(1)

Ceanglaítear, le hAirteagal 6 de Rialachán (AE) Uimh. 1380/2013 ó Pharlaimint na hEorpa agus ón gComhairle (1), go nglacfar bearta caomhnaithe agus an chomhairle eolaíoch, theicniúil agus eacnamaíoch dá bhfuil ar fáil á cur san áireamh, lena n-áirítear, i gcás inarb ábhartha, tuarascálacha arna dtarraingt suas ag an gCoiste Eolaíoch, Teicniúil agus Eacnamaíoch um Iascaigh (STECF), mar aon le comhairle a fhaightear ó Chomhairlí Comhairleacha le haghaidh na limistéar geografach ábhartha nó na réimsí inniúlachta ábhartha agus na moltaí comhpháirteacha arna ndéanamh ag na Ballstáit.

(2)

Tá an Chomhairle le bearta a ghlacadh maidir le deiseanna iascaireachta a shocrú agus a chionroinnt, lena n-áirítear coinníollacha áirithe atá nasctha go feidhmiúil leis na deiseanna iascaireachta sin, de réir mar is iomchuí. Foráiltear le hAirteagal 16(1) de Rialachán (AE) Uimh. 1380/2013 gur cheart deiseanna iascaireachta a chionroinnt ar na Ballstáit ar dhóigh lena n-áirithítear cobhsaíocht choibhneasta gníomhaíochtaí iascaireachta gach Ballstáit le haghaidh gach stoic éisc nó iascaigh.

(3)

Foráiltear le hAirteagal 2 de Rialachán (AE) Uimh. 1380/2013 gurb é cuspóir an chomhbheartais iascaigh (CBI) ráta saothraithe na huastáirgeachta inbhuanaithe (MSY) a bhaint amach faoi 2015 i gcás inar féidir agus, ar bhonn forchéimnitheach incriminteach faoi 2020 ar a dhéanaí maidir leis na stoic uile. Ba é cuspóir na hidirthréimhse go dtí 2020 baint amach na huastáirgeachta inbhuanaithe i gcás na stoc uile a chothromú leis na himpleachtaí socheacnamaíocha a d’fhéadfadh a bheith ann le coigeartuithe a d’fhéadfaí a dhéanamh ar dheiseanna iascaireachta gaolmhara.

(4)

Dá bhrí sin, i gcomhréir le Rialachán (AE) Uimh. 1380/2013, ba cheart gabhálacha iomlána incheadaithe (TACanna) a shocrú ar bhonn na comhairle eolaíche dá bhfuil ar fáil agus gnéithe bitheolaíocha agus socheacnamaíocha á gcur san áireamh agus cóir chothrom idir earnálacha iascaireachta á háirithiú san am céanna, chomh maith leis na tuairimí a cuireadh in iúl le linn na gcomhairliúchán le páirtithe leasmhara.

(5)

Foráiltear le hAirteagal 16(4) de Rialachán (AE) Uimh. 1380/2013, i gcás stoic atá faoi réir pleananna ilbhliantúla sonracha, go bhfuil na deiseanna iascaireachta le bunú i gcomhréir leis na rialacha a leagtar síos sna pleananna sin.

(6)

Le Rialachán (AE) 2019/1022 ó Pharlaimint na hEorpa agus ón gComhairle (2), bunaíodh an plean ilbhliantúil do na hiascaigh a shaothraíonn stoic ghrinnill sa Mheánmhuir Thiar (“an plean”) agus tháinig sé i bhfeidhm an 16 Iúil 2019. Is é is aidhm don phlean uastáirgeacht inbhuanaithe a bhaint amach agus a choinneáil ar bun maidir le spriocstoc, rud a áirithíonn go ndéantar le saothrú beo-acmhainní bitheolaíocha na mara pobail na speiceas atá á saothrú a athbhunú agus a choinneáil ar bun os cionn leibhéil atá in ann an uastáirgeacht inbhuanaithe a tháirgeadh.

