(1)

Agus cúraimí an Choimisiúin á gcomhlíonadh aige, tá an Coimisiún faoi cheangal cearta daoine nádúrtha a urramú i ndáil le próiseáil sonraí pearsanta mar a aithnítear le hAirteagal 8(1) den Chairt um Chearta Bunúsacha an Aontais Eorpaigh agus in Airteagal 16(1) den Chonradh ar Fheidhmiú an Aontais Eorpaigh. Tá sé faoi cheangal, freisin, na cearta dá bhforáiltear i Rialachán (AE) 2018/1725 ó Pharlaimint na hEorpa agus ón gComhairle (1) a urramú. An tráth céanna, ní mór don Choimisiún teagmhais slándála TF a láimhseáil i gcomhréir leis na rialacha a leagtar síos in Airteagal 15 de Chinneadh (AE, Euratom) 2017/46 (2).

(2)

Chun slándáil TF a áirithiú, is é sin caomhnú a dhéanamh ar rúndacht, sláine, agus infhaighteacht córas cumarsáide agus faisnéise agus ar na tacair sonraí a phróiseáiltear leo, a mhéid a bhaineann le daoine, le sócmhainní agus le faisnéis, tá bearta déanta ag an gCoimisiún, go háirithe trí Ard-Stiúrthóireacht na Faisnéisíochta, dá bhforáiltear i gCinneadh (AE, Euratom) 2017/46 agus i gCinneadh C(2017) 8841 final (3). Áirítear ar na bearta sin, faireachán a dhéanamh ar na rioscaí slándála TF agus ar na bearta slándála TF arna gcur chun feidhme, iarraidh ar úinéirí córais bearta slándála TF sonracha a dhéanamh chun maolú a dhéanamh ar rioscaí slándála TF i ndáil le córais chumarsáide agus faisnéise an Choimisiúin agus teagmhais slándála TF a bhainistiú.

(3)

Soláthraíonn Ard-Stiúrthóireacht na Faisnéisíochta oibríochtaí agus seirbhísí slándála TF don Choimisiún agus ní mór dó roinnt catagóirí sonraí pearsanta a phróiseáil chun:

(4)

Teagmhais slándála TF a d’fhéadfadh dochar a dhéanamh do shlándáil córas faisnéise agus cumarsáide an Choimisiúin, d’fhéadfadh na teagmhais sin tarlú in aon oibríocht phróiseála arna déanamh ag an gCoimisiún. D’fhéadfadh baint a bheith acu le haon chatagóir sonraí pearsanta a phróiseálann an Coimisiún.

(5)

In imthosca áirithe, d’fhéadfadh sé gur gá cearta na n-ábhar sonraí faoi Rialachán (AE) 2018/1725 a réiteach le riachtanas an Choimisiúin a chúraimí a chur i gcrích go héifeachtach maidir le slándáil TF daoine, sócmhainní agus faisnéise a áirithiú sa Choimisiún faoi Chinneadh (AE, Euratom) 2017/46, agus cearta agus saoirsí bunúsacha na n-ábhar sonraí eile á n-urramú go hiomlán aige. Chuige sin, le hAirteagal 25(1) de Rialachán (AE) 2018/1725, údaraítear don Choimisiún srian a chur ar chur i bhfeidhm Airteagail 14 go 17, Airteagal 19, Airteagal 20 agus Airteagal 35 den Rialachán sin, agus phrionsabal na trédhearcachta a leagtar síos in Airteagal 4(1)(a) de, a mhéid a chomhfhreagraíonn forálacha an Airteagail sin leis na cearta agus na hoibleagáidí dá bhforáiltear in Airteagail 14 go 17, Airteagal 19 agus Airteagal 20 den Rialachán sin.

(6)

Ba cheart feidhm a bheith ag an gCinneadh seo maidir le gach oibríocht phróiseála arna déanamh ag an Coimisiún, ina cháil mar rialaitheoir sonraí, agus a chúraimí maidir le slándáil TF daoine, sócmhainní agus faisnéise a áirithiú sa Choimisiún de bhun Chinneadh (AE, Euratom) 2017/46 á gcur i gcrích aige. Dá bhrí sin, ba cheart baint a bheith aige leis na hábhair sonraí atá faoi chatagóirí na sonraí pearsanta a chumhdaítear leis na hoibríochtaí próiseála uile sin, i.e. daoine aonair a bhíonn ag idirghníomhú le haon cheann de chórais chumarsáide agus faisnéise an Choimisiúin.

