(1)

Glacadh Rialachán Cur Chun Feidhme (AE) 2016/1646 ón gCoimisiún (2) ar an mbonn gurb é ba cheart a bheith go príomha in innéacsanna cothromais, a mheasfar gur príomhinnéacsanna iad chun críocha Rialachán (AE) Uimh. 575/2013 (agus dá bhrí sin, lena gcuirfear ar chumas na n-institiúidí na hinnéacsanna a úsáid mar chomhthaobhacht incháilithe a bhfuil na hinnéacsanna sin iontu), cothromais ar féidir a mheas go réasúnach go mbeidís inréadaithe nuair is gá d’institiúd iad a leachtú. Ceapadh go mbeadh amhlaidh nuair a bheadh comhlúthacht shaor de EUR 500 000 000 ar a laghad ag 90 % de chomhpháirteanna innéacs ar a laghad nó, in éagmais faisnéise faoi chomhlúthacht shaor, go mbeadh caipitliú margaidh de ar a laghad EUR 1 000 000 000 acu. Níl aon athrú ar an toimhde sin.

(2)

Le Rialachán Cur Chun Feidhme (AE) 2016/1646, sonraítear freisin gur cheart an fhéidearthacht a bheith ag na hinstitiúidí na hionstraimí comhthaobhachta a aithint mar ionstraimí incháilithe, sin ionstraimí a áirítear sna príomhinnéacsanna nach gcomhlíonann na critéir thuasluaite, ach a bhfuil a gcomhpháirteanna trádáilte go leordhóthanach, agus breithnítear critéir nua maidir leis na hinnéacsanna sin a shainaithint ann. Mar sin féin, is léir ón taithí go bhfuil sé deacair na critéir sin a chur i bhfeidhm i gcoinne príomhinnéacs arna bhunú i dtríú tír, ar critéir iad atá sainithe maidir leis an margadh ina bhfuil innéacs bunaithe, mar teastaíonn sonraí a bhailiú le haghaidh na scaireanna uile a ligtear isteach iad chun a dtrádála ar an margadh sin. Leis an deacracht sin, ní rabhthas in ann cuspóir Rialachán (AE) Uimh. 575/2013 a bhaint amach go cuí chun íostairseach leachtach na gcomhpháirteanna innéacs a áirithiú. Dá bhrí sin, is gá critéir nua a leagan síos lena dtabharfaí aghaidh ar na heasnaimh a sainaithníodh. Leis na critéir nua sin ba cheart leordhóthanacht na n-ionstraimí mar chomhthaobhacht incháilithe a áirithiú agus dá bhrí sin, ba cheart íostairseach leachtach leordhóthanach ón margadh ina bhfuil an t-innéacs bunaithe a áirithiú, i gcás ina gcomhlíontar dhá choinníoll a bhaineann le táscairí leachtachta margaidh caighdeánacha. Leis an gcéad choinníoll, ba cheart a éilliú go mbeadh comhlúthacht shaor de EUR 25 000 000 ar a laghad ag 80 % de chomhpháirteanna innéacs nó, in éagmais faisnéise faoi chomhlúthacht shaor, go mbeadh caipitliú margaidh de EUR 50 000 000 ar a laghad acu. Leis an dara coinníoll, ba cheart a cheangal go mbeadh meánláimhdeachas laethúil íosta de EUR 500 000 ag gach comhpháirt an innéacs ag a bhfuil caipitliú margaidh níos lú ná EUR 10 000 000 000 nó cothrom leis sin agus go mbeadh meánláimhdeachas laethúil íosta de EUR 1 000 000 ag gach comhpháirt an innéacs a bhfuil caipitliú margaidh níos mó ná EUR 10 000 000 000 acu. Ba cheart an meánláimhdeachas laethúil a ríomh thar 12 mhí den bhliain féilire roimh an measúnú, nó i gcás inarb infheidhme, thar thréimhse 12 mhí den bhliain féilire roimhe le linn na tréimhse ina raibh an t-ionstraim airgeadais ar fáil lena trádáil.

(3)

Le Rialachán (AE) 2019/2033 ó Pharlaimint na hEorpa agus ón gComhairle (3), leasaíodh an sainmhíniú ar “mhalartán aitheanta” le déanaí, a leagtar síos in Airteagal 4(1), pointe (72) de Rialachán (AE) Uimh. 575/2013. Is é a bhí sa leasú sin na focail “nó margadh tríú tír a mheastar a bheith comhionann le margadh rialáilte i gcomhréir leis an nós imeachta a leagtar amach i bpointe (a) d’Airteagal 25(4) de Threoir 2014/65/AE ó Pharlaimint na hEorpa agus ón gComhairle” a chur le pointe (a) den phointe (72) sin. De bharr an leasaithe sin, níl “malartáin aitheanta” teoranta do “mhargaí rialáilte” amháin a thuilleadh. Ba cheart an leasú sin a léiriú i Rialachán Cur Chun Feidhme (AE) 2016/1646 trí na malartáin sin ar ghlac an Coimisiún cinneadh coibhéise ina leith de bhun Airteagal 25(4), pointe (a), de Threoir 2014/65/AE ó Pharlaimint na hEorpa agus ón gComhairle a áireamh sa Rialachán sin (4).

(4)

Tar éis don Ríocht Aontaithe tarraingt siar as an Aontas de bhun Airteagal 50 den Chonradh ar an Aontas Eorpach, scoir na Conarthaí d’fheidhm a bheith acu maidir leis an Ríocht Aontaithe ón 1 Feabhra 2020 agus is tríú tír anois í an Ríocht Aontaithe. Faoi láthair, níor ghlac an Coimisiún cinneadh coibhéise i gcomhréir le hAirteagal 25(4), pointe (a), de Threoir 2014/65/AE i leith na Ríochta Aontaithe. Dá bhrí sin, is gá na malartáin sin arna mbunú sa Ríocht Aontaithe a eisiamh ó liosta na malartuithe aitheanta.

(5)

Tharla athruithe áirithe i struchtúr an mhargaidh ó theacht i bhfeidhm Rialachán Cur Chun Feidhme (AE) 2016/1646, go háirithe a mhéid a bhaineann le teacht chun cinn malartán nua, cumasc, athruithe ainmneacha nó scor na ngníomhaíochtaí. Ba cheart na hathruithe sin a léiriú i Rialachán Cur Chun Feidhme (AE) 2016/1646.

(6)

Dá bhrí sin, ba cheart Rialachán Cur Chun Feidhme (AE) 2016/1646 a leasú dá réir.

(7)

Tá an Rialachán seo bunaithe ar na dréachtchaighdeáin theicniúla cur chun feidhme arna gcur faoi bhráid an Choimisiúin ag an Údarás Eorpach um Urrúis agus Margaí (ESMA).

(8)

Tá comhairliúchán poiblí oscailte déanta ag ESMA maidir leis na dréachtchaighdeáin theicniúla cur chun feidhme ar a bhfuil an Rialachán seo bunaithe, tá anailís déanta aige ar na costais agus ar na tairbhí a d’fhéadfadh a bheith ag baint leo ann agus d’iarr sé comhairle ón nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (5).