithe a léiriú, is gá raon feidhme Airteagal 15(1), pointe (d), Airteagal 19(4), an chéad fhomhír, agus Airteagal 20(1) de Rialachán (AE) Uimh. 389/2012 ón gComhairle (5) a leathnú chun na hearraí máil uile lena mbaineann a chumhdach, gan beann ar cé acu a tharla socrú fionraí dleachta nó nár tharla.

(3)

Le hAirteagal 19(2), pointe (c), de Rialachán (AE) Uimh. 389/2012, ceanglaítear ar na Ballstáit a choinneáil ar bun sna cláir leictreonacha catagóir táirge máil (CAT) agus/nó cód táirge máil (EPC) na dtáirgí a chumhdaítear leis an údarú, ar táirgí iad dá dtagraítear in Iarscríbhinn II, códliosta 11, a ghabhann le Rialachán (CE) Uimh. 684/2009 (6). Ón 13 Feabhra 2023 ar aghaidh, áfach, cuirfear Rialachán Tarmligthe (AE) 2022/1636 ón gCoimisiún (7) in ionad Rialachán (CE) Uimh. 684/2009 ón gCoimisiún. Dá bhrí sin, is iomchuí an t-ionadú sin a léiriú in Airteagal 19(2), pointe (c), de Rialachán (AE) Uimh. 389/2012.

(4)

Ós rud é nach féidir leis an Ballstáit cuspóir an Rialacháin seo, eadhon foráil a dhéanamh maidir le malartú na faisnéise a choinníonn gach Ballstát ar bun sa chlár leictreonach maidir leis na hoibreoirí eacnamaíocha a ghluaiseann earraí arna scaoileadh lena dtomhailt i gcríoch Ballstáit amháin agus arna ngluaiseacht ansin go críoch Ballstáit eile chun iad a sheachadadh ansin chun críoch tráchtála, a ghnóthú go leordhóthanach agus, de bharr fhairsinge na gníomhaíochta, eadhon feidhmiú comhchuibhithe an chórais ríomhairithe a áirithiú ó Bhallstát go chéile, gur fearr is féidir é a bhaint amach ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(5)

Leis an Rialachán seo, urramaítear na cearta bunúsacha agus comhlíontar na prionsabail a aithnítear i gCairt um Chearta Bunúsacha an Aontais Eorpaigh, go háirithe an ceart go ndéanfar sonraí pearsanta a chosaint. Ní théann próiseáil na sonraí sin arna déanamh faoi chuimsiú an Rialacháin seo thar a bhfuil riachtanach agus comhréireach chun leas fioscach dlisteanach na mBallstát a chosaint.

(6)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (8).

(7)

Chun dáta chur i bhfeidhm an Rialacháin seo a ailíniú le dáta chur i bhfeidhm Chaibidil V, Roinn 2, de Threoir (AE) 2020/262, agus chun am leordhóthanach a thabhairt do na Ballstáit ullmhú do na hathruithe a eascraíonn as an Rialachán seo, ba cheart feidhm a bheith aige ón 13 Feabhra 2023 ar aghaidh.

(8)

Ba cheart, dá bhrí sin, Rialachán (AE) Uimh. 389/2012 a leasú dá réir sin,