(7)

I gcomhréir le hAirteagal 4(1) de Rialachán (AE) 2019/1022, ba cheart deiseanna iascaireachta le haghaidh stoic a liostaítear in Airteagal 1 den Rialachán sin a shocrú chun go mbainfear amach uastáirgeacht inbhuanaithe maidir le básmhaireacht iascaireachta ar bhonn forchéimnitheach incriminteach faoi 2020 más féidir, agus faoin 1 Eanáir 2025 ar a dhéanaí. Ba cheart deiseanna iascaireachta a shloinneadh mar uasiarracht iascaireachta incheadaithe le haghaidh trálaer agus báid spiléireachta agus ba cheart iad a shocrú i gcomhréir leis an gcóras iarrachta iascaireachta a leagtar síos in Airteagal 7 den phlean, agus ba cheart iad a shloinneadh mar uasteorainneacha gabhála don séacla gorm agus dearg (Aristeus antennatus) agus don séacla mór dearg (Aristaeomorpha foliacea) in uiscí doimhne i gcomhréir le comhairle eolaíoch agus le hAirteagal 7(3), pointe (b), den phlean.

(8)

Ba é an chomhairle a thug STECF go dteastaíonn breis gníomhaíochtaí agus laghduithe suntasacha i ráta básmhaireachta iascaireachta le haghaidh trálaer chun spriocanna uastáirgeachta inbhuanaithe a bhaint amach i gcás stoic éisc go léir na Meánmhara Thiar. Bunaithe ar an gcomhairle sin, ba cheart, dá bhrí sin, uasiarracht iascaireachta incheadaithe le haghaidh trálaeir sa Mheánmhuir Thiar, i gcomhréir le hAirteagal 7(3), pointe (b), den phlean, a laghdú 7 % le haghaidh 2023 i gcomparáid leis an mbunlíne idir 2015 agus 2017, a bheidh le baint den uasiarracht iascaireachta incheadaithe iascaireachta a socraíodh le haghaidh 2022 le Rialachán (AE) 2022/110 ón gComhairle (3).

(9)

In 2021, chuir STECF in iúl gur báid spiléireachta is cúis le suas le 10 % de bhásmhaireacht iascaireachta colmóirí i bhfolimistéir gheografacha (FLGanna) 1-5-6-7 CGIM agus gurb iad a thugann i dtír suas le 20 % de na gabhálacha in FLG 10, agus gur sceithigh iad formhór na ngabhálacha a mbeirtear orthu leis an trealamh sin. Chuir STECF in iúl go bhfuil laghdú leanúnach tagtha ar bhithmhais sceite na stoc colmóirí le blianta beaga anuas agus go bhfuil laghdú 66 % tagtha ar líon na gcolmóirí sceite in FLGanna 1-5-6-7 agus laghdú 28 % ar an mbithmhais sceite in FLGanna 8-9-10-11 ó cuireadh tús leis na measúnuithe. Ar an mbonn sin, bunaíodh le hIarscríbhinn III a ghabhann le Rialachán (AE) 2022/110 ón gComhairle uasiarracht iascaireachta incheadaithe bád spiléireachta, i gcomhréir le hAirteagal 7(5) den phlean, bunaithe ar an iarracht iascaireachta arna sloinneadh mar líon laethanta iascaireachta idir an 1 Eanáir 2015 agus an 31 Nollaig 2017. In 2022, de réir measúnú a rinne STECF tá bithmhais stoic sceite colmóirí in FLGanna 1-5-6-7 agus colmóirí in FLGanna 8-9-10-11 fós faoi bhun na teorann bhithmhaise (BLIM), de réir bhrí Airteagal 2, pointe (10), den phlean, agus ba cheart laghdú 57 % ar a laghad a dhéanamh ar ghabhálacha in FLGanna 1-5-6-7 agus 78 % in FLGanna 8-9-10-11 chun FMSY a bhaint amach in 2023. Dá bhrí sin. is iomchuí, le haghaidh 2023, uasiarracht iascaireachta incheadaithe na mbád spiléireachta a choinneáil ar na leibhéil arna socrú le haghaidh 2022 le Rialachán (AE) 2022/110, i gcomhréir le hAirteagal 7(5) den phlean. Níor cheart go ndéanfaí leis an uasiarracht iascaireachta incheadaithe le haghaidh báid spiléireachta, arna sloinneadh i laethanta iascaireachta, réamhbhreithiúnas maidir leis an uasiarracht iascaireachta incheadaithe a bheidh le bunú le haghaidh 2024.

