(1)

Le Rialachán (CE) Uimh. 1831/2003, foráiltear maidir le húdarú breiseán lena n-úsáid i gcothú ainmhithe agus maidir leis an bhforas agus na nósanna imeachta i leith an t-údarú sin a dheonú.

(2)

Údaraíodh beansóáit sóidiam ar feadh 10 mbliana mar bhreiseán beathaithe le haghaidh bainbh scoite le Rialachán Cur Chun Feidhme (AE) Uimh. 496/2011 (2).

(3)

I gcomhréir le hAirteagal 14(1) de Rialachán (CE) Uimh. 1831/2003, i gcomhar le hAirteagal 7 de, chuir sealbhóir an údaraithe iarratas isteach ar athnuachan an údaraithe beansóáite sóidiam le haghaidh bainbh scoite agus ar údarú úsáide nuaí le haghaidh bainbh scoite de Suidae eile, iarratas inar iarradh go n-aicmeofaí an breiseán sin sa chatagóir breiseán ‘breiseáin zóiteicniúla’ agus san fheidhmghrúpa “breiseáin zóiteicniúla eile”. Bhí na sonraí agus na doiciméid a cheanglaítear faoi Airteagal 7(3) agus Airteagal 14(2) den Rialachán sin ag gabháil leis an iarratas sin.

(4)

I dtuairim an 29 Meán Fómhair 2021 ón Údarás Eorpach um Shábháilteacht Bia (“an tÚdarás”) is í an chonclúid ar ar thángthas (3) nach bhfuil tionchar díobhálach ag beansóáit sóidiam ar shláinte banbh scoite, ar shábháilteacht an tomhaltóra ná ar an gcomhshaol, faoi na coinníollacha úsáide atá beartaithe. Suidae eile atá ag fás, féadfar an chonclúid sin a leathnú chun iad a chumhdach. Tháinig an tÚdarás ar an gconclúid gur cheart a mheas gur íogróir craicinn é an breiseán agus go bhfuil riosca trí ionanálú ag baint lena fhoirmliú púdair. Dá bhrí sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte an duine a chosc, go háirithe a mhéid a bhaineann le húsáideoirí an bhreiseáin. Thairis sin, tháinig an tÚdarás ar an gconclúid, ar bhonn sonraí éifeachtúlachta ar a ndearnadh meastóireacht roimhe sin, go bhféadfadh an breiseán a bheith éifeachtúil i mbainbh scoite. Speicis Suidae eile atá ag fás, féadfar na conclúidí maidir leis an éifeachtúlacht a baineadh amach i mbainbh scoite a leathnú chun na speicis sin a chumhdach ag an gcéim fhiseolaíoch chomhfhreagrach. Ní mheasann an tÚdarás go bhfuil gá le ceanglais shonracha maidir le faireachán iarmhargaidh. D’fhíoraigh sé freisin an tuarascáil ar an modh a úsáidtear chun anailís a dhéanamh ar an mbreiseán beathaithe i mbeatha ainmhithe arna cur isteach ag an Saotharlann Tagartha a bunaíodh le Rialachán (CE) Uimh. 1831/2003.

(5)

Léirítear leis an measúnú ar bheansóáit sóidiam go gcomhlíontar na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir in, ba cheart údarú an bhreiseáin sin a athnuachan le haghaidh bainbh scoite, agus ba cheart a úsáid a údarú le haghaidh bainbh de speicis Suidae eile atá ag an gcéim fhiseolaíoch chomhfhreagrach, faoi mar a shonraítear san Iarscríbhinn a ghabhann leis an Rialachán seo.

(6)

De thoradh údarú beansóáite sóidiam a athnuachan mar bhreiseán beathaithe faoi na coinníollacha a leagtar síos san Iarscríbhinn a ghabhann leis an Rialachán seo, ba cheart Rialachán Cur Chun Feidhme (AE) Uimh. 496/2011 a aisghairm.

(7)

Ós rud é nach gceanglaítear, ar chúiseanna sábháilteachta, go gcuirfear na modhnuithe i bhfeidhm láithreach ar na coinníollacha maidir le húdarú i leith na substainte lena mbaineann, is iomchuí go mbeadh idirthréimhse ag na páirtithe leasmhara chun iad féin a ullmhú chun na ceanglais nua a eascraíonn as athnuachan an údaraithe a chomhlíonadh.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,