(7)

Stóráiltear sonraí pearsanta i dtimpeallacht leictreonach shlán chun rochtain neamhdhleathach ag daoine lasmuigh den Choimisiún ar na sonraí sin a chosc. Tá feidhm ag tréimhsí coinneála sonraí éagsúla maidir le hoibríochtaí próiseála éagsúla, de réir chineál na sonraí pearsanta lena mbaineann. Maidir le comhaid a choinneáil sa Choimisiúin, tá sé faoi rialú ag Liosta Coinneála Coiteann ar Leibhéal an Choimisiúin (SEC(2019) 900), doiciméad rialála i bhfoirm sceideal coinneála lena leagtar amach na tréimhsí coinneála le haghaidh cineálacha éagsúla comhad de chuid an Choimisiúin chun coinneáil sonraí a theorannú don mhéid is gá.

(8)

D’fhéadfadh sé go mbeadh ar an gCoimisiún srian a chur ar fheidhmiú chearta na n-ábhar sonraí chun a shlándáil inmheánach a chosaint de bhun Airteagal 25(1)(d), de Rialachán (AE) 2018/1725 (i.e. chun caomhnú a dhéanamh ar rúndacht, sláine, agus infhaighteacht a chóras cumarsáide agus faisnéise agus na dtacar sonraí a phróiseáiltear leo, agus ar a chuid sócmhainní agus faisnéise). Go háirithe, d’fhéadfadh sé go mbeadh ar an gCoimisiún déanamh amhlaidh agus é:

(9)

Chun teagmhais slándála TF a láimhseáil, dá dtagraítear in Airteagal 15 de Chinneadh (AE, Euratom) 2017/46, féadfaidh Ard-Stiúrthóireacht na Faisnéisíochta faisnéis a mhalartú le Foireann Freagartha do Chibirionsaithe na hArd-Stiúrthóireachta atá freagrach as Acmhainní Daonna agus Slándáil.

(10)

Chun Airteagal 14, Airteagal 15 agus Airteagal 16 de Rialachán (AE) 2018/1725 a chomhlíonadh, ba cheart don Choimisiún gach duine aonair a chur ar an eolas faoi na gníomhaíochtaí ina bpróiseáiltear a sonraí pearsanta agus ina ndéantar difear dá gcearta. Ba cheart dó sin a dhéanamh ar bhealach trédhearcach comhleanúnach trí fhógra cosanta sonraí a fhoilsiú ar shuíomh gréasáin an Choimisiúin. I gcás inarb ábhartha, ba cheart dó coimircí breise a chur i bhfeidhm chun ábhair sonraí a chur ar an eolas ar bhonn aonair i bhformáid iomchuí.

(11)

Trí Airteagal 14, Airteagal 15 agus Airteagal 16 de Rialachán (AE) 2018/1725 a chomhlíonadh, d’fhéadfaí na bearta, na leochaileachtaí nó na teagmhais slándála TF atá ann, dá dtagraítear in Airteagal 15 de Chinneadh (AE, Euratom) 2017/46, a nochtadh. Trí na bearta, na leochaileachtaí agus na teagmhais slándála TF sin a nochtadh, is mó an riosca go sárófaí an beart slándála TF neamhchosanta, go mbainfí mí-úsáid ansin as an leochaileacht neamhchosanta agus go bhféadfaí dochar a dhéanamh d’anailís leanúnach ar theagmhas slándála TF mar go bhféadfadh úsáideoir nó gníomhaí mailíseach déantáin a ionramháil trí thimpiste nó d’aon ghnó. D’fhéadfadh sin bac tromchúiseach a chur ar chumas an Choimisiúin a shlándáil TF a áirithiú agus go háirithe ar a chumas teagmhais slándála TF a láimhseáil go héifeachtach sa todhchaí.

(12)

Faoi Airteagal 25(1)(h), de Rialachán (AE) 2018/1725, údaraítear don Choimisiún freisin srian a chur ar fheidhmiú ceart ábhar sonraí chun cearta agus saoirsí daoine aonair eile a chosaint a mhéid a bhaineann le teagmhais slándála a d’fhéadfadh dochar a dhéanamh d’oibríochtaí slándála TF.