(10)

In 2021, mhol STECF go gcaithfí básmhaireacht iascaireachta an tséacla ghoirm agus dhearg in FLGanna 1-5-6-7 agus in FLGanna 8-9-10-11 a laghdú go mór chun MSY a bhaint amach faoi 2025 ar a dhéanaí. D’eisigh an Coiste Comhairleach Eolaíoch maidir le hIascaigh (CCE) de chuid an Choimisiúin Ghinearálta Iascaigh don Mheánmhuir (CGIM) comhairle den chineál céanna maidir le básmhaireacht iascaireachta an tséacla ghoirm agus dheirg in FLG 2. Thairis sin, mheas STECF go raibh bithmhais an tséacla ghoirm agus dhearg ag dul i laghad. Ar bhonn na comhairle a fuarthas, bunaíodh le Rialachán (AE) 2022/110 le haghaidh 2022 na huasteorainneacha gabhála le haghaidh an tséacla ghoirm agus dheirg in FLGanna 1-5-6-7 agus FLGanna 8-9-10-11.

(11)

In 2022, chomhairligh STECF go bhfuil básmhaireacht iascaireachta an tséacla ghoirm agus dhearg in FLGanna 1-2-5-6-7 fós i bhfad ó leibhéil inbhuanaithe agus go bhfuil gá, dá bhrí sin, le tuilleadh bearta bainistíochta. Mhol STECF, chun FMSY a bhaint amach faoi 2023, gur cheart gabhálacha a laghdú 53 % ar an meán toisc go bhfuil an speiceas sin in FLGanna 1 agus 2 faoi bhun BLIM agus an speiceas sin in FLGnna 6 agus 7 faoi bhun an phointe tagartha réamhchúraim maidir le bithmhais (BPA)de réir bhrí Airteagal 2, pointe (11), den phlean. I gcomhréir le hAirteagal 7(3), pointe (b) den phlean, is iomchuí, dá bhrí sin, leanúint d’uasteorainneacha gabhála a shocrú chun an córas iarrachta trálaeireachta a chomhlánú. I bhfianaise na comhairle eolaíche, le haghaidh 2023, ba cheart na huasteorainneacha gabhála le haghaidh an tséacla ghoirm agus dheirg in FLGanna 1-2-5-6-7 a laghdú 5 % i gcomparáid le deiseanna iascaireachta a socraíodh le haghaidh 2022 le Rialachán (AE) 2022/110.

(12)

In 2022, chuir STECF in iúl go bhfuil básmhaireacht iascaireachta an tséacla ghoirm agus dheirg in FLGanna 8-9-10-11 fós i bhfad os cionn leibhéil inbhuanaithe agus go bhfuil gá, dá bhrí sin, le tuilleadh bearta bainistíochta. Chuir STECF in iúl gur cheart gabhálacha a laghdú 30 % chun FMSY a bhaint amach faoi 2023. I gcomhréir le hAirteagal 7(3), pointe (b), den phlean, is iomchuí, dá bhrí sin, leanúint d’uasteorainneacha gabhála a shocrú chun an córas iarrachta trálaeireachta a chomhlánú. I bhfianaise na comhairle eolaíche, le haghaidh 2023, ba cheart na huasteorainneacha gabhála le haghaidh an tséacla ghoirm agus dheirg in FLGanna 8-9-10-11 a laghdú 3 % i gcomparáid le deiseanna iascaireachta a socraíodh le haghaidh 2022 le Rialachán (AE) 2022/110.

