(1)

Le Rialachán Tarmligthe (AE) 2020/692 (2) ón gCoimisiún leagtar síos, inter alia, ceanglais sláinte ainmhithe maidir le coinsíneachtaí d’ainmhithe talún áirithe atá ar coimeád a thabhairt isteach san Aontas. Go sonrach, le Cuid VI den Rialachán Tarmligthe seo leagtar síos rialacha speisialta maidir le tráchtearraí áirithe de thionscnamh an Aontais a thabhairt isteach san Aontas agus a thabhairt ar ais go dtí an tAontas. Ní áirítear le hAirteagal 177 de Rialachán Tarmligthe (AE) 2020/692 faoi láthair ach rialacha speisialta atá le comhlíonadh ag capaill chláraithe, capaill ar de bhunadh an Aontais iad agus atá ag teacht ar ais go dtí an tAontas tar éis onnmhairiú sealadach go tríú tír nó críoch nó crios di chun bheith rannpháirteach i gcomórtais, rásaí nó imeachtaí cultúrtha eachaíochta.

(2)

Ionas go n-éascófar a rannpháirtíocht in imeachtaí, taispeántais agus seónna (“imeachtaí”) a reáchtáiltear lasmuigh den Aontas, ní mór foráil a dhéanamh maidir le maolú ar cheanglais ghinearálta áirithe maidir le sláinte ainmhithe, ceanglais a leagtar síos in Airteagal 11 de Rialachán Tarmligthe (AE) 2020/692 le haghaidh coinsíneachtaí de chrúbaigh ar de bhunadh an Aontais iad a aistrítear go tríú tír nó críoch nó crios di chun bheith rannpháirteach in imeachtaí agus a aistrítear ar ais go dtí an tAontas láithreach. Mar sin féin, chun na rioscaí don tsláinte ainmhithe a íoslaghdú, agus cúinsí reatha maidir le sláinte ainmhithe á gcur san áireamh ó thaobh galair áirithe a dhéanann difear do mhucaigh agus d’éanlaith chlóis, ba cheart an maolú sin a theorannú do speicis áirithe crúbach, mar atá ainmhithe buaibheacha, ainmhithe de chineál caorach agus ainmhithe de chineál gabhair (“maolú le haghaidh na gcrúbach”). Dá bhrí sin, ba cheart Airteagal 177 de Rialachán Tarmligthe (AE) 2020/692 a leasú chun an maolú le haghaidh na gcrúbach a chuimsiú.

(3)

Leis na rialacha speisialta maidir leis an maolú le haghaidh na gcrúbach, na rioscaí sláinte ainmhithe a d’fhéadfadh eascairt as na cineálacha sin gluaiseachtaí le haghaidh imeachtaí, ba cheart na rioscaí sin a chuimsiú, agus ba cheart iad a bheith i gcomhréir leis na rioscaí sláinte ainmhithe lena mbaineann. Maidir leis na hainmhithe atá rannpháirteach sna himeachtaí, ba cheart na rialacha speisialta seo a bheith dian a ndóthain chun a áirithiú nach dtagann na hainmhithe sin i dteagmháil le hainmhithe eile a bhfuil stádas sláinte níos ísle acu agus nach gcomhlíonann na ceanglais sláinte ainmhithe ar fad a leagtar síos i ndlí an Aontais.

(4)

Ina theannta sin, i bhfianaise a chosúla atá na hoibríochtaí a dhéantar sna himeachtaí leis na hoibríochtaí a dhéantar sna hionaid tionóil, is iomchuí ceanglais a leagan síos atá coibhéiseach leis na ceanglais is infheidhme sna hionaid tionóil i dtríú tíortha nó críocha, ceanglais a leagtar síos in Airteagal 20(2), pointe (b), de Rialachán Tarmligthe (AE) 2020/692 agus atá bunaithe ar na ceanglais is infheidhme san Aontas a leagtar síos le Rialachán Tarmligthe (AE) 2019/2035 ón gCoimisiún (3).

(5)

Mar aon leis na bearta maolaithe riosca sin ar fad, ní foláir freisin srian a chur leis an tréimhse ina bhfágtar na hainmhithe gan cosaint ar na rioscaí sláinte ainmhithe a d’fhéadfadh a bheith ann de bharr na gcineálacha sin gluaiseachtaí chun bheith rannpháirteach sna himeachtaí agus de bharr na dtréimhsí a chaitheann na hainmhithe lasmuigh de chríocha an Aontais.

(6)

Dá bhrí sin, ba cheart Airteagal 177 de Rialachán Tarmligthe (AE) 2020/692 a leasú dá réir sin,