(13)

D’fhéadfadh sé go mbeadh ar an gCoimisiún srian a chur le faisnéis a sholáthar d’ábhair sonraí agus le feidhmiú chearta eile na n-ábhar sonraí i ndáil le sonraí pearsanta arna bhfáil ó thíortha nach Ballstáit den Aontas iad nó ó eagraíochtaí idirnáisiúnta, chun a dhualgas maidir le dul i gcomhar leis na tíortha nó na heagraíochtaí sin a chomhlíonadh. Is cuid de dhualgas an Choimisiúin é sin chun cuspóir tábhachtach a bhaineann le leas phobal an Aontais i gcoitinne a chosaint, dá dtagraítear in Airteagal 25(1)(c) de Rialachán (AE) 2018/1725. Mar sin féin, in imthosca áirithe, d’fhéadfadh leas chearta bunúsacha an ábhair sonraí tús áite a fháil ar leas an chomhair idirnáisiúnta.

(14)

Dá bhrí sin, shainaithin an Coimisiún na forais a liostaítear in Airteagal 25(1)(c), (d) agus (h) de Rialachán (AE) 2018/1725 mar fhorais le haghaidh srianta a bhféadfadh gur gá iad a chur i bhfeidhm maidir le hoibríochtaí próiseála sonraí arna ndéanamh ag Ard-Stiúrthóireachta na Faisnéisíochta, arb oibríochtaí iad a bhaineann le hoibríochtaí agus seirbhísí slándála TF a sholáthar don Choimisiún.

(15)

Aon srian arna chur chun feidhme faoin gCinneadh seo, ba cheart iad a bheith riachtanach agus comhréireach agus na rioscaí do chearta agus do shaoirsí na n-ábhar sonraí á gcur san áireamh.

(16)

Ba cheart don Choimisiún na srianta uile a láimhseáil ar bhealach trédhearcach agus gach cur i bhfeidhm srianta a chlárú sa chóras taifid comhfhreagrach.

(17)

Faoi Airteagal 25(8) de Rialachán (AE) 2018/1725, féadfaidh rialaitheoirí sonraí soláthar faisnéise a iarchur, a fhágáil ar lár nó a dhiúltú, bunaithe ar na cúiseanna atá le srian a chur ar an ábhar sonraí, dá ndéanfadh soláthar na faisnéise sin dochar d’éifeacht an tsriain ar bhealach ar bith. Go háirithe, tá feidhm aige sin maidir leis na srianta ar na hoibleagáidí dá bhforáiltear in Airteagal 16 agus Airteagal 35 de Rialachán (AE) 2018/1725. Ba cheart don Choimisiún athbhreithniú tráthrialta a dhéanamh ar na srianta arna bhforchur chun a áirithiú nach gcuirfear srian ar chearta an ábhair sonraí maidir lena chur ar an eolas i gcomhréir le hAirteagal 16 agus Airteagal 35 de Rialachán (AE) 2018/1725 ach a fhad a bheidh gá le srianta den sórt sin chun a chur ar a chumas don Choimisiún a shlándáil TF a áirithiú agus, go háirithe, teagmhais slándála TF a láimhseáil.

(18)

I gcás ina gcuireann an Coimisiún srian ar fheidhmiú chearta na n-ábhar sonraí seachas sna cásanna sin dá dtagraítear in Airteagal 16 agus Airteagal 35 de Rialachán (AE) 2018/1725, ba cheart don rialaitheoir sonraí a mheasúnú, ar bonn cás ar chás, an ndéanfaí dochar dá chuspóir dá gcuirfí in iúl é.

(19)

Ba cheart d’Oifigeach Cosanta Sonraí an Choimisiúin athbhreithniú neamhspleách a dhéanamh ar chur i bhfeidhm na srianta, d’fhonn a áirithiú go gcomhlíontar an Cinneadh seo.

(20)

Chun a chur ar a chumas don Choimisiún srian a chur láithreach ar fheidhmiú ceart agus oibleagáidí áirithe i gcomhréir le hAirteagal 25 de Rialachán (AE) 2018/1725, ba cheart an Cinneadh seo a theacht i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

(21)

D’eisigh an Maoirseoir Eorpach ar Chosaint Sonraí tuairim an 16 Meán Fómhair 2021,