(13)

In 2021, chomhairligh STECF go raibh bithmhais an tséacla mhóir dheirg ag meath in FLGanna 8-9-10-11 agus go gcaithfí básmhaireacht iascaireachta an stoic sin a laghdú go mór chun MSY a bhaint amach faoi 2025 ar a dhéanaí. Ar bhonn na comhairle a fuarthas, bunaíodh le Rialachán (AE) 2022/110 le haghaidh 2022 na huasteorainneacha gabhála le haghaidh an tséacla mhóir dheirg in FLGanna 8-9-10-11.

(14)

In 2022, chomhairligh STECF go bhfuil bithmhais an tséacla mhóir dheirg in FLGanna 8-9-10-11 ag meath agus go bhfuil an bhásmhaireacht iascaireachta fós i bhfad os cionn leibhéil inbhuanaithe agus go bhfuil gá, dá bhrí sin, le tuilleadh bearta bainistíochta. Chomhairligh STECF gur cheart, chun FMSY a bhaint amach faoi 2023, gabhálacha a laghdú 27 % toisc go bhfuil an speiceas sin in FLGanna 8-9-10-11 os cionn BPA. I gcomhréir le hAirteagal 7(3), pointe (b), den phlean, is iomchuí, dá bhrí sin, leanúint d’uasteorainneacha gabhála a shocrú chun an córas iarrachta trálaeireachta a chomhlánú le huasteorainneacha gabhála. I bhfianaise na comhairle eolaíche, le haghaidh 2023, ba cheart na huasteorainneacha gabhála le haghaidh an tséacla mhóir dheirg in FLGanna 8-9-10-11 a laghdú 3 % i gcomparáid le deiseanna iascaireachta a socraíodh le haghaidh 2022 le Rialachán (AE) 2022/110.

(15)

In 2022, de réir meastachán ó STECF tá bithmhais stoic sceite faoi bhun BLIM, ag an séacla gorm agus dearg in FLGanna 1-2, ag an gcolmóir sna FLGanna 1-5-6-7 agus in FLGanna 8-9-10-11, rud a léiríonn go bhféadfadh a n-acmhainneachtaí atáirgthe a bheith laghdaithe. I gcomhcheangal na mbeart uile arna nglacadh maidir leis na stoic sin, áirítear na bearta feabhais breise a cheanglaítear faoi Airteagal 6(2) den phlean.

(16)

Ag an 43ú cruinniú bliantúil a bhí ag CGIM in 2019, ghlac sé Moladh CGIM/43/2019/5 maidir le plean bainistíochta ilbhliantúil um iascaigh ghrinnill inbhuanaithe i Muir Aidriad (folimistéir gheografacha 17 agus 18), moladh lenar tugadh isteach córas iarrachta iascaireachta agus uasteorainn acmhainneachta cabhlaigh maidir le stoic ghrinnill áirithe. Ba cheart na bearta sin a chur chun feidhme i ndlí an Aontais.

(17)

Ag an 44ú cruinniú bliantúil a bhí ag CGIM in 2021, ghlac sé Moladh CGIM/44/2021/1 maidir le córas iarrachta iascaireachta a bhunú le haghaidh príomhstoic ghrinnill i Muir Aidriad (folimistéir gheografacha 17 agus 18), moladh lenar tugadh isteach uaslíon incheadaithe laethanta iascaireachta, de réir cineál tráil agus roinn cabhlaigh maidir le stoic ghrinnill áirithe. Ba cheart na bearta sin a chur chun feidhme i ndlí an Aontais.

(18)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/8 maidir le córas iarrachta iascaireachta a chur chun feidhme le haghaidh príomhstoic ghrinnill i Muir Aidriad in 2023 (folimistéir gheografacha 17 agus 18), ag eascairt as Moladh CGIM/43/2019/5 lenar tugadh isteach córas iarrachta iascaireachta. Ba cheart na bearta sin a chur chun feidhme i ndlí an Aontais.

