(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis an bhforas agus na nósanna imeachta chun an t-údarú sin a dheonú agus a athnuachan.

(2)

Le Rialachán (CE) Uimh. 271/2009 ón gCoimisiún (2) údaraíodh ullmhóid einsímeach d’ion-1,4-béite-xiolanáis arna táirgeadh ag Aspergillus niger CBS 109.713 agus ion-1,4-béite-ghlúcanáis arna táirgeadh ag Aspergillus niger DSM 18404 (“an ullmhóid atá i gceist”), ar feadh 10 mbliana mar bhreiseán beathaithe le haghaidh bainbh scoite, sicíní lena ramhrú, béaróg, turcaithe lena ramhrú agus lachan lena ramhrú agus, le Rialachán Cur Chun Feidhme (AE) Uimh. 1068/2011 ón gCoimisiún (3), údaraíodh an ullmhóid einsímeach sin le haghaidh sicíní a thógtar le bheith ina mbéaróg, turcaithe a thógtar chun críoch pórúcháin, turcaithe a thógtar le haghaidh pórúcháin, mionspeicis éanúla eile (seachas lachain lena ramhrú) agus éin ornáideacha.

(3)

I gcomhréir le hAirteagal 14(1) de Rialachán (CE) Uimh. 1831/2003, cuireadh iarratas isteach chun athnuachan a dhéanamh ar údarú na hullmhóide atá i gceist mar bhreiseán beathaithe le haghaidh speicis éanlaithe clóis, éin ornáideacha agus bainbh scoite i gcatagóir na mbreiseán dar teideal “breiseáin zóiteicniúla”. Bhí na sonraí agus na doiciméid a éilítear faoi Airteagal 14(2) de Rialachán (CE) Uimh. 1831/2003 ag gabháil leis an iarratas.

(4)

Chinn an tÚdarás Eorpach um Shábháilteacht Bia (“an tÚdarás”) ina thuairim an 18 Samhain 2020 (4) gur chuir an t-iarratasóir sonraí ar fáil a léiríonn go gcomhlíonann an ullmhóid atá i gceist na coinníollacha maidir le húdarú faoi na coinníollacha úsáide atá beartaithe. Dheimhnigh an tÚdarás na conclúidí a d’eisigh sé roimhe sin nach bhfuil éifeacht dhíobhálach ag an ullmhóid atá i gceist ar shláinte ainmhithe, ar shábháilteacht tomhaltóirí ná ar an gcomhshaol. Shonraigh sé chomh maith gur cheart a mheas go bhfuil an fhéidearthacht ann go bhfuil an breiseán ina íogróir craicinn agus riospráide. Dá bhrí sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte an duine a chosc, go háirithe a mhéid a bhaineann le húsáideoirí an bhreiseáin. Rinne an tÚdarás fíorú freisin ar an tuarascáil faoi mhodh anailíse an bhreiseáin beathaithe agus é i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

Léirítear leis an measúnú ar an ullmhóid atá i gceist go gcomhlíontar na coinníollacha maidir le húdarú, dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart údarú an bhreiseáin sin a athnuachan mar a shonraítear san Iarscríbhinn a ghabhann leis an Rialachán seo.

(6)

Mar thoradh ar an athnuachan ar údarú na hullmhóide atá i gceist mar bhreiseán beathaithe, ba cheart Rialachán (CE) Uimh. 271/2009 agus Rialachán Cur Chun Feidhme (AE) Uimh. 1068/2011 a aisghairm.

(7)

Ós rud é nach gá, ar chúiseanna sábháilteachta, modhnuithe ar na coinníollacha údaraithe maidir leis an ullmhóid atá i gceist a chur i bhfeidhm láithreach, is iomchuí idirthréimhse a cheadú do na páirtithe leasmhara ionas gur féidir leo iad féin a ullmhú chun na ceanglais nua a eascraíonn as athnuachan an údaraithe a chomhlíonadh.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,