(1)

I gcomhréir le Cinneadh (CBES) 2021/509 ón gComhairle (1), bunaíodh Saoráid Eorpach Síochána chun go maoineodh Ballstáit gníomhaíochtaí an Aontais faoin gcomhbheartas eachtrach agus slándála (CBES) chun an tsíocháin a chaomhnú, coinbhleachtaí a chosc agus an tslándáil idirnáisiúnta a neartú i gcomhréir le hAirteagal 21(2), pointe (c), den Chonradh. Go háirithe, de bhun Airteagal 1(2), pointe (b)(i), de Chinneadh (CBES) 2021/509, leis an tSaoráid Eorpach Síochána féadfar gníomhaíochtaí a mhaoiniú chun acmhainneachtaí a bhaineann le cúrsaí míleata agus cosanta atá ag tríú Stáit agus eagraíochtaí réigiúnacha agus idirnáisiúnta a neartú.

(2)

Bunaíodh Tascfhórsa Leighis na mBalcán mar thionscnamh réigiúnach ina dtugtar le chéile sé thír de chuid na mBalcán Thiar, eadhon an Albáin, an Bhoisnia agus an Heirseagaivéin, Montainéagró, an Mhacadóin Thuaidh, an tSeirbia agus an tSlóivéin, agus é d’aidhm aige freagairt thapa agus éifeachtach a chur ar fáil do thíortha nó réigiúin atá buailte ag tubaiste trí úsáid a bhaint as acmhainneachtaí míleata leighis atá ag na náisiúin rannpháirteacha cheana féin. Glacann gach ceann de na sé thír rannpháirteacha ceannas ar ról an “Chreatnáisiúin” ar bhonn uainíochta 2 bhliain. Clúdaíonn an Mhacadóin Thuaidh an ról sin don tréimhse ó Mheitheamh 2020 go dtí Meitheamh 2022. Sa dara leath de 2021, thug an eagraíocht rialacha inmheánacha nua isteach lena gceadaítear imscaradh níos fadtéarmaí mar thaca le misin agus oibríochtaí, lena n-áirítear mar chuid de mhisin agus oibríochtaí an chomhbheartais slándála agus cosanta (CBSC) lasmuigh de na Balcáin Thiar.

(3)

Tríd an trealamh agus an t-ábhar is gá a thabhairt d’aonaid leighis na bhFórsaí Armtha neamh-AE atá rannpháirteach i dTascfhórsa Leighis na mBalcán, neartódh an tAontas acmhainneachtaí míleata leighis thíortha na mBalcán Thiar lena mbaineann agus threiseodh sé aonad míleata leighis ilnáisiúnta a d’fhéadfadh tacú le gnéithe míleata d’oibríochtaí síochána lasmuigh den réigiún, agus rannchuidiú le spriocanna cumais agus spriocanna comhpháirtíochta ECAT a bhaint amach faoi Chomhpháirtíocht na Síochána.

(4)

Leis an mbeart cúnaimh sin, ba cheart freisin cumas na mBalcán Thiar freagairt ar ghéarchéimeanna a neartú agus athléimneacht an réigiúin a mhéadú, agus ar an gcaoi sin cur, ar deireadh, leis an gcobhsaíocht réigiúnach, agus cur ar chumas na dtíortha sa réigiún cosaint níos fearr a thabhairt dá bpobail. Leis an mbeart cúnaimh sin, ba cheart go gcuirfí le comhar agus le comhtháthú réigiúnach, agus dea-chaidreamh comharsanachta a chur chun cinn sna Balcáin Thiar.

(5)

Sa litir uaidh an 18 Aibreán 2022, a seoladh chuig Ardionadaí an Aontais do Ghnóthaí Eachtracha agus don Bheartas Slándála (“an tArdionadaí”), d’iarr Aire Cosanta Phoblacht na Macadóine Thuaidh, thar ceann Thascfhórsa Leighis na mBalcán, ar an Aontas tacú le Tascfhórsa Leighis na mBalcán i dtaca le trealamh bunriachtanach a sholáthar chun acmhainneacht a aonad leighis a neartú.

(6)

I gcomhréir leis na conclúidí ón gComhairle maidir leis an tSaoráid Eorpach Síochána, leis an mbeart cúnaimh seo, thabharfaí de chumhacht do náisiúin rannpháirteacha Thascfhórsa Leighis na mBalcán nach bhfuil san Aontas freagairt go neamhspleách ar ghéarchéimeanna. Trí chúig thír de chuid na mBalcán Thiar a thabhairt le chéile, chuirfeadh an beart cúnaimh sin le spriocanna níos leithne CBES/CBSC sa réigiún, amhail comhar agus idirphlé réigiúnach a chur chun cinn.

(7)

Nuair a bheidh an beart cúnaimh curtha i gcrích, déanfaidh an tArdionadaí meastóireacht ar a thionchar, agus ar bhainistiú agus ar úsáid an trealaimh a cuireadh ar fáil. Mar thoradh ar an gcleachtadh sin, beidh próiseas i ndáil le ceachtanna a foghlaimíodh a bhfuil sé d’aidhm aige measúnú a dhéanamh ar éifeachtacht an bhirt cúnaimh, agus ar a chomhsheasmhacht le straitéis agus beartais fhoriomlána an Aontais sa tír thairbhíoch.

(8)

Tá bearta cúnaimh le cur chun feidhme i gcomhréir leis na prionsabail agus na ceanglais a leagtar amach i gCinneadh (CBES) 2021/509, agus go háirithe Comhsheasamh 2008/944/CBES (2) ón gComhairle a chomhlíonadh, agus i gcomhréir leis na rialacha do chur chun feidhme an ioncaim agus an chaiteachais a mhaoinítear faoin tSaoráid Eorpach Síochána.

(9)

Athdhearbhaíonn an Chomhairle go bhfuil rún daingean aici cearta an duine, saoirsí bunúsacha agus prionsabail dhaonlathacha a chosaint, a chur chun cinn agus a chomhlíonadh, an smacht reachta agus an dea-rialachas a neartú, i gcomhréir le Cairt na Náisiún Aontaithe, le Dearbhú Uilechoiteann Chearta an Duine agus leis an dlí idirnáisiúnta, go háirithe an dlí idirnáisiúnta um chearta an duine agus an dlí daonnúil idirnáisiúnta,