(19)

Ag an 44ú cruinniú bliantúil a bhí ag CGIM in 2021, ghlac sé Moladh CGIM/44/2021/20 maidir le plean bainistíochta ilbhliantúil le haghaidh saothrú inbhuanaithe stoc peiligeach beag i Muir Aidriad (folimistéir gheografacha 17 agus 18), moladh lenar tugadh isteach uasleibhéal gabhálacha agus uasteorainn ghaolmhar acmhainneachta cabhlaigh le haghaidh soithí peas-saighne agus trálaeir pheiligeacha a dhíríonn ar stoic bheaga pheiligeacha, lena ngabhann maolú maidir le cabhlaigh náisiúnta ina bhfuil níos lú ná deich soitheach idir soithí peas-saighne agus/nó trálaeir pheiligeacha a bhíonn ag iascaireacht go gníomhach le haghaidh stoic pheiligeacha bheaga. Ba cheart na bearta sin a chur chun feidhme i ndlí an Aontais.

(20)

Agus saintréithe chabhlach na Slóivéine agus an tionchar beag atá aige ar stoic pheiligeacha bheaga agus ar stoic ghrinnill, is iomchuí na patrúin iascaireachta atá ann cheana a chaomhnú agus rochtain chabhlach na Slóivéine a áirithiú ar íosmhéid speiceas peiligeach beag agus cionroinnt íosta iarrachta le haghaidh stoic ghrinnill.

(21)

Ag an 43ú cruinniú bliantúil a bhí ag CGIM in 2019, ghlac sé Moladh CGIM/43/2019/4 chomh maith maidir le plean bainistíochta i dtaca le saothrú inbhuanaithe an choiréalaigh dheirg sa Mheánmhuir (folimistéir gheografacha 1 go 27), moladh lenar tugadh isteach stop sealadach le hiarracht iascaireachta arna sloinneadh mar líon uasta údaruithe iascaireachta, agus teorainneacha saothraithe maidir leis an gcoiréalach dearg. Ba cheart na bearta sin a chur chun feidhme i ndlí an Aontais.

(22)

Ag an 44ú cruinniú bliantúil a bhí ag CGIM in 2021, ghlac sé Moladh CGIM/44/2021/11 maidir le bearta bainistíochta i dtaca le húsáid feistí comhthiomsaithe éisc ar ancaire in iascaigh dorád coiteann sa Mheánmhuir (folimistéir gheografacha 1 go 27), lena leasaítear Moladh CGIM/43/2019/1. Tugadh isteach le Moladh CGIM/43/2019/1 stop sealadach le hiarracht iascaireachta arna sloinneadh mar líon uasta soithí iascaireachta a dhíríonn ar an dorád coiteann agus le Moladh CGIM/44/2021/1, cuireadh síneadh leis na bearta sin go dtí deireadh 2023. Ba cheart na bearta sin a chur chun feidhme i ndlí an Aontais.

(23)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/4 maidir le plean bainistíochta ilbhliantúil i dtaca le saothrú inbhuanaithe stoc grinnill i gCaolas na Sicile (folimistéir gheografacha 12 go 16), lena n-aisghairtear Moltaí CGIM/44/2021/12 agus CGIM/42/2018/5. Leis an Moladh sin, tugadh isteach córas iarrachta do cholmóirí agus teorainneacha gabhála do na séaclaí domhainmhara chomh maith le reo acmhainneachta iascaireachta. Ba cheart na bearta sin a chur chun feidhme i ndlí an Aontais.

