(1)

Le Treoir 2005/58/CE ón gCoimisiún (2), áirítear défheineasáit mar shubstaint ghníomhach in Iarscríbhinn I a ghabhann le Treoir 91/414/CEE ón gComhairle (3).

(2)

Maidir leis na substaintí gníomhacha a áirítear in Iarscríbhinn I a ghabhann le Treoir 91/414/CEE, meastar iad a bheith formheasta faoi Rialachán (CE) Uimh. 1107/2009 agus liostaítear iad i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (4).

(3)

An formheas ar an tsubstaint ghníomhach défheineasáit, mar a leagtar amach i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 31 Iúil 2022.

(4)

Cuireadh iarratas ar fhormheas na substainte gníomhaí défheineasáit a athnuachan faoi bhráid an Bhallstáit is rapóirtéir i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (5) laistigh den tréimhse ama dá bhforáiltear san Airteagal sin.

(5)

Chuir an t-iarratasóir isteach na sainchomhaid fhorlíontacha a cheanglaítear i gcomhréir le hAirteagal 6 de Rialachán Cur Chun Feidhme (AE) Uimh. 844/2012. Chinn an Ballstát is rapóirtéir an t-iarratas a bheith iomlán.

(6)

D’ullmhaigh an Ballstát is rapóirtéir dréacht-tuarascáil maidir le measúnú ar athnuachan i gcomhairle leis an mBallstát is comhrapóirtéir agus chuir sé faoi bhráid an Údaráis Eorpaigh um Shábháilteacht Bia (“an tÚdarás”) agus faoi bhráid an Choimisiúin í an 29 Eanáir 2016.

(7)

Chuir an tÚdarás an sainchomhad achomair forlíontach ar fáil don phobal. Scaip an tÚdarás an dréacht-tuarascáil maidir le measúnú ar athnuachan ar an iarratasóir agus ar na Ballstáit chomh maith chun barúlacha a fháil uathu agus sheol sé comhairliúchán poiblí ina leith. Chuir an tÚdarás na barúlacha a fuarthas ar aghaidh chuig an gCoimisiún.

(8)

An 4 Eanáir 2017, chuir an tÚdarás a chonclúid (6) in iúl don Choimisiún maidir le cé acu is féidir nó nach féidir coinne a bheith leis go gcomhlíonfaidh défheineasáit na critéir formheasa dá bhforáiltear in Airteagal 4 de Rialachán (CE) Uimh. 1107/2009, conclúid ina shainaithin EFSA ardriosca d’éin, mamaigh agus artrapóid nach spriocartrapóid iad le haghaidh gach úsáide ionadaíche agus ina theannta sin, shainaithin sé ardriosca d’oibreoirí agus oibrithe le haghaidh fhormhór na n-úsáidí ionadaíocha. Thairis sin, ní fhéadfaí an measúnú riosca d’orgánaigh uisceacha agus tomhaltóirí a thabhairt chun críche.

(9)

An 17 Samhain 2020, thug an Coimisiún sainordú do EFSA measúnú a dhéanamh ar an riosca i gcás ina n-úsáidtear défheineasáit uair sa bhliain agus úsáid á baint as an leibhéal dáileoige is ísle a chuirtear i láthair sa sainchomhad. Thug an Ballstát is rapóirtéir a dhréacht-Tuarascáil maidir le Measúnú ar Athnuachan cothrom le dáta dá réir sin agus thug an tÚdarás a chonclúid cothrom le dáta an 30 Lúnasa 2021 (7), conclúid inar shainaithint sé ardriosca d’éin trí nochtadh fadtéarmach do dhéfheineasáit le haghaidh gach úsáide ionadaíche. Thairis sin, ní fhéadfaí an measúnú riosca do thomhaltóirí a thabhairt chun críche. Chuir an Coimisiún tuarascáil athnuachana maidir le défheineasáit faoi bhráid an Bhuanchoiste um Plandaí, Ainmhithe, Bia agus Beatha an 19 Iúil 2017 agus an 22 Deireadh Fómhair 2021 mar aon le dréacht den Rialachán seo an 1 Nollaig 2021.