(24)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/5 maidir le plean bainistíochta ilbhliantúil i dtaca le saothrú inbhuanaithe stoc séaclaí móra dearga agus séaclaí gorma agus dearga i gCaolas na Sicile (folimistéir gheografacha 12 go 16), lena n-aisghairtear Moltaí CGIM/44/2021/7 agus CGIM/43/2019/6. Leis an Moladh sin, tugadh isteach teorann gabhála agus reo acmhainneachta iascaireachta. Ba cheart na bearta sin a chur chun feidhme i ndlí an Aontais.

(25)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/6 maidir le plean bainistíochta ilbhliantúil i dtaca le saothrú inbhuanaithe stoc séaclaí móra dearga agus séaclaí gorma agus dearga sa Mhuir Iónach (folimistéir gheografacha 19 go 21), lena n-aisghairtear Moltaí CGIM/44/2021/8 agus CGIM/42/2018/4. Leis an Moladh sin, tugadh isteach teorainn gabhála agus reo acmhainneachta iascaireachta. Ba cheart na bearta sin a chur chun feidhme i ndlí an Aontais.

(26)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/7 maidir le plean bainistíochta ilbhliantúil i dtaca le saothrú inbhuanaithe stoc séaclaí móra dearga agus séaclaí gorma agus dearga i Muir na Leiveainte (folimistéir gheografacha 24 go 27), lena n-aisghairtear Moltaí CGIM/44/2021/8 agus CGIM/42/2018/4. Leis an Moladh sin, tugadh isteach teorainn gabhála agus reo acmhainneachta iascaireachta. Ba cheart na bearta sin a chur chun feidhme i ndlí an Aontais.

(27)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/3 maidir le plean bainistíochta ilbhliantúil i dtaca le saothrú inbhuanaithe deargán i Muir Alboran (folimistéir gheografacha 1 go 3), lena n-aisghairtear Moltaí CGIM/44/2021/4, CGIM/43/2019/2 agus CGIM/41/2017/2. Leis an Moladh seo, tugadh isteach uasleibhéil gabhálacha le haghaidh 2023, 2024 agus 2025, líon uasta spiléar agus línte láimhe údaraithe agus bearta nua le haghaidh iascaigh áineasa. Ba cheart na bearta sin a chur chun feidhme i ndlí an Aontais.

(28)

Ag an 43ú cruinniú bliantúil a bhí ag CGIM in 2019, ghlac sé Moladh CGIM/43/2019/3 lena leasaítear Moladh CGIM/41/2017/4 maidir le plean bainistíochta ilbhliantúil i dtaca le hiascaigh turbard sa Mhuir Dhubh (folimistéir gheografacha 29). Tugadh isteach le Moladh CGIM/43/2019/3 TAC réigiúnach uasdátaithe agus scéim coinroinnte cuótaí maidir leis an turbard chomh maith le bearta caomhnaithe, go háirithe tréimhse choiscthe 2 mhí agus teorainn 180 lá sa bhliain leis an líon laethanta iascaireachta. Tá na bearta caomhnaithe breise sin nasctha go feidhmiúil leis na deiseanna iascaireachta, toisc, mura bhfuil na bearta sin i bhfeidhm, gur cheart na leibhéil TAC maidir leis an turbard a laghdú chun athbhunú na stoc a áirithiú. Ba cheart na bearta sin a chur chun feidhme i ndlí an Aontais.

(29)

Ag an 45ú cruinniú bliantúil a bhí ag CGIM in 2022, ghlac sé Moladh CGIM/45/2022/9 lena leasaítear Moladh CGIM/43/2019/3 maidir le plean bainistíochta ilbhliantúil i dtaca le hiascaigh turbard sa Mhuir Dhubh (folimistéar CGIM 29). Leis an Moladh sin, cuireadh síneadh bliana leis an TAC atá ann cheana. Ba cheart na bearta sin a chur chun feidhme i ndlí an Aontais.

(30)

Ag an 45ú cruinniú bliantúil a bhí ag CGIM in 2022, ghlac sé cinneadh lenar tugadh dá aire nár bhain an tAontas Eorpach leas iomlán as a chuóta turbard le linn na bliana 2021 agus lenar ceadaíodh tabhairt anonn an chuóta nár úsáideadh i bhfianaise na staide eisceachtúla a cruthaíodh de bharr phaindéim COVID-19. Ba cheart an cinneadh sin ó CGIM a chur chun feidhme i ndlí an Aontais. Ba cheart dáileadh na ndeiseanna iascaireachta a eascróidh ón tearcshaothrú a dhéanamh ar bhonn na ranníocaíochta ar leith de chuid gach Ballstáit i leith na tearcshaothraithe, gan an eochair dháilte a bhunaítear i Rialachán (AE) 2022/110 maidir le cionroinnt bhliantúil na TACanna a mhodhnú.

(31)

Bunaithe ar an gcomhairle eolaíoch a chuir Meitheal CGIM maidir leis an Muir Dhubh ar fáil, ba cheart an leibhéal básmhaireachta iascaireachta atá ann faoi láthair a choinneáil ar bun chun inbhuanaitheacht an stoic salán sa Mhuir Dhubh a áirithiú. Is iomchuí, mar sin, leanúint de chuóta uathrialach a shocrú maidir leis an stoc sin.

(32)

Tá úsáid na ndeiseanna iascaireachta atá ar fáil do shoithí iascaireachta de chuid an Aontais a leagtar amach sa Rialachán seo faoi réir Rialachán (CE) Uimh. 1224/2009 (4) ón gComhairle, agus go háirithe Airteagail 33 agus 34 den Rialachán sin, maidir le gabhálacha agus iarracht iascaireachta a thaifeadadh agus maidir le fógra a thabhairt faoi shonraí i ndáil le hídiú deiseanna iascaireachta. Is gá, dá bhrí sin, na cóid atá le húsáid ag na Ballstáit a shonrú agus sonraí á gcur chuig an gCoimisiún maidir le stoic éisc a thabhairt i dtír atá faoi réir an Rialacháin seo.

(33)

Ionas nach gcuirfí isteach ar ghníomhaíochtaí iascaireachta agus chun slí bheatha iascairí an Aontais a áirithiú, ba cheart feidhm a bheith ag an Rialachán seo ón 1 Eanáir 2023 ar aghaidh. Chun a éascú go gcuirfear chun feidhme go pras é, ba cheart an Rialachán seo a theacht i bhfeidhm láithreach tráth a fhoilsithe.

(34)

Chun úsáid roghnaíocht an trealaimh iascaireachta a chur chun cinn agus chun limistéir choiscthe éifeachtúla a bhunú chun ógánaigh agus sceithirí a chosaint, le Rialachán (AE) 2022/110 bunaíodh sásra cúitimh i ndáil leis an gcóras iarrachta le haghaidh trálaer. Bunaithe ar an taithí a fuarthas sa chéad bhliain den chur i bhfeidhm agus chun éifeachtúlacht iomlán an sásra cúitimh a áirithiú, is gá a shoiléiriú an chaoi ar cheart an sásra sin a chur chun feidhme, lena n-áirítear go cúlghabhálach ón 1 Eanáir 2022, nuair a tháinig Rialachán (AE) 2022/110 i bhfeidhm. Ba cheart, dá bhrí sin, Rialachán (AE) 2022/110 a leasú dá réir sin. Lena chois sin, ós rud é go moltar leis an gcomhairle eolaíoch i gcónaí feabhas breise a chur ar roghnaíocht an trealaimh iascaireachta agus ar éifeachtúlacht na limistéar coiscthe chun éisc óga a chosaint, ba cheart leanúint leis an sásra sin in 2023. Bunaithe ar chomhairle eolaíoch do 2023, is gá 3,5 % de na laethanta iascaireachta do thrálaeir a chionroinnt, arna ríomh ón mbonnlíne idir 2015 agus 2017.

(35)

Ba cheart na deiseanna iascaireachta a úsáid i gcomhréir go hiomlán le dlí an Aontais,