(10)

D’iarr an Coimisiún ar an iarratasóir a bharúlacha a chur isteach maidir leis an dá chonclúid ón Údarás agus, i gcomhréir le hAirteagal 14(1), an tríú fomhír, de Rialachán Cur Chun Feidhme (AE) Uimh. 844/2012 (8), maidir leis an tuarascáil athnuachana. Chuir an t-iarratasóir a bharúlacha isteach, agus rinneadh scrúdú cúramach orthu.

(11)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil an tsubstaint ghníomhach défheineasáit, suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(12)

Is iomchuí, dá bhrí sin, an formheas ar dhéfheineasáit a athnuachan.

(13)

I gcomhréir le hAirteagal 14(1) de Rialachán (CE) Uimh. 1107/2009 i gcomhar le hAirteagal 6 de agus i bhfianaise an eolais eolaíoch reatha agus an eolais theicniúil reatha, is gá foráil a dhéanamh maidir le coinníollacha agus srianta áirithe. Is iomchuí, go háirithe, úsáid táirgí cosanta plandaí ina bhfuil défheineasáit a shrianadh do bharra nach bhfuil inite i dtithe gloine buana agus tuilleadh faisnéis dhaingnitheach a éileamh.

(14)

Maidir lena húsáid a shrianadh do bharra nach bhfuil inite, eisiafar nochtadh cothúcháin tomhaltóirí agus éilítear é toisc nach bhféadfaí an measúnú riosca do thomhaltóirí a thabhairt chun críche. Toisc gur sainaithníodh ardriosca d’éin trí nochtadh fadtéarmach do dhéfheineasáit, le srianadh d’úsáid i dtithe gloine mar a shainmhínítear in Airteagal 3 de Rialachán (CE) Uimh. 1107/2009 áiritheofar nach nochtfar éin do dhéfheineasáit. Ina theannta sin, toisc gur shainaithin an tÚdarás ardriosca do mhamaigh le haghaidh roinnt úsáidí ionadaíocha agus ardriosca ainsealach do bheacha bunaithe ar na sonraí atá ar fáil, leis an srianadh d’úsáid i dtithe gloine amháin, déanfar nochtadh na n-orgánach sin nach spriocorgánaigh iad chomh maith le láithreacht in uisce óil a chosc freisin.

(15)

A mhéid a bhaineann leis na critéir chun airíonna réabtha iontálaigh a aithint, critéir a tugadh isteach le Rialachán (AE) 2018/605 ón gCoimisiún (9), ar bhonn na faisnéise eolaíche atá ar fáil a ndearnadh achoimre uirthi i gconclúid an Údaráis, cinneann an Coimisiún nach ceart a mheas go bhfuil airíonna réabtha iontálaigh ag défheineasáit.

(16)

Chun cur leis an muinín as an gconclúid nach bhfuil airíonna réabtha iontálaigh ag défheineasáit, ba cheart don iarratasóir measúnú nuashonraithe a chur ar fáil, i gcomhréir le pointe 2.2(b) d’Iarscríbhinn II a ghabhann le Rialachán (CE) Uimh. 1107/2009, is é sin, measúnú ar na critéir a leagtar síos i bpointe 3.6.5 agus pointe 3.8.2 d’Iarscríbhinn II a ghabhann le Rialachán (CE) Uimh. 1107/2009, agus i gcomhréir leis an treoir maidir le réabóirí iontálacha a aithint (10).

(17)

An measúnú riosca maidir le hathnuachan an fhormheasa ar an tsubstaint ghníomhach défheineasáit, tá sé bunaithe ar úsáidí ionadaíocha mar acairicíd. I bhfianaise an mheasúnaithe riosca sin, ní gá an srianadh maidir lena húsáid mar acairicíd amháin a choinneáil ar bun.

(18)

Dá bhrí sin, ba cheart Rialachán Cur Chun Feidhme (AE) Uimh. 540/2011 a leasú dá réir.

(19)

Le Rialachán Cur Chun Feidhme (AE) 2021/745 ón gCoimisiún (11), cuireadh síneadh le tréimhse formheasa na défheineasáite go dtí an 31 Iúil 2022 chun go bhféadfar an próiseas athnuachana a chur i gcrích sula rachaidh tréimhse formheasa na substainte gníomhaí sin in éag. Mar sin féin, ós rud é go ndearnadh cinneadh maidir leis an athnuachan roimh dhul in éag na tréimhse formheasa sin ar cuireadh síneadh léi, beidh feidhm ag an Rialachán seo a luaithe is féidir.